Friday, September 22, 2023

ဖယ်ခုံမြို့နယ်အတွင်း လဝက ရုံးပိတ် မှတ်ပုံတင်လုပ်ရန်ပြည်သူများခက်ခဲ

Must read

သျှမ်းပြည်တောင်ပိုင်း ဖယ်ခုံမြို့တွင် လဝက ရုံးများပိတ်ထားပြီး ပြည်သူများ မှတ်ပုံတင်လုပ်ရန် အခက်ခဲရှိနေကြောင်း စုံစမ်းသိရှိရသည်။

ဖယ်ခုံ

ဖယ်ခုံမြို့ ဌာနဆိုင်ရာရုံးများသည် စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲဖြစ်ပွားချိန်က စပြီး ပင်လောင်းမြို့သို့ ပြောင်းရွှေ့သွားကြောင်း သိရသည်။

“ရုံးက ဖယ်ခုံမှာ မရှိတော့ဘူး။ ဖယ်ခုံရုံးက ပိတ်ထားလိုက်ပြီ။ ပင်လောင်းဘက်ကို ပြောင်းသွားပြီလို့သိရတယ်။ တကယ်လို့ မှတ်ပုံတင်တွေ ဘာတွေလုပ်ချင်ရင်တော့ ဖယ်ခုံကလူတွေ ပင်လောင်းကိုသွားရမှာ။ ဒီနှစ်ထဲမှာပဲ သူတို့ ပင်လောင်းဘက်ကို ပြောင်းသွားတယ်လို့ ကြားတယ်” ဟု ဖယ်ခုံမြို့နယ် အမည်မဖော်လိုသည့် ကျေးရွာ အုပ်ချုပ်ရေးမှူးတစ်ဦးက ပြောသည်။

ဖယ်ခုံမြို့နယ်အတွင်း တိုက်ပွဲမကြာခဏ ဖြစ်ပွားနေသည့်အတွက် ဌာနဆိုင်ရာ ရုံးများ လုံခြုံရေးအရကြောင့် ပင်လောင်းမြို့ဘက်သို့ ထွက်ပြေးသွားကြောင်း သိရသည်။

“သူတို့လည်းကြောက်လို့နေမှာပေါ့။ တိုက်ပွဲက ခဏခဏ ဖြစ်တော့ သူတို့ ရုံးကို ဗုံးလာခွဲမှာကြောက်လို့ပြောင်းလိုက် တာ ထင်တယ်။ အရင်ကတော့ ရုံးက ဖွင့်တယ်။ အခုဆို စစ်သားတွေဘဲစောင့်နေတယ်တဲ့” ဟု ဖယ်ခုံမြို့ဒေသခံ တစ်ဦးက ပြောသည်။

ထို့အပြင် လဝကရုံးပါ ပြောင်းသွားသောကြောင့် ပြည်သူများအနေဖြင့် မှတ်ပုံတင်လုပ်လိုပါက ပင်လောင်းမြို့သို့ ဆင်းသွားရကြောင်း သိရသည်။

လက်ရှိတွင် စစ်ကောင်စီကလည်း ခရီးသွားပြည်သူများကို မှတ်ပုံတင်စစ်ဆေးနေပြီး မရှိပါက ငွေကြေးတောင်းခံမှု များလည်းရှိနေကြောင်း သိရသည်။

“မှတ်ပုံတင်လုပ်ချင်ရင် ပင်လောင်းမြို့ကို တကူးတက ဆင်းသွားရသေးတယ်လေ။ ပြီးမှ ရုံးမှာ သွားလုပ်ရတာ။ ပြီးတော့ ခရီးသွားရင်လည်း မှတ်ပုံတင်ကလိုသေးတယ်လေ။ မရှိတော့လည်း သူများက စစ်ဆေးပြီး ပိုက်ဆံတောင်း ဖမ်းသေးတယ်” ဟု အထက်ပါ ဒေသခံ အမျိုးသားက ပြောသည်။

ဖယ်ခုံမြို့နယ်သည် ပြည်သူ့ကာကွယ်ရေးတပ်ဖွဲ့ PDF တို့ အများအပြားရှိပြီး သွားလာလှုပ်ရှားနေသည့် ဒေသတစ်ခု ဖြစ်သည်။

Leave a Comments

- Advertisement -spot_img

Latest article