သျှမ်းပြည်မြောက်ပိုင်း ကျောက်မဲမြို့ အရှေ့ဘက်ခြမ်း အေးရှား၀ေါလ် တိုးဂိတ် အနီးတွင် ယမန်နေ့ (ဧပြီ ၆)ရက် ည ၉ နာရီ၀န်းကျင်၌ ပေါက်ကွဲသံများ အဆက်မပြတ်ကြားရကြောင်း သတင်းသိရသည်။
ယမန်နေ့ ဧပြီလ ၆ ရက်နေ့ ညနေ ၉ နာရီဝန်းကျင်တွင် ကျောက်မဲမြို့နယ် အရှေ့ဘက်ရှိ ခိုတင့်ကျေးရွာ အနီးတွင် ပေါက်ကွဲသံများ ၇ ချက် ဆက်တိုက်ကြားရကြောင်း ကျောက်မဲမြို့နယ် ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ပေါက်ကွဲသံက အကျယ်ကြီးပါ၊ စုစုပေါင်း ၇ ချက်ကြားလိုက်ရတယ်၊ လက်နက်ကြီးသံလိုလို ဗုံးပေါက်ကွဲသံ လိုလိုပဲ၊ တခြား ပစ်ခတ်သံတွေကိုတော့ မကြားလိုက်ရဘူး” ဟု အထက်ပါ အမျိုးသမီးက သျှမ်းသံတော်ဆင့်ကို ပြောသည်။
ထို့အတူပင် ယမန်နေ့ နေ့လည်ပိုင်း ၁ နာရီ ဝန်းကျင်အချိန်တွင်လည်း ရပ်ကွက် ၈ ထုံးဖိုဘက်တွင် ကျယ်လောက်သော ပေါက်ကွဲသံတစ်ချက် ကြားလိုက်ရကြောင်း အထက်ပါ ဒေသခံအမျိုးသမီးက သျှမ်းသံတော်ဆင့်ကို ပြောသည်။
“နေ့လည်ကလည်း ၁၀ တန်းတွေ စာမေးပွဲဖြေပြီးလောက်တဲ့အချိန် ထုံးဖိုဘက်မှာ ပေါက်ကွဲသံ အကျယ်ကြီး ကြားလိုက်ရတယ်၊ ဘာကြောင့်လဲဆိုတာတော့ မသိရသေးဘူး၊ အဲ့ကတည်းက မြို့ထဲမှာ စစ်သားရော ရဲတွေရော ကင်းလှည့်တာရှိတယ်” ဟု ၎င်းက ပြောသည်။
ပြီးခဲ့သည့် မတ်လ ၂၉ ရက် ညနေပိုင်းတွင်လည်း ကျောက်မဲ စည်ပင်သာယာရေးရုံးအနီး ဗုံးပေါက်ကွဲမှု ဖြစ်ပွားခဲ့ပြီး မြို့တွင်း နေရာတော်တော်များများတွင် လမ်းသွားလမ်းလာပြည်သူများအား စစ်ကောင်စီ တို့မှ စစ်ဆေးရိုက်နှက်မှု ပြုလုပ်ခဲ့သဖြင့်အမျိုးသားတစ်ဦး သေဆုံးသွားခဲ့ရပါသည်။
ထို့အတူ ပြီးခဲ့သည့် ဖေဖော်ဝါရီလအတွင်းကလည်း ရပ်ကွက် (၉)အတွင်း နေထိုင်သည့် စစ်ဘေးရှောင် ပြည်သူတစ်ဦးအား စစ်ကောင်စီတို့မှ ရိုက်နှက်သတ်ဖြတ်ခဲ့ပြီး နေအိမ်တွင်းရှိ ပစ္စည်းများကိုပါ ယူဆောင်သွားကြောင်း သိရသည်။
