သျှမ်း – ကရင်နီ နယ်စပ်ရှိ ဆေးဆိုင်များသည် စစ်ကောင်စီထောက်ခံချက်များ ရယူပြီးမှ ဖွင့်လှစ်ရန် စေခိုင်းညွှန်ကြားမှုများ ရှိနေကြောင်း သတင်းသိရသည်။

သျှမ်းပြည်တောင်ပိုင်းရှိ ဖယ်ခုံမြို့နယ်အတွင်းတွင် ဆေးဆိုင်များ ၃ ဆိုင်ခန့်သာရှိနေပြီး စစ်ကောင်စီမှ ပေးအပ်သည့် ထောက်ခံချက်များဖြင့် ဖွင့်လှစ်ရကြောင်းလည်း ဒေသခံတစ်ဦးက သျှမ်းသံတော်ဆင့်ကို ပြောသည်။

“အခု ဖယ်ခုံမြို့ထဲမှာ ဆေးဆိုင် သုံးဆိုင်ပဲရှိတော့တယ်၊ ဖွင့်တဲ့ဆိုင်ပေါ့နော်၊ သုံးဆိုင်လုံးက စစ်ကောင်စီဆီကို အကြောင်းကြားပြီးတော့ ထောက်ခံချက်ယူပြီး ဖွင့်ရတယ်၊ စာထဲမှာဘာတွေပါလဲဆိုတာတော့ ကျမတို့လည်း မသိရဘူး” ဟု ဖယ်ခုံမြို့နေ ပြည်သူတစ်ဦးက သျှမ်းသံတော်ဆင့်ကို ပြောသည်။

ထို့အပြင် ဖယ်ခုံမြို့ရှိ ဆေးဆိုင်များသည် ဆေးဝါးများတင်သွင်းစဥ်တွင် ဆေးအမျိုးအစားများနှင့် အရေအတွက် များကိုလည်း စစ်ကောင်စီထံတင်ပြရပြီး တချို့သော ဆေးဝါးများကို စစ်ကောင်စီက အခကြေးငွေမပေးပဲ ယူဆောင်မှုများလည်း ရှိကြောင်း သတင်းသိရသည်။

ဖယ်ခုံမြို့ အပြင် စစ်ကောင်စီတပ်ဖွဲ့နှင့် ဒေသခံပြည်သူ့ကာကွယ်ရေး ပူးပေါင်းတပ်ဖွဲ့တို့ တိုက်ပွဲဖြစ်ပွားနေသည့် သျှမ်းပြည်တောင်ပိုင်း မိုးဗြဲမြို့ နှင့် ကရင်နီပြည် ဒီးမော့ဆိုမြို့တို့မှ ဆေးဆိုင်များလည်း စစ်ကောင်စီထံ အကြောင်းကြားပြီး ဖွင့်လှစ်ရကြောင်း သတင်းသိရသည်။

ထို ဖြစ်စဥ်များနှင့် ပတ်သက်ပြီး ဒေသအတွင်းသွားလာလှုပ်ရှားနေသည့် ဒေသခံပြည်သူ့ကာကွယ်ရေးများအနေဖြင့် ၎င်းတို့အတွက် ဆေးဝါးအလွယ်တကူ မရရှိနိုင်အောင် ပြည်သူများကို စစ်ကောင်စီ ဖိအားပေးနေသည်ဟု မြင်မိကြောင်း Pekhon PDF မှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

“အဲ့လိုတွေရှိနေတော့ ကျနော်တို့ရဲဘော်တွေလည်း မြို့ပေါ်တက်ပြီး ဆေးဝယ်တာတွေ မလုပ်တော့ဘူး၊ ပြည်သူ တွေလည်း ထိခိုက်နစ်နာမှာစိုးလို့၊ အဓိကကတော့ ကျနော်တို့ ဆေးဝါးလွယ်လွယ်မရနိုင်ဖို့ရယ်၊ ပြည်သူတွေကို ထိန်းချုပ်ချင်လို့ လုပ်နေတာလို့ မြင်တယ်” ဟု Pekhon မှ ပြန်ကြားရေးတာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

လက်ရှိ သျှမ်း – ကရင်နီ နယ်စပ် တစ်လျှောက်တွင် တိုက်ပွဲငြိမ်နေသော်လည်းစစ်ကောင်စီတို့၏ တင်းကြပ်သော စစ်ဆေးရေးဂိတ်များနှင့် တချို့သော ဆေးဝါးများကို သိမ်းဆည်းယူဆောင်ခြင်းများ ပြုလုပ်နေသည့်အတွက် ဆေးဝါး ပြတ်လပ်မှုများနှင့် လိုအပ်သည့် ဆေးများ မရရှိနိုင်ခြင်းတို့ ဖြစ်နေကြောင်းလည်း သိရသည်။

ကရင်နီပြည် ဒီးမော့ဆိုအတွင်းတွင် တိုက်ပွဲများဆက်လက်ဖြစ်ပွားနေသည့်အတွက် ပြည်သူ့ကာကွယ်ရေး တပ်ဖွဲ့များ အနေဖြင့်လက်နက်ခဲယမ်းများ ထပ်မံဖြည့်တင်းရန်အတွက်နှင့် ဒဏ်ရာရ ရဲဘော်များ ကုသရန်အတွက် အလှူငွေများ လိုအပ်နေလျက်ရှိကြောင်း သတင်းသိရသည်။