ပြည်ပနိုင်ငံခြားဝင်ငွေရရှိထားသည့် ပြည်တွင်းနေထိုင်သူများသည် မြန်မာနိုင်ငံတွင်းသို့ ပြန်လည်ပေးပို့ပြီး နိုင်ငံခြားသုံးငွေ စားရင်ဖွင့်ပြီး တရက်အတွင်း မြန်မာကျပ်ငွေဖြင့် လဲလှယ်ရောင်ချရမည် ဟု စစ်ကောင်စီ လက်အောက်ခံ ဗဟိုဘဏ်က ညွှန်ကြားလိုက်သည်။

ထိုညွှန်ကြားချက်သည် စစ်ကောင်စီ လက်အောက်ခံ ဗဟိုဘဏ် မှ ဧပြီ ၃ရက်စွဲဖြင့် ထုတ်ပြန်ကြေညာခဲ့သည်။

ယခုကဲ့သို ထုတ်ပြန်ခဲ့ခြင်းသည် မြန်မာနိုင်ငံ ဗဟိုဘဏ်ထံ နိုင်ငံခြားဝင်ငွေ ရရှိမှုနည်းပါးလာြခင်း ဖြစ်သည်ဟု သျှမ်းပြည်အတွင်း ဥပဒေပညာရှင် စိုင်းဦးက ပြောသည်။

“ သူတို့ ဒီလိုထုတ်ပြန်တယ်ဆိုတာက သူတို့နား နိုင်ငံခြားဝင်ငွေ မရှိတော့ဘူးဆိုတာ သိသာတယ်။ ဟိုအရင်တုန်းကဆိုရင် သူတို့ ဒေါ်လာတွေကို ထုတ်ရောင်းချနေတာရှိတယ်။ အခုက ဒေါ်လာတွေ မရှိတော့ဘူးဆိုတော့ ပြည်သူတွေထံကနေ ညစ်ယူချင်တာပေါ့။ ဒေါ်လာကိုင်ဆောင်ထားတဲ့သူတွေကို AD ဘဏ်မှာ သွားပြီးတော့ မြန်မာငွေနဲ့ ပြန်လည်ရောင်းချခိုင်း တာပေါ့။ ပြည်တွင်းမှာ နိုင်ငံခြားငွေ မကိုင်ဆောင်ရဘူးဆိုတဲ့သဘောပဲ” ဟု စိုင်းဦး က ပြောသည်။

နိုင်ငံခြားငွေများ ပြည်ပသို့လွှဲပြောင်းခြင်းနှင့် စပ်လျဥ်ပြီး နိုင်ငံခြားသုံးငွေ ကြီးကြပ်မှုကော်မတီ၏ ခွင့်ပြုချက်ရရှိထားသည့် AD ဘဏ်တွင် အလုပ်လုပ်ကိုင်သည့် တစ်ရက်အတွင်း နိုင်ငံခြားငွေကို မြန်မာကျပ်ငွေအဖြစ် သွားရောက် ရောင်းချရမည် ဖြစ်ကြောင်း ထုတ်ပြန်ချက်တွင်ရေးသားထားသည်။

ထိုအပြင် စစ်ကောင်စီသည် နိုင်ငံခြားငွေ ၁ ဒေါ်လာကို မြန်မာကျပ်ငွေ ၁၈၅၀ ကျပ်ဖြင့် ပေးဆောင်ထားပြီး လက်ရှိငွေပေါက်ဈေးသည် ၁ဒေါ်လာကို မြန်မာငွေ ၂၀၀၀ ကျော်ရရှိနေသောကြောင့် ဘဏ်၌ ငွေသွားလှဲပါက အရှုံးပေါ်ကြောင်း သိရသည်။

“ ဒီနေ့ဆို ဘဏ်တွေမှာ တော်တော်လေးရှုပ်နေတာပဲ။ သူတို့ပေးတဲ့ဈေးက ၁ ဒေါ်လာကို ၁၈၅၀ ကျပ်။ အခု အပြင်မှာက တစ်ဒေါ်လာကို ၂၀၀၀ ကျော်လောက်ရနေတယ်။ ဘဏ်မှာ သွားရောင်းချဖို့လိုတဲ့ သူတွေကတော့ အရှုံးပေါ်နေကြတာပေါ့။ ပြီးတော့ ရှိသမျှဝင်ငွေကိုလည်း အကုန်လှဲရမယ်ဆိုတော့ နိုင်ငံခြားဝင်ငွေကနေရတဲ့သူတွေအတွက်ကတော့ ခက်ခဲကြတာပေါ့” ဟု နိုင်ငံခြားငွေ သွားလှဲခဲ့သည့် တောင်ကြီး ဒေသခံ အမျိုးသားတစ်ဦးက ပြောသည်။

ထိုသို့ နိုင်ငံခြားဝင်ငွေကို စစ်ကောင်စီက ထိန်းချုပ်လိုက်ခြင်းဖြင့် ပြည်ပမှ တင်ပို့လာသည့် ကုန်ပစ္စည်းများလည်း ဈေးမြင့်တက်လာနိုင်ကြောင်းသိရသည်။

“ ကုန်ဈေးနှုန်းကတော့ တက်မှာသေချာတယ်။ သူတို့ဒီလိုလုပ်လိုက်တော့ နိုင်ငံခြားဝင်ငွေက သူတို့နားပဲ သွားတော့မှာလေ။ နိုင်ငံခြားကတင်လာတဲ့ ကုန်တွေကိုဆိုရင်လည်း ဒေါ်လာနဲ့ငွေပေးချေရတာရှိတယ်။ သူတို့က ထိန်းချုပ်လိုက်တော့ ကုန်ပစ္စည်းတွေကတော့ ဈေးပြန်တက်လာနိုင်တယ်” ဟု တာချီလိတ်မြို့ ကုန်သည်တစ်ဦးက ပြောသည်။

စစ်ကောင်စီ လက်အောက်ခံ ဗဟိုဘဏ်၏ အမိန့်ကို လိုက်နာခြင်းမရှိပါက နိုင်ငံခြားသုံးငွေ စီမံခန့်ခွဲမှုဥပဒေအရ အရေးယူခံရမည် ဟုလည်း သိရသည်။

ဗဟိုဘဏ်၏ နိုင်ငံခြားငွေ လဲလှယ်နှုန်းသည် ယနေ့ ဧပြီလ ၄ ရက်၌ အမေရိကန် ၁ဒေါ်လာကို မြန်မာငွေ ၁၈၅၀ ကျပ် သတ်မှတ်ထားပြီး ငွေလဲကောင်တာဈေးနှုန်းမှာ ဝယ်ဈေး ၁၈၅၀ ကျပ် နှင့် ရောင်းဈေး ၁၈၆၀ ကျပ် ရှိကာ ပြင်ပအရောင်းအဝယ်ဖြစ်နေသည့် ဈေးနှုန်းမှာ ဝယ်ဈေး ၂၀၁၀ ကျပ်နှင့် ရောင်းဈေး ၂၀၃၀ ကျပ် ရှိကြောင်း သိရသည်။