ပြီးခဲ့သည့် မတ်လကုန်ပိုင်းအတွင်း စစ်ကောင်စီတို့သည် မိတ္ထီလာမှတစ်ဆင့် သျှမ်းပြည်တောင်ပိုင်းအတွင်းရှိ မြို့နယ် များထံသို့ တပ်သားအင်အား အများအပြား ဖြည့်တင်းနေကြောင်း သတင်းသိရသည်။
မတ်လ ၂၈ ရက်နေ့တွင် စစ်သားအင်အားနှင့် စားနပ်ရိက္ခာ အပြင် လက်နက်များကိုင်ဆောင်ထားသည့် စစ်ကား အစီးရေ ၇၀ ကျော်သည် ကလောမြို့ကို ဖြတ်ပြီး တောင်ကြီးဘက်သို့ ဦးတည်မောင်းနှင်သွားကြောင်း မြင်တွေ့ရသည့် ပြည်သူတစ်ဦးက သျှမ်းသံတော်ဆင့်ကို ပြောသည်။
“မတ်လ ၂၈ ရက်နေ့တုန်းက မိတ္ထီလာကနေလာတယ်လို့ ထင်ရတဲ့ စစ်ကားအစီး ၇၅ စီး ကျနော်တို့ ကလောမြို့ကို ဖြတ်သွားတယ်၊ တံဆိပ်ကိုတော့ သေချာမမြင်လိုက်ရဘူး၊ ကားအများစုက စစ်သားတွေတင်လာတယ်၊ အားလုံး အသက် ၂၀ ကျော်ကနေ လူလတ်ပိုင်းတွေပဲ၊ တောင်ကြီးဘက်ကို ဦးတည်ပြီးသွားတာ” ဟု ကလောမြို့ ဒေသခံ အသက် ၂၈ နှစ် အရွယ်ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ စစ်ကားအစီး ၇၀ ကျော်များအနက် စစ်ကား ၁၀ စီးကျော်သည် ရွှေညောင်လမ်းခွဲမှ ရပ်စောက်ဘက်သို့ ဆင်းသွားပြီး တောင်ကြီးမြို့ဘက်သို့ စစ်ကားအစီးရေ ၅၀ ကျော် ရောက်လာကြောင်း သိရသည်။
“တောင်ကြီးမြို့ကို ဖြတ်သန်းသွားတဲ့အချိန်မှာတော့ ၅၃ စီးတွေ့ရတယ်၊ ဒါပေမဲ့ ကလောဘက်က လာတဲ့ ဟို အစီး ၇၀ ကျော်ဟာ ဟုတ်မဟုတ်တော့ မသေချာဘူးပေါ့၊ ဘာဖြစ်လို့လဲဆိုရင် သူတို့တံဆိပ်ကိုလည်း သေချာ မတွေ့ရလို့လေ၊ ဟိုပုံးဘက် ဆင်းသွားတယ်” ဟု တောင်ကြီးမြို့မှ လူငယ်အမျိုးသားတစ်ဦးကလည်း သျှမ်းသံတော်ဆင့်ကို ပြောသည်။
အဆိုပါ စစ်ကားတို့သည် တောင်ကြီးမြို့မှ သျှမ်းပြည်တောင်ပိုင်းရှိ နမ့်စန်မြို့အခြေစိုက် စစ်တပ် အမှတ် ၂၄၇ သို့ အင်အားဖြည့်တင်းရန်အတွက်ဟု ဒေသခံများက ပြောသော်လည်း သျှမ်းသံတော်ဆင့် အနေဖြင့် သီးခြား အတည်ပြုချက် မရရှိသေးပါ။
ထို့အပြင် ရပ်စောက်မြို့နယ် နောင်ဝိုးကျေးရွာအတွင်းသို့လည်း စစ်ကောင်စီအင်အား ၁၀၀ ကျော်ပါရှိသည့် စစ်ကား ၁၀ စီး ဝန်းကျင် ရောက်ရှိလာကြောင်း ဒေသခံများက သျှမ်းသံတော်ဆင့်ကို ပြောသည်။
“သူတို့က ဒီနောင်ဝိုးကျေးရွာအနီးမှာ စခန်းလာချနေတာ အများကြီးပဲ၊ အင်အား ၁၀၀ ကျော်လောက်ရှိမယ်၊ အဲ့ဒီနောင်ဝိုးနယ်ထဲမှာ မြောက်ပိုင်းမဟာမိတ် တပ်ပေါင်းစုတွေလည်း သွားလာလှုပ်ရှားနေတာရှိလို့ ကျနော်တို့ ဒေသခံတွေ အနေနဲ့တော့ သူတို့ တိုက်ပွဲဖြစ်မှာကို ကြောက်နေရတယ်” ဟု ရပ်စောက်မြို့နယ်မှ အသက် ၄၀ အရွယ်ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့အပြင် ရပ်စောက်မြို့ရှိ ဗထူးတပ်အတွင်း စစ်ရေးလေ့ကျင့်နေသည့် စစ်သားများစွာလည်း မြင်တွေ့နေရသည့် အတွက် စစ်ဆင်ရေးအတွက် ပြင်ဆင်နေကြခြင်းဖြစ်မည်ဟု ဒေသခံများက ထင်မြင်မိကာ တိုက်ပွဲဖြစ်ပွားမည်ကို စိုးရိမ်ထိတ်လန့်နေကြောင်း သိရသည်။
တစ်ဖက်တွင်လည်း ယမန်နေ့ မတ်လ ၃၁ ရက်နေ့တွင် သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA ) တပ်ဖွဲ့များအားလုံး ဌာနချုပ်ဝမ်ဟိုင်းသို့ ဆုတ်ခွာမှုမပြုပါက တိုက်ထုတ်မည်ဆိုသည့် သတင်းများ လည်း ထွက်ပေါ်လာသည့်အတွက် ပြည်သူများက ပိုမို စိုးရိမ်စိတ် ကြီးမားနေခြင်းဖြစ်သည်။
ထိုကိစ္စနှင့် ပတ်သက်ပြီး မေးမြန်းရန်အတွက် သျှမ်းသံတော်ဆင့်မှ သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA)၏ ပြောရေးဆိုခွင့်များကို အကြိမ်ကြိမ် ကြိုးစားဆက်သွယ်သော်လည်း အဆက်အသွယ်မရရှိခဲ့ပေ။
