သျှမ်းပြည်မြောက်ပိုင်း မူဆယ်မြို့နယ် တော်ရွက်ကျေးရွာအုပ်စု ဟိုဆောင်ကျေးရွာတွင် စစ်ကောင်စီလက်အောက်ခံ ပြည်သူ့စစ်များက လမ်းသွားလမ်းလာများအား စစ်ဆေးမှု ပြုလုပ်နေလျက်ရှိကြောင်း စုံစမ်းသိရှိရသည်။
ယခု မတ်လအတွင်းမှစပြီး မူဆယ်မြို့ ဟိုဆောင်ကျေးရွာထိပ်နှင့် မင်္ဂလာမူဆယ်အဝင်ပေါက်တို့တွင် ပြည်သူ့စစ်များ စစ်ဆေးနေကြောင်း၊ ထိုနေရာတွင် စစ်ကောင်စီပိုင် Mytel တာဝါတိုင်ရှိထားကြောင်းလည်း မူဆယ်မြို့ ဒေသခံများက သျှမ်းသံတော်ဆင့်ကို ပြောသည်။
“သူတို့ ဒီ မတ်လ ဒုတိယပတ်ကနေပြီးတော့ စောင့်ကြည့်စစ်ဆေးနေတာ။ ဘယ်သွားဘယ်လာတာတွေစောင့်မေးတာပေါ့။ ပြီးတော့ အဲနားမှာ မိုင်တဲ ဖုန်း တာဝါတိုင် ရှိတယ်လေ။ သူတို့ အဲ့နေရာအတွက် အကာကွယ် လာယူထားပေးတာလား မသိဘူး” ဟု မူဆယ်မြို့ ဒေသခံ အမျိုးသားတစ်ဦးက ပြောသည်။
ထိုပြည်သူ့စစ်များသည် သွားလာသည့် ပြည်သူများကို မှတ်ပုံတင်စစ်ဆေးနေလျက်ရှိပြီး ခြိမ်းခြောက်မှုများလည်း ရှိနေသဖြင့် ဒေသခံများက သွားလာရန်အတွက် စိုးရိမ်မှုများဖြစ်ရကြောင်း စစ်ဆေးမှုခံရသည့် အမျိုးသမီးတစ်ဦးက ပြောသည်။
“ကျမတို့ မိသားစု တနေ့က မင်္ဂလာမူဆယ်ဘက်သွားတာ အစစ်ဆေးခံရတာ။ သူတို့ မှတ်ပုံတင်တောင်းကြည့်တယ်။ ကျမတို့မပါသွားဘူး။ လူကြီးနဲ့ ကလေးပါတော့ သူတို့ ကျမတို့ကို ဘာမှတော့ သိပ်မလုပ်ဘူး။ နောက်တစ်ခါ မှတ်ပုံတင်မပါရင်တော့ အရေးယူခံရမယ်လို့ ခြိမ်းခြောက်သေးတယ်။ ည တစ်ယောက်ထဲပဲ သွားလာရင်တော့ ပြန်လွှတ်လာဖို့တော့ ခက်မယ်” ဟု စစ်ဆေးခံရသည့် အမျိုးသမီးတစ်ဦးက ပြောသည်။
ထိုစစ်ဆေးမှု ပြုလုပ်နေသည့် ပြည်သူ့စစ်များ၏ လက်မောင်းသူ နမ့်ခမ်း(၁) ဆိုသည့် တံဆိပ်ပါကြောင်း သိရသည်။
မူဆယ်မြို့နယ်အတွင်း ပြည်သူ့စစ်များ စစ်ဆေးနေသည့်အပြင် စစ်ကောင်စီတို့၏ စစ်ဆေးရေးဂိတ်များလည်း များစွာရှိနေကြောင်း သိရသည်။
ထိုစစ်ဆေးရေးဂိတ်များသည် မှတ်ပုံတင်များကို စစ်ဆေးပြီး မပါရှိပါက ငွေကြေးတောင်းယူမှုများလည်း ရှိနေကြောင်း သိရသည်။
