သျှမ်းပြည်မြောက်ပိုင်း နမ့်ခမ်းမြို့ရှိ သင်္ချိုင်းတစ်ခုတွင် မူးယစ်ဆေးဝါးသုံးစွဲသူများက အုတ်ဂူများကို ဖျက်ဆီးပြီး သံများကို ခိုးယူသွားကြကြောင်း စုံစမ်းသိရှိရသည်။
စစ်အာဏာသိမ်းပြီးနောက်ပိုင်း နမ့်ခမ်းမြို့ရှိ သင်္ချိုင်းတွင် မူးယစ်ဆေးဝါးသုံးစွဲသူများနှင့် ရောင်းဝယ်ဖောက်ကားသူ များပြားလာပြီး သင်္ချိုင်းအုတ်ဂူ (၁၀)ခုကျော် ဖျက်ဆီးသွားကြောင်း ယမန်နေ့ (မတ် ၂၈ ရက်) သွားရောက် ဖမ်းဆီးသူထဲမှ တာဝန်ရှိသူတစ်ဦးက သျှမ်းသံတော်ဆင့် ကို ပြောသည်။
“ကျနော်တို့ ရောက်သွားတော့ ဆေးသုံးသူတွေ ထွက်ပြေးကုန်ကြပြီ။ မဖမ်းမိဘူး။ သူတို့က အဲ့မှာသွားပြီး ဆေးသွားရှူကြတယ်။ သင်္ချိုင်းအုတ်ဂူတွေ ဖျက်ဆီးတယ်။ သံတွေ ဖျက်ဆီးပြီး ယူရောင်းတယ်။ သူတို့ ဖျက်ဆီးသွားတာ (၁၀)ခုကျော်လောက်ရှိမယ်” ဟု သွားရောက် ဖမ်းဆီးသူထဲက တာဝန်ရှိသူ တစ်ဦးက ပြောသည်။
နမ့်ခမ်းမြို့ထဲ စစ်တပ်အာဏာသိမ်းပြီးနောက်ပိုင်း လူငယ်များ မူးယစ်ဆေးဝါးသုံးစွဲလာသူ များပြားလာခြင်း၊ လောင်းကစားများ ပိုမိုများပြားလာပြီး သူခိုးများလည်း ယခင်ကထက် များပြားလာကြောင်း နမ့်ခမ်းဒေသခံ အမျိုးသား တစ်ဦးက ပြောသည်။
“သူခိုးတွေ တအားများလာတယ်။ အိမ်ရှေ့က ဆိုလာတွေလည်း လာခိုးတာတွေရှိတယ်။ ငါးဖမ်းဂိမ်း (လောင်းကစား) လည်း အရင်ကထက် ပိုမိုများလာတယ်” ဟု နမ့်ခမ်းဒေသခံ အမျိုးသားတစ်ဦးက ပြောသည်။
စစ်တပ်က နိုင်ငံတော် အာဏာသိမ်းပြီးနောက်ပိုင်း သျှမ်းပြည်တွင်းရှိ မြို့နယ်များတွင် မူးယစ်ဆေးဝါးသုံးစွဲသူ များပြားလာခြင်း၊ လောင်းကစား အများအပြား ရှိလာခဲ့ပြီး သူခိုးဓါးမြလဲ ယခင်ကထက် ပိုမိုများပြားလာသည်။
Leave a Comments