သျှမ်းပြည်မြောက်ပိုင်း နမ့်ခမ်းမြို့နယ်အတွင်း စစ်ကောင်စီနှင့် ပြည်သူ့စစ် တပ်ဖွဲ့ များ ရမ်းသမ်းပစ်ခတ်မှုကြောင့် အရပ်သားနေအိမ်တချို့ ထိမှန်ပျက်စီးသွားကြောင်း စုံစမ်းသိရသည်။
မူဆယ် – နမ့်ခမ်း ပြည်ထောင်စုလမ်းမပေါ် လုံခြုံရေးလုပ်နေသည့် စစ်ကောင်စီနှင့် ပြည်သူ့စစ်အဖွဲ့ဘက်မှ လက်နက်ဖြင့် အကြောင်းမဲ့ ရမ်းသမ်းပစ်ခတ်သဖြင့် နမ့်ခမ်းမြို့နယ် စယ်ဟိုင်းကျေးရွာမှ နေအိမ်တချို့ ထိမှန်ခဲ့ကြောင်း စုံစမ်းသိရှိရသည်။
“စစ်ကောင်စီတပ်က စယ်ဟိုင်းရွာထဲကို ပစ်တာ ၂ ကြိမ်ရှိသွားပြီ။ ညညဆို ပစ်တယ်။ ၂ ကြိမ်စလုံး သူတို့အိမ်ထိသွားတယ်” ဟု စယ်ဟိုင်းဒေသခံ အမျိုးသား တစ်ဦးက ပြောသည်။
ဒီဇင်ဘာ (၁၈)ရက်နေ့ ည (၈)နာရီအချိန်ခန့်က စစ်ကောင်စီဘက်မှ လက်နက်ဖြင့် ရမ်းသမ်းပစ်ခတ်သဖြင့် နေအိမ်မှန်များ ထိမှန်သွားပြီး ပြီးခဲ့သည့် တစ်ပတ်ကလည်း ထိုအိမ်မှာ လက်နက်ထိမှန်ခဲ့ကြောင်း စုံစမ်းသိရှိရသည်။
“သူတို့ တပ်လှန့်တဲ့ သဘောဖြစ်တယ်။ ၂ ရက် ၃ ရက်နေရင် တစ်ကြိမ် ပစ်တယ်။ တစ်ချို့နေ့တွေက ဘယ်မှာ သွားမှန်မှန်း မသိဘူး” ဟု စယ်ဟိုင်းဒေသခံ တစ်ဦးက ပြောသည်။
သျှမ်းပြည်မြောက်ပိုင်း နမ့်ခမ်းမြို့နယ်သည် TNLA တအာင်း(ပလောင်) တပ်မတော်၊ ကချင်လွတ်မြောက်ရေးတပ်မတော် (KIA)၊ သျှမ်းပြည်တိုးတက်ရေးပါတီ (SSPP)၊ သျှမ်းပြည်ပြန်လည်ထူထောင်ရေးကောင်စီ (RCSS) နှင့် စစ်ကောင်စီ တို့ လှုပ်ရှားနေပြီး မကြာခဏ ဗုံးပေါက်ကွဲမှု ဖြစ်ပွားခဲ့သည်။
