သျှမ်းတောင် တောင်ကြီးမြို့ ရှိ DNNA အမည်ရှိ ကိုယ်ပိုင် အထက်တန်းကျောင်းအုပ်အပါအဝင် အမျိုးသမီး ၈ ဦး ကို စစ်ကောင်စီ မှ ဖမ်းဆီးခံသွားကြောင်း စုံစမ်းသိရသည်.
ယမန်နေ့( မတ်လ ၂၆) ရက် ည အချိန်တွင် တောင်ကြီးမြို့ ပြည်တော်သာရပ်ကွက်၊ ခွာညိုလမ်း နှင့် သဇင်လမ်းတွင် နေထိုင်သည့် DNNA ကိုယ်ပိုင် အထက်တန်းကျောင်းအုပ် ဆရာမဒေါ်နွဲ့နွဲ့အေးနှင့် ၎င်းတူမဖြစ်သူတို့ကို စစ်ကောင်စီတပ်သား အင်အား ၅၀ နီးပါးက လာရောက်ရှာဖွေကြောင်း သိရသည်။
ဟန်ငြိမ်းဦး ဆိုသည့် တယ်ရီဂရမ် အကောင့်တွင် DNNA ကိုယ်ပိုင်အထက်တန်းကျောင်းအုပ် အပါအ၀င် အမျိုးသမီး (၈)ဦးသည် PDFတပ်ဖွဲ့ကိုထောက်ပံ့နေသည်ဟု စွပ်စွဲရေးသား သတင်းပေးမှုကြောင့် ဖမ်းဆီးခံရခြင်း ဖြစ်ကြောင်း တောင်ကြီးမြို့ခံများက ပြောဆိုသည်။
“ဟန်ငြိမ်းဦး ဆိုတဲ့ တယ်ရီဂရမ်အကောင့်မှာ ဆရာမကြီးက (DNNA ကျောင်းအုပ်) PDF တွေကို ထောက်ပံ့ပေးနေ တယ်ဆိုပြီးတင်ထားတော့ စစ်ကောင်စီတွေက လာရှာတာပေါ့၊ ရဲနဲ့ စစ်သားတွေက အိမ်တံခါးတွေ ဖျက်ပြီးတော့ ဖမ်းဖို့လာတာ၊ မတွေ့ရတော့သူတို့က ဓါတ်မီးထိုးပြီးတစ်လမ်းဝင်တစ်လမ်းထွက် ရှာတယ်” ဟု တောင်ကြီးမြို့ခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ဟန်ငြိမ်းဦး တယ်ရီဂရမ်မှ ကျောင်းအုပ်ဆရာမကြီး၏ သမီးနှင့် တူမများက ပြည်သူကာကွယ်ရေးတပ်ဖွဲ့များ အတွက် အလှူငွေများကောက်ခံပြီး ထောက်ပို့တာဝန်ယူနေကြောင်း မတ်လ ၂၅ ရက်၊ ညနေပိုင်းအချိန်က ဖော်ပြထားပြီးနောက် စစ်တပ်နှင့်ရဲများက အဆိုပါနေအိမ်အား တံခါးဖျက်၍ ဝင်ရောက်မှုများ ပြုလုပ်ခဲ့ကြောင်း ဒေသခံများက ပြောသည်။
သို့သော် နေအိမ်တွင် ဖမ်းဆီးရမိခြင်း မရှိသည့်အတွက် စစ်သားနှင့် ရဲတို့က အနီးပတ်ဝန်းကျင်ရှိ နေအိမ်များကို ဝင်ရောက်ရှာဖွေခြင်းနှင့် တခြားရပ်ကွက်များကိုလည်း ပိုက်စိပ်တိုက် ရှာဖွေခြင်းများ ပြုလုပ်ပြီး ယနေ့ (မတ်လ ၂၆ ) ရက် မနက် ၂ နာရီတွင်ကျောင်းအုပ်ဆရာမကြီး ဒေါ်နွဲ့နွဲ့အေး နှင့် မိန်းကလေး ၈ ယောက်တို့ကို ၎င်းတို့ ပုန်းခိုနေသည့် ချမ်းမြရပ်ကွက်မှ နေအိမ်အတွင်းတွင် ဖမ်းဆီးရမိကြောင်းသိရသည်။
“သတင်းပေးရှိလို့ ဒီမနက် ၂ နာရီလောက် မှာ ဆရာမကြီးတို့ ပုန်းခိုနေတဲ့ နေရာကို သိသွားပြီး ဆရာမကြီးနဲ့ တခြားအမျိုးသမီး ၈ ယောက်ကို ဖမ်းမိသွားတယ်” ဟု DNNA နဲ့ နီးစပ်သည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
ကျောင်းအုပ်ဆရာမကြီးကို မဖမ်းမိသေးသည့် အချိန်တွင် DNNA ကျောင်းမှာ စာသင်ကြားနေသည့် ကျောင်း ဆရာတစ်ဦးကိုလည်း စစ်ကောင်စီတို့က ဖမ်းဆီးသွားကြောင်း ဒေသခံများက ပြောသည်။
ယခုရက်ပိုင်းအတွင်း တောင်ကြီးမြို့ပေါ်ဖမ်းဆီးခံရသူများအနက် အသက် ၁၈ အောက်လူငယ်များလည်း ပါဝင်ပြီး စုစုပေါင်း အယောက် ၄၀ ကျော်ခန့်ရှိလာသည့်အတွက် တောင်ကြီးမြို့ အမှတ် ၁ ရဲ စခန်းမှ တချို့ကို တောင်လေးလုံးအကျည်းထောင်သို့ ပြောင်းရွေ့ထားမည်ဖြစ်ကြောင်း ရဲတပ်ဖွဲဝင်များထံမှသိရသည်။
Leave a Comments