သျှမ်းပြည်တောင်ပိုင်း တောင်ကြီးမြို့ပေါ်တွင် စစ်အာဏာရှင်ကို တော်လှန်နေသည့် UG လှုပ်ရှားနေသူ အမျိုးသားတစ်ဦးကို စစ်ကောင်စီ မှ ရှာဖွေဖမ်းဆီးသွားကြောင်း စုံစမ်းသိရသည်။
ပြီးခဲ့သည့် မတ်လ ၂၃ ရက် နေ့လည်ပိုင်းတွင် တောင်ကြီးမြို့မှ မန္တလေးနှင့် ရန်ကုန်သို့ ပို့ဆောင်သည့် ဖောက်ခွဲရေးပစ္စည်းများ လမ်းမှာစစ်ဆေးဖမ်းဆီးခြင်းခံရပြီးနောက် တောင်ကြီးမြို့မှ UG များကို စစ်ကောင်စီတို့က ခြေရာခံလိုက်နိုင်ပြီး ညပိုင်းတွင် အမျိုးသားတစ်ယောက် ဖမ်းဆီးခံလိုက်ရကြောင်း သတင်းသိရသည်။
“မတ်လ ၂၃ ရက်နေ့ ညပိုင်းမှာ ကျောင်းကြီးစုရပ်ကွက်ထဲမှာ တည်းခိုနေတဲ့ အမျိုးသားတစ်ယောက်ကို ဖောက်ခွဲရေးပစ္စည်းတွေနဲ့အတူဖမ်းဆီးရမိတာပါ၊ အဖမ်းခံရတဲ့ အမျိုးသားက အသက် ၃၀ ကျော် လောက် ရှိတယ်” ဟု တောင်ကြီးမြို့မှ တက်ကြွလှုပ်ရှားသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိ တောင်ကြီးမြို့မှ UG သမားများအနေဖြင့် ဘေးလွှတ်ရာသို့ အချိန်မှီ ရှောင်တိမ်းနိုင်ခဲ့သော်လည်း ဆက်စပ်သူများနှင့် မသက်ဆိုင်သူများကိုပါ စစ်ကောင်စီကဖမ်းဆီးမှုများ ပြုလုပ်နေသည့်အတွက် သတိပြုနေထိုင်ကြရန်နှင့် တချို့လူငယ်များလည်း ကြိုတင်ရှောင်တိမ်းသင့်ကြောင်း တက်ကြွလှုပ်ရှားနေသည့် လူငယ်တစ်ဦးက ပြောသည်။
ယခုတစ်ပတ်အတွင်း တောင်ကြီးမြို့ပေါ်ရှိ နိုင်ငံရေးလှုပ်ရှားမှုများ မရှိသော်လည်း အာဏာသိမ်းခါက စစ်ကောင်စီဆန့်ကျင်ကြောင်းဆန္ဒပြ သပိတ်များတွင် ပါဝင်ဖူးသည့် လူငယ်အယောက်၂၀ ကျော်ကို စစ်ကောင်စီက ဖမ်းဆီးထားကြောင်းလည်း သိရသည်။
Leave a Comments