သျှမ်းတောင် ဆီဆိုင်မြို့ရှိ စစ်ရှောင်များကို အလှူပစ္စည်းများ သွားရောက်ပေးအပ်ခဲ့သည့် အသက် (၁၈)နှစ်အောက် အပါအ၀င် လူငယ်များနှင့်ကားသမား စုစုပေါင်း (၆)ဦးကို စစ်ကောင်စီအုပ်စုမှ ဖမ်းဆီးသွားကြောင်း စုံစမ်းသိရသည်။
ထိုဖမ်းဆီးမှုသည် ပြီးခဲ့သည့် မတ် ၂၃ ရက်က ဆီဆိုင်မြို့ ရှိ စစ်ရှောင်များကို သွားရောက်ကူညီခဲ့ပြီး တောင်ကြီးသို့ ပြန်လာချိန် နောင်ထော် စစ်ဆေးရေးဂိတ်တွင် ဖမ်းဆီးခံရကြောင်း သိရသည်။
“သွားတုန်းကလည်း အဲ့ဂိတ်ကို ဖြတ်ပြီး သွားရတာပဲ၊ အပြန်ကျမှ ဖမ်းတာ၊ ဘာကြောင့်လဲတော့ မသိဘူး၊ ၁၈ နှစ်အောက် အမျိုးသမီးတစ်ယောက်နဲ့ တခြားအမျိုးသမီးနှစ်ယောက်၊ အမျိုးသားနှစ်ယောက်အဖမ်းခံထားရတယ်၊ ကားသမားလည်း အဖမ်းခံထားရတယ်၊ အဲ့မှာက စုစုပေါင်း ၆ ယောက်ပေါ့” ဟု ဖမ်းဆီးခံထားရသူများနှင့် ဆက်စပ်သူတစ်ဦးက သျှမ်းသံတော်ဆင့်ကို ပြောသည်။
ထိုနည်းတူ ပြီးခဲ့သည့် မတ်လ ၂၂ ရက်တွင်လည်း တောင်ကြီးမြို့ပေါ်ရှိ စစ်ကောင်စီ ဆန့်ကျင်ကြောင်း ဆန္ဒပြ သပိတ်များတွင် ပါဝင်ခဲ့ဖူးသူများနှင့် စစ်ရှောင်အတွက် အလှူငွေကောက်ခံနေသူများကိုလည်း စစ်ကောင်စီ တပ်သားများက လိုက်လံဖမ်းဆီးနေကြောင်း သတင်းသိရသည်။
“တောင်ကြီးအထွေထွေသပိတ်စစ်ကြောင်းမှာ ဆန္ဒပြတုန်းက ပါဝင်ဖူးတဲ့ လူငယ်တွေ ခေါင်းဆောင်တွေကို လိုက်ရှာပြီး ဖမ်းနေလို့ ကျနော်တို့ ရှောင်နေရတယ်၊ ပြီးတော့ စစ်ရှောင်တွေကို ကူညီထောက်ပံ့ပေးဖူးတဲ့ အမျိုးသမီးတစ်ဦးကိုလည်း မတ်လ ၂၂ ညမှာ ရဲကား ၄ စီးနဲ့ ဖမ်းသွားခဲ့တယ်” ဟု ရှောင်တိမ်းနေရသည့် တက်ကြွလှုပ်ရှားသူ လူငယ်တစ်ဦးက သျှမ်းသံတော်ဆင့်ကို ပြောသည်။
လက်ရှိတွင် နိုင်ငံရေးလှုပ်ရှားမှုများ မရှိသော်လည်း အာဏာသိမ်းခါက စစ်ကောင်စီဆန့်ကျင်ကြောင်းဆန္ဒပြ သပိတ်များတွင် ပါဝင်ဖူးသည့် လူငယ်အယောက်၂၀ ကျော် ဖမ်းဆီးခံထားရပြီး ကျန်နေသည့် လူငယ်များအနေဖြင့် တိမ်းရှောင်သင့်ကြောင်း အထက်ပါ လူငယ်က ဆက်ပြောသည်။
စစ်ကောင်စီတပ်သားတို့သည် PNA များနှင့် ပူးပေါင်းပြီး လူငယ်များကို ရှာဖွေဖမ်းဆီးခြင်းများ ပြုလုပ်သည့်အပြင် ယနေ့ မတ်လ ၂၅ ရက်နေ့တွင်လည်း တောင်ကြီးမြို့ ၏ အထင်ကရနှင့် လမ်းကြိုလမ်းကြား နေရာများတွင် PNA စစ်သားနှင့် စစ်ကောင်စီစစ်သားများက စောင့်ကြပ်စစ်ဆေးနေကြောင်း သိရသည်။
လာမည့် မတ်လ ၂၇ ရက်နေ့ တပ်မတော်နေ့အတွက် လုံခြုံရေးပိုမိုတင်းကြပ်ထားခြင်း ဖြစ်သည်ဟုလည်း ဒေသခံများက ပြောဆိုနေကြသည်။
