သျှမ်းပြည်မြောက်ပိုင်း ကွတ်ခိုင်မြို့နယ်တွင် လောင်းကစားကြောင့် ပြည်သူ့စစ်နှင့် အရပ်သားတို့ ခိုက်ရန်ဖြစ်ပွားခဲ့ပြီး ပြည်သူဘက်မှ ဒဏ်ရာပြင်းထန်စွာရရှိခဲ့ကြောင်း စုံစမ်းသိရှိရသည်။
ဖြစ်စဉ်မှာ လွန်ခဲ့သည့် မတ် ၁၈ ရက် ည ၈ နာရီခွဲဝန်းကျင် ကွတ်ခိုင်မြို့ ရပ်ကွက်(၄) ရှုခင်းသာတွင် ရှိသည့် လောင်းကစားရုံတွင် ပြည်သူစစ် နှင့် ပြည်သူတို့ ရန်ဖြစ်ပွားခဲ့ပြီး ပြည်သူ့စစ်ဘက်မှ လက်နက်ဖြင့် လာရောက်ရမ်းသမ်းပစ်ခတ်ခဲ့ကြောင်း သိရသည်။
“လောင်းကစားရုံထဲကနေ ရန်ဖြစ်တာ။ ဘာကြောင့် ရန်ဖြစ်လဲတော့ မသိဘူး။ ကောင်းခါးပြည်သူ့စစ် နဲ့ ပြည်သူတို့ ရန်ဖြစ်တာ။ ကောင်းခါးပြည်သူ့စစ်ဘက်ကနေ သူတို့ လူကို ခေါ်လာပြီးတော့ သေနတ်ပစ်ဖောက်သွားတာတွေရှိတယ်။ ပြည်သူဘက်ကတော့ ဒဏ်ရာရရှိတာရှိတယ်။ သေဆုံးတာတွေတော့ မရှိဘူး။ ပြည်သူဘက်က ၂ ယောက်နဲ့ ဟိုဘက်က လူ ၈ ယောက်လောက် ရှိမယ်ထင်တယ်” ဟု မျက်မြင်တွေ့ရှိခဲ့သည့် ဒေသခံ အမျိုးသမီးတစ်ဦးက သျှမ်းသံတော်ဆင့် ကို ပြောသည်။
အဆိုပါ ရန်ဖြစ်ပွားမှုကြောင့် ပြည်သူဘက်မှ ခေါင်းကွဲဒဏ်ရာရရှိခဲ့ကြောင်း သိရသည်။
ကွတ်ခိုင်မြို့တွင် လောင်းကစားရုံ ယခင်ထက် ပိုများပြားလာပြီး ခိုးယူမှုများ၊ ဓားခုတ်မှုများ၊ ခိုက်ရန်ဖြစ်ပွားမှုများလည်း မကြာခဏ ဖြစ်ပွားနေလျက်ရှိကြောင်း သိရသည်။
လောင်းကစားရုံပေါများလာပြီး ခိုးယူမှုများပြားလာသဖြင့် ဒေသခံများက လုံခြုံမှုမရှိတော့ကြောင်း ကွတ်ခိုင်ဒေသခံ အမျိုးသမီးတစ်ဦးက ပြောသည်။
“ကွတ်ခိုင်မှာ လောင်းကစားရုံအရမ်းများတယ်။ ခိုးယူတာတွေလည်း များ၊ ရန်ဖြစ်တာတွေလည်းများတယ်။ ဟိုနေ့ကပဲ (၇၇၇၇) ရုံမှာဓားခုတ်မှုဖြစ်ခဲ့သေးတယ်။ ဆိုင်ကယ်ဆိုလည်း အပြင်မှာ ဒီတိုင်းလေး ခနဘဲထားထားတာ ပြန်လာတော့ ပျောက်သွားပြီ။ ကြောက်ရတယ်။ စိုးရိမ်စိတ်တွေနဲ့ နေထိုင်နေရတာ” ဟု ဒေသခံ အမျိုးသမီးတစ်ဦးက ထပ်မံပြောပြသည်။
ကွတ်ခိုင်မြို့နယ်တွင် စစ်တပ်က အာဏာသိမ်းပြီးနောက်ပိုင်း လောင်းကစားရုံပိုများပြားလာပြီး ပေါ်ပေါ်တင်တင် ကစားလာကြကြောင်း၊ လက်ရှိ ကွတ်ခိုင်မြို့နယ်အတွင်း လောင်းကစားရုံ ၁၁ရုံရှိ ကြောင်း သိရသည်။
အလားတူ စစ်တပ်အာဏာသိမ်းပြီးနောက်ပိုင်း သျှမ်းပြည်တဝှမ်း လောင်းကစားရုံများပြားလာခြင်း၊ မူးယစ်ဆေးဝါး သုံးစွဲသူများလာခြင်း၊ ခိုးယူလုယက်မှုများလည်း ယခင် NLD အစိုးရလက်ထက်ကထက် ပိုများပြားလာကြောင်း သိရသည်။
Leave a Comments