သျှမ်းပြည်အရှေ့ပိုင်း တာချီလိတ်မြို့သို့ စစ်ကောင်စီခန့် သျှမ်းပြည်ဝန်ကြီးချုပ် ရောက်ရှိလာမည်ဖြစ်သဖြင့် ပျံကျ စျေးသည်များ စျေးဆိုင် (၃)ရက် ပိတ်ထားရမည်ဖြစ်ကြောင်း စုံစမ်းသိရှိရသည်။
တာချီလိတ်မြို့ ရှမ်းရိုးမကွင်းအရှေ့ဘက်၊ အမှတ် (၁)နှင့် (၂)တံတား၊ ဗိုလ်ချုပ်လမ်းမကြီးတလျှောက်ရှိ အစားအသောက်ရောင်းချမည့် ပျံကျစျေးသည်များ ပိတ်ထားရမည်ဖြစ်ကြောင်း ဒေသခံအမျိုးသမီး တစ်ဦးထံမှ သိရသည်။
“မနေ့ညက ရဲတွေလည်း ရှုပ်နေတာ၊ ကျမစိတ်ထဲတောင်ပြောသေးတယ်။ ဘယ်သူလာမလဲလို့ လမ်းတွေလည်း ရှင်းနေတာပဲ။ လူတွေလည်းသိပ်မရှိဘူး။ ဆိုင်ခန်းတွေတော့ မပိတ်ရဘူး။ လမ်းဘေးစျေးသည်တွေကို ပိတ်ခိုင်းထားတာ” ဟု တာချီလိတ်ဒေသခံ ကုန်စုံဆိုင်ရောင်းသူ အမျိုးသမီး တစ်ဦးက ပြောသည်။
မတ်လ (၂၀)ရက်မှ မတ် (၂၂)ရက်ထိ (၃)ရက် ပိတ်ထားရမည်ဖြစ်သည့်အတွက် ယခုကာလသည် ရှာဖွေစားသောက်မှု ခက်ခဲနေသည့်ကြား စျေးဆိုင်များပါ ပိတ်ထားရသဖြင့် ပျံကျစျေးသည်များ အခက်ခဲများစွာ ကြုံတွေ့နေရကြောင်း ပျံကျစျေးသည် အမျိုးသမီး တစ်ဦးက ပြောသည်။
“ဒီလို ကာလမှာ အားလုံးက ခက်ခဲနေကြတယ်။ ဆိုင်တွေ ထပ်ပိတ်ရတော့ ပိုခက်ခဲသွားတယ်။ ကုန်စျေးနှုန်းတွေလည်း စျေးတက် ဆီစျေးတွေ ဘာတွေ အကုန်တက်နေတယ်” ဟု ပျံကျံစျေးသည်တစ်ဦးက ပြောသည်။
မတ်လ (၂၁)ရက်နေ့တွင် ပြုလုပ်နေသည့် တာချီလိတ်မြို့ အားကစားပွဲတော် ဖွင့်ပွဲ တက်ရောက်ရန်အတွက် စစ်ကောင်စီခန့် သျှမ်းပြည် ဝန်ကြီးချုပ် ဒေါက်တာ ကျော်ထွန်း တက်ရောက်မည်ဖြစ်ကြောင်း သိရှိရသည်။
တာချီလိတ်မြို့တွင် မတ်လ (၁၉)ရက်နေ့ ည (၁၀)နာရီဝန်းကျင်တွင် ထိုင်းနိုင်ငံသားတစ်ဦး သေနတ်ပစ်ခတ်ခံရကြောင်း သိရသည်။
တာချီလိတ်မြို့တွင် စစ်တပ်နှင့် နီးစပ်သည့် လုပ်ငန်းရှင်အများစုမှာ သေနတ်များကိုင်ဆောင်ခွင့်ရခြင်း၊ မကြာခဏ လုယက်မှုဖြစ်ပွားခြင်းနှင့် ပစ်ခတ်မှုများ ဖြစ်ပွားခဲ့သည်။
Leave a Comments