သျှမ်းပြည် မြောက်ပိုင်း ကျောက်မဲမြို့တွင် အမျိုးသမီးတစ်ဦးယနေ့ (မတ် ၁၀)ရက် မနက်ပိုင်းတွင် ကြိုးဆွဲချ သေဆုံးမှု ဖြစ်ပွားခဲ့ကြောင်း သိရသည်။
“ဘယ်အချိန်ကတည်းက သေနေလဲတော့ မသိဘူး၊ ဒီမနက် ၁၁ နာရီလောက် စျေးက ပြန်လာတော့ အိမ်က အဒေါ် ပြောပြလို့ သိရတာ၊ ကြိုးဆွဲချ သေတာတဲ့၊ မနေ့ကတောင် လင်မယားနှစ်ယောက် ဆိုင်ကယ်စီးသွားသေးတယ်၊ ဒီနေ့မှ ရုတ်တရက်ကြီး ဖြစ်သွားတာ” ဟု ၄င်းရပ်ကွက်အတွင်း နေထိုင်သည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
သေဆုံးသူမှာ အသက် ၂၈ နှစ် အရွယ် ဝန်းကျင်ရှိ အမျိုးသမီးဖြစ်ပြီး မည်သည့်ကိစ္စကြောင့် ကြိုးဆွဲချ သေဆုံးနေသည်ကို မသိရသေးပါ။
ကျောက်မဲမြို့ ရပ်ကွက် ၈ အတွင်းရှိ ထိုအင်ကြင်းတောင်တွင် ယခင်ကလည်း ကြိုးဆွဲချသေဆုံးမှု ရှိခဲ့ဖူးကြောင်း သိရသည်။
“ကျောက်မဲက ကြိုးဆွဲချသေတာ နှစ်တိုင်းကို ရှိလာတယ်၊ တစ်နှစ်မှ မလွတ်ဘူး၊ တချို့က အိမ်ထောင်ရေးကြောင့်ဖြစ်သွားတာ၊ ဆေးကြောင်တဲ့သူတွေလည်း များတယ်လေ၊ ခုချိန်က ပိုဆိုးတယ်၊ ရှာဖွေစားသောက်ဖို့ အရမ်းကို ခက်ခဲနေပြီ” ဟု အသက် ၃၅ နှစ်အရွယ် အမျိုးသမီးတစ်ဦး က ပြောသည်။
ကျောက်မဲမြို့တွင် ပြီးခဲ့သည့်နှစ်က ပန်လင်ကျေးရွာမှ မိုင်းထိလူနာ အမျိုးသားတစ်ဦး ကြိုးဆွဲချကာ ကိုယ့်ကိုယ်ကိုယ် အဆုံးစီရင်ခဲ့ကြောင်း သိရသည်။
Leave a Comments