သျှမ်းပြည်မြောက်ပိုင်း နမ္မတူမြို့နယ် ပန်လုံရွာသားကို တအာင်း (ပလောင်)အမျိုးသားလွတ်မြောက်ရေး တပ်မတော် ( TNLA ) စစ်ဗိုလ်တစ်ဦးက ဆိုင်ကယ်ဖြင့် တိုက်ပြီး သေဆုံးသွားကြောင်း စုံးစမ်းသိရသည်။

ပြီးခဲ့သည့် ဖေဖော်ဝါရီလ ၂၅ ရက် ည ၈ နာရီဝန်းကျင်တွင် ဆွေမျိုးအိမ်သို့သွားရန် နေအိမ်မှ လမ်းလျှောက် ထွက်လာသော စိုင်းအောင် အမည်ရှိ ပန်လုံရွာသားကို အရက်မူးနေသည့် TNLA စစ်ဗိုလ်က မီးမပါသည့် ဆိုင်ကယ်မောင်းလာပြီး တိုက်မိခြင်းဖြစ်သည်။

စိုင်းအောင်ကို တိုက်မိခဲ့ပြီး ဒဏ်ရာပြင်းထန်စွာရရှိသွားသည့်အပြင် ၎င်းစစ်ဗိုလ်သည် ခြေထောက်ဖြင့် ကန်ကျောက်မှုများပါ ပြုလုပ်သွားကြောင်း မျက်မြင်တွေ့ရှိသူ တစ်ဦးက သျှမ်းသံတော်ဆင့်ကို ပြောသည်။

“သူက (စိုင်းအောင်) နားမကြား၊ စကားမပြောနိုင်တဲ့သူပေါ့၊ တိုက်ပြီးပြီးချင်း ဝူးဝူးဝါးဝါးနဲ့ အော်နေချိန် အဲ့စစ်ဗိုလ်က ခြေထောက်နဲ့ ထပ်ကန်လိုက်သေးတယ်၊ ပြီးတော့ သူ့ဆိုင်ကယ်သူပြန်ထူပြီး မောင်းထွက်သွားတယ်၊ ဘေးနားကရွာသားတွေက စိုင်းအောင်ကို လာထူပြီး အိမ်ကို ပို့ပေးကြတယ်” ဟု ပန်လုံကျေးရွာ မန်ကျန်းရပ်မှ ဒေသခံတစ်ဦးက သျှမ်းသံတော်ဆင့်ကို ပြောသည်။

ယာဉ်တိုက်မှုကြောင့် စိုင်းအောင်သည် ဒူးခေါင်း၊ နောက်စေ့ နှင့် နဖူးတွင် ညိုမဲဒဏ်ရာများ ရရှိသွားသည့်အပြင် TNLA စစ်ဗိုလ်၏ ခြေထောက်ဖြင့် ကန်သွားသည့်အတွက် ဝမ်းဗိုက်တစ်လျှောက်လည်း ညှိမဲဒဏ်ရာများ ရရှိခဲ့ကြောင်း သိရသည်။

ထို့ကြောင့် ဖေဖော်ဝါရီလ ၂၆ ရက်တွင် ဗိုက်နာ၊ ခေါင်းကိုက်၊ မျက်လုံးဝေဝါးခြင်းတို့ ဖြစ်လာသဖြင့် ရွာသားများ စုပေါင်းကာ သီပေါမြို့ဆေးရုံသို့ ပို့ဆောင်ပေးခဲ့သည်။

“သူ့ကို မြို့ဆေးရုံကိုပို့ပြီး X Ray ကြည့်ပြီးတော့ ဆရာဝန်တွေက အိမ်မှာပဲ ကုဖို့ အကြံပေးတယ်။ ကျနော်တို့ သူ့ကို အိမ်ပြန်သယ်လာရတယ်၊ အိမ်ပြန်ရောက်တော့ ဆိုင်ကယ်နဲ့ တိုက်သွားတဲ့ TNLA စစ်ဗိုလ်က ပိုက်ဆံနှစ်သိန်းလာပေးတယ်၊ ဆေးဖိုးလာပေးတယ်” ဟု ပန်လုံကျေးရွာ မန်ကျန်းရပ်မှ ဒေသခံတစ်ဦးက သျှမ်းသံတော်ဆင့်ကို ပြောသည်။

TNLA စစ်ဗိုလ်သည် နောက်လိုက်ငယ်သားများနှင့်အတူ ကျေးရွာလူကြီးကို ခေါ်ယူပြီး ပိုက်ဆံ ၂ သိန်းပေးအပ်ကာ သတင်းပေါက်ကြားမှုရှိပါက အကျိုးဆက်သိရမည်ဟု ခြိမ်းခြောက် ပြောဆိုခဲ့သည်။

စိုင်းအောင်သည် TNLA စစ်ဗိုလ် ဆိုင်ကယ်ဖြင့်တိုက်သည့် ဒဏ်ရာများကြောင့် အိပ်ရာထဲတွင် ၆ ရက် လှဲနေရပြီး မတ်လ ၄ ရက်တွင် ထိုဒဏ်ရာများဖြင့် သေဆုံးသွားရကြောင်း ၎င်းနှင့် နီးစပ်သည့် ရွာသားတစ်ဦးက ပြောသည်။

“သူ့ဒဏ်ရာက အတွင်းကြေလို့ပြောပါတယ်၊ X Ray စစ်ကတည်းက မလွတ်တော့မှန်းသိလို့ ဆရာဝန်တွေက အိမ်ကို ပြန်လာခိုင်းတာလည်းဖြစ်နိုင်တယ်၊ အိမ်ပြန်ရောက်ပြီး ၇ ရက်မြောက်နေ့မှာ သူဆုံးသွားတယ်၊ သူ့သတင်းတွေ အပြင်မရောက်ဖို့ TNLA က လာပြောထားတော့ ဘယ်သူမှ အပြင်ကို မပြောရဲဘူး” ဟု အမည်မဖော်လိုသည့် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

TNLA ပြောဆို ခြိမ်းခြောက်ထားမှုကြောင့် စိုင်းအောင် စတင်ထိခိုက်ဒဏ်ရာရှိသည့်နေ့မှ ၎င်းသေဆုံးပြီးသည် အထိ ဒေသခံများက မည်သည့် မီဒီယာနှင့် အဖွဲ့အစည်းကိုမှ တိုင်တန်းခြင်း မပြုရဲကြပဲ ရေငုံနှုတ်ပိတ်နေခဲ့ရ ကြောင်း ဒေသခံများက ပြောသည်။

အဆိုပါ စိုင်းအောင်၏ ရုပ်အလောင်းကိုလည်း မတ်လ ၆ ရက်နေ့တွင် သဂြိုလ်ပြီးစီးခဲ့ပြီး ရက်လည် ဆွမ်းသွပ်သည့်နေ့တွင် ဆိုင်ကယ်ဖြင့် တိုက်သွားသည့် TNLA စစ်ဗိုလ်က နောက်ထပ်ပိုက်ဆံ ၈ သိန်း လာပေးခဲ့သည်။

“ရက်လည်တဲ့နေ့မှာ ပိုက်ဆံ ၈ သိန်း ထပ်လာပေးတယ်၊ သူများမေးလာရင် စိုင်းအောင် သေရတာ သူ့ကြောင့် မဟုတ်ဘူး၊ သူ့ဘာသာသူဆိုင်ကယ်မှောက်လို့ဖြစ်သွားတယ်ပဲ ပြောရမယ်တဲ့၊ စိုင်းအောင်က ဆိုင်ကယ်တောင် မစီးတတ်ဘူး” ဟု အထက်ပါ ဒေသခံက ပြောသည်။

နမ္မတူမြို့နယ် ပန်လုံကျေးရွာအတွင်းတွင် ပြီးခဲ့သည့်လမှာလည်း သျှမ်းအမျိုးသမီးငယ်တစ်ဦးကို TNLA တပ်သား တစ်ယောက် အလိုမတူ မတရားပြုကျင့်ခဲ့ပြီး လျော်ကြေးများဖြင့် ကြေအေးပေးရန် ပြောဆိုသည့် ဖြစ်စဥ်များ ရှိခဲ့သည်။

ပန်လုံကျေးရွာအတွင်း သွားလာလှုပ်ရှားသည့် TNLA တပ်သားများသည် ဒေသခံပြည်သူများကို မတရားဆက်ဆံ ခြင်း၊ ခေါင်းပုံဖြတ်ခြင်း၊ အခွင့်အရေးချိုးဖောက်မှုများနှင့် လက်နက်အားကိုး နိုင်ထက်စီးနှင်းမှု များစွာပြုလုပ်နေ သော်လည်း ဒေသခံများက TNLA တို့၏ ခြိမ်းခြောက်မှုကို ကြောက်သဖြင့် တိုင်တန်းပြောဆိုမှုများ မပြုရဲကြောင်း သိရသည်။

ယင်းဖြစ်စဥ်များနှင့် ပတ်သက်ပြီး တအာင်း(ပလောင်) အမျိုးသားလွတ်မြောက်ရေးတပ်မတော် TNLA တာဝန်ရှိသူ တားအိုက်ကျော် ကို အကြိမ်ကြိမ် ဖုန်းဆက်သွယ်ခဲ့သော်လည်း ဆက်သွယ်မှုမရရှိခဲ့ပေ။