သျှမ်းပြည်တောင်ပိုင်း တောင်ကြီးမြို့ပေါ်တွင် ဒလန်သတင်းပေးမှုကြောင့် လူငယ်များဖမ်းဆီးခံရကြောင်း သတင်းသိရသည်။
ပြီးခဲ့သည့် (မတ်လ ၃) ရက် ညပိုင်းတွင် တောင်ကြီးမြို့ လမ်းမတော်ရပ် စိန့်ဂျိုးဇက် ကက်သလစ် ခရစ်ယာန်ဘုရားကျောင်း လမ်းကြားထဲရှိ BH Hotel မှ ဝန်ထမ်းအားလုံးကို ရဲတပ်သားများ က ဖမ်းဆီး ခေါ်ဆောင်သွားခဲ့ပြီးနောက် တော်လှန်ရေးအဖွဲ့မှ လူငယ်များကိုလည်း သွားရောက်ဖမ်းဆီးခဲ့ကြောင်းသိရသည်။
“ဒလန်သတင်းပေးလို့ ကျွဲကြီးဒီရောက်နေတာကို ရဲတွေသိသွားတာ၊ မဟုတ်ရင်သိစရာအကြောင်းမရှိဘူး၊ သူ့ကို ဖောက်ခွဲရေးပစ္စည်းတွေနဲ့ ဖမ်းမိတာ၊ တခြားဒီဟော်တယ်ကိုလည်းရဲက အကုန်ဖမ်းသွားတယ်၊ အဲ့နောက် တော့ ဒီ့ပြင်တခြားနေရာတည်းနေတဲ့ ရဲဘော်တွေကိုလည်း ဒလန်ကလမ်းလိုက်ပြပေးတယ်လို့ ကျနော်တို့ သိရ တယ်” ဟု လူငယ် အမျိုးသားတစ်ဦးက သျှမ်းသံတော်ဆင့်ကို ပြောသည်။
HB Hotel တွင် လာရောက်တည်းခိုနေသော ကျွဲကြီးကိုဖောက်ခွဲရေးပစ္စည်းများနှင့် ဖမ်းဆီးရမိခြင်းဖြစ်ပြီး တခြားဟိုတယ်ဝန်ထမ်းများလည်း ဖမ်းဆီးခံရကာ ကျွဲကြီးအပါအဝင် ဒလန်လမ်းပြမှုဖြင့် ဖမ်းဆီးမိသည့် တော်လှန်ရေးလူငယ်နောက်ထပ် ၅ တို့ဦးကို စစ်ကြောရေးသို့ ညတွင်းချင်းပို့လိုက်ကြောင်း ၎င်းလူငယ်က ဆက်ပြောသည်။
“ဟိုတယ်ဝန်ထမ်းစုစုပေါင်း ဘယ်နှယောက်အဖမ်းခံရလဲတော့ မသိဘူး၊ ဒါပေမဲ့အဲ့ညမှာပဲ ကျွဲကြီးအပါအဝင် ကျနော့်အသိ ၆ ယောက်လုံးက စစ်ကြောရေးပို့လိုက်တယ်လို့ သတင်းကြားရပါတယ်၊ အဲ့ထဲမှာ မိန်းကလေး ၁ ယောက်ပါတယ်” ဟု အသက် ၃၀ကျော် လူငယ်အမျိုးသားတစ်ဦးက ဆိုသည်။
မတ်လ ၃ ရက်နေ့ည တစ်ညတည်းပင် ဒလန်သတင်းပေးမှုကြောင့် စစ်ကောင်စီတပ်သားတို့သည် တောင်ကြီးမြို့အနှံ့ဖြန့်ကျက်ရှာဖွေပြီး လူငယ်များစွာကို ဖမ်းဆီးသွားကြောင်း သတင်း သိရသည်။
“ကျနော်တို့သိထားတဲ့ အချက်အလက်အရက ၆ ဦးထက်မနည်းရှိနေပြီး ကျနော်တို့မသိဘဲ ဖမ်းခံရတဲ့သူတွေ လည်း ရှိနိုင်တယ်၊ ကျနော်တို့ ပြောချင်တာတော့ တော်လှန်ရေးလူငယ်တွေ ဆက်စပ်ပတ်သက်တဲ့သူတွေ သတိနဲ့ သွားလာနေထိုင်ဖို့ ပြောချင်တယ်၊ ရှောင်သင့်ရင်ရှောင်ကြပါ” ဟု အထက်ပါ လူငယ်က ထပ်လောင်းပြောသည်။
တောင်ကြီးမြို့ပေါ်တွင် တော်လှန်ရေးဆန့်ကျင် ဆန္ဒပြလှုပ်ရှားမှုများ မရှိသလောက် နည်းပါးသွားသော်လည်း စစ်ကောင်စီ လက်အောက်ခံ၊ စစ်တပ်ပိုင် နှင့် စစ်ကောင်စီနှင့် ဆက်စပ်ပသက်သည့်နေရာများကို တော်လှန်ရေးအဖွဲ့သားများက သတိပေးခြင်း ဗုံးဖြင့်ဖေါက်ခွဲခြင်းများရှိနေကြောင်းသတင်းသိရသည်။
Leave a Comments