စစ်ကောင်စီဖွင့် စာသင်ကျောင်းများ ကိုဗစ်ကူးစက်ခံရမှု တဟုန်ထိုး မြင့်တက်လာ

သျှမ်းပြည်တွင်း မြို့နယ်အများစုရှိ စစ်ကောင်စီဖွင့်လှစ်ထားသည့် စာသင်ကျောင်းများကို ကိုဗစ်ကူးစက်ခံရမှု တဟုန်ထိုး မြင့်တက်လာကြောင်း သတင်းသိရသည်။

ယနေ့ (ဖေဖော်ဝါရီ ၁၈)ရက် ကျောက်မဲမြို့ အမှတ် (၄) အခြေခံအထက်တန်းကျောင်းတွင် ကိုဗစ်ကူးစက်မှု ၁၃ ဦး တွေ့ရှိခဲ့ပြီး ယခုရက်ပိုင်း ကိုဗစ်ပိုးတွေ့ရှိသူများထဲတွင် ကာကွယ်ဆေး ထိုးထားသူများ၊ ကျောင်းသား/သူနှင့် ကျောင်းဆရာမများလည်း ပါဝင်ကြောင်း ဒေသခံများထံမှ သိရသည်။

“ကျောင်းတွေမှာ ကိုဗစ်တွေ့တာ ဟုတ်တယ်။ အထက ၄ နဲ့ အထက ၁ ကျောင်းတွေမှာ တွေ့တာ။ ကျမတို့မြို့မှာက ဒီရက်ပိုင်း ပိုးကူးတဲ့သူ အရမ်းကို များလာတယ်။ ကျောင်းသား/သူ တွေရော ၊ တခြားသူတွေလည်း ကူးစက်ခံနေရတယ်” ဟု ကျောက်မဲဒေသခံ လူငယ် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ကျောက်မဲမြို့အပြင် သီပေါမြို့နယ်တွင်းရှိ ကျောင်းတက်နေသည့် ကျောင်းသား/သူနှင့် ဆရာမများလည်း ကိုဗစ် ကူးစက်မှုရှိနေကြောင်း သိရသည်။

ယမန်နေ့က သီပေါမြို့တွင် ကိုဗစ်ကူးစက်ခံရသူ (၁၃)ဦးတွေ့ရှိခဲ့ရပြီး အမှတ် (၂) အခြေခံပညာကျောင်းမှ ဆရာမ ၂ ဦးနှင့် ကျောင်းသား/သူ ၈ ဦး ပါဝင်ခဲ့ကြောင်း၊ ထို့အပြင် ယနေ့ (ဖေဖော်ဝါရီ ၁၈)ရက်နေ့တွင်လည်း အဆိုပါကျောင်းမှ (၇)တန်း ကျောင်းသား/သူ ၇ ဦးထံ ကိုဗစ်ပိုး ထပ်မံတွေ့ရှိခဲ့ရကြောင်း သီပေါ ဒေသခံတစ်ဦးက ပြောသည်။
“အဓိကတော့ ကိုယ့်ကိုယ်ကိုယ် ပေါ့ပေါ့ဆဆ နေကြလို့ပါပဲ။ Mask မတပ်တဲ့သူတွေလည်း အရမ်းများလာတယ်။ ပြီးခဲ့တဲ့ ၂ ရက်ကပဲ အဆောင်တစ်ခုမှာ (၆)ယောက် ကိုဗစ် ပြန်တွေ့ခဲ့တာ။ မနေ့ကတော့ ထ ၂ ကျောင်းက ကျောင်းသားတွေရော၊ ဆရာမတွေရော ကိုဗစ် ထပ်တွေ့တယ်။ ၃ ရက်အတွင်းကို အယောက် ၂၀ ကျော် ကိုဗစ်တွေ့နေတာဆိုတော့ ခုချိန် ပြောချင်တာက အားလုံး စည်းကမ်းလိုက်နာကြဖို့ပဲ ပြောချင်တယ်“ ဟု သီပေါမြို့မှ လူငယ် အမျိုးသားတစ်ဦးက ပြောသည်။

ထို့အပြင် သျှမ်းပြည်တွင်း မြို့ကြီးများဖြစ်သည့် တောင်ကြီး၊ လားရှိုး၊ ကျိုင်းတုံနှင့် အခြားမြို့နယ်များတွင်လည်း ကိုဗစ် ကူးစက်မှု ပြန်လည် မြင့်တက်လာနေကြောင်း သိရသည်။

လက်ရှိ ကိုဗစ်ကူးစက်ခံရသူများသည် ယခင် ကိုဗစ်တတိယလှိုင်းအတွင်း ဖြစ်ပွားခဲ့သည့် ကိုဗစ်လက္ခဏာနှင့် ပုံစံကွဲပြားလာသည့်အတွက် အိုမီခရွန်ရောဂါ ကူးစက်ခံရတာ ဖြစ်နိုင်သည်ဟု အဆိုပါ သီပေါ လူငယ်တစ်ဦးက ဆိုသည်။

ကိုဗစ် မျိုးကွဲသစ် ဖြစ်သည့် အိုမီခရွန်သည် ရောဂါလက္ခာသည် ကူးစက်မြန်ရောဂါဖြစ်ပြီး၊ ကိုဗစ် ကာကွယ်ဆေး ကို အပြည့်အဝထိုးထားပါက ရောဂါလက္ခဏာသိပ်မပြင်းကာ သေဆုံးမှုလျော့ကျနိုင်ကြောင်း ကမ္ဘာ့ကျန်းမာရေးအဖွဲ့ (WHO)မှ ထုတ်ပြန် သတိပေးထား သည်။
သို့သော် ကိုဗစ် ကာကွယ်ဆေးထိုးထားပြီးသူများလည်း ကမ္ဘာ့ကျန်းမာရေးအဖွဲ့ (WHO)မှ ထုတ်ပြန် သတိပေးထားသည့် စည်းမျဉ်းစည်းကမ်း အရ Mask ( နှာခေါင်းစည်း) အမြဲတပ်ရန်၊ လူစုလူဝေး ရှောင်ရန် နှင့် လက်ကို မကြာခဏဆေးကြောရန် လိုအပ်ကြောင်းသိရသည်။