သျှမ်းပြည် မြောက်ပိုင်း ကျောက်မဲမြို့နယ် စစ်ရှောင် ၃ ဦး ကိုဗစ်ပိုး စစ်ဆေးတွေ့ရှိခဲ့ကြောင်း သိရသည်။
ယမန်နေ့ ဖေဖော်ဝါရီ ၁၆ ရက်တွင် ကျောက်မဲမြို့ ရပ်ကွက် ၈ ရှိ သန္ဓိသုခ ဓမ္မာရုံတွင် ရောက်ရှိခိုလှုံနေသည့် စစ်ရှောင်များထဲမှ စစ်ရှောင် ၃ ဦး ကိုဗစ်ကူးစက်ခံရကြောင်း သိရသည်။
“ရပ်ကွက် ၈ ဓမ္မာရုံမှာ နေတဲ့ စစ်ရှောင်တွေထဲက ၃ ယောက် ပိုးတွေ့တာ၊ အားလုံးကို စစ်ကြည့်တာ နေမကောင်းတဲ့သူတွေရှိလို့ စစ်လိုက်တာ” ဟု ကျောက်မဲ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ထို စစ်ရှောင်စခန်းတွင် စစ်ဘေးရှောင် ၁၀၀ ဝန်းကျင် ရှိပြီး ပြီးခဲ့သည့် ၂၀၂၁ ခုနှစ် နှစ်ကုန်ပိုင်းကတည်းက တိုင်းရင်းသားလက်နက်ကိုင်တပ်အချင်းချင်း တိုက်ပွဲဖြစ်ပွားမှုကြောင့် မြို့ပေါ်သို့ ထွက်ပြေးတိမ်းရှောင်ခဲ့ကြောင်း ဖြစ်သည်။
ကျောက်မဲမြို့နယ်တွင် ပြီးခဲ့သည့်နှစ်ကုန်ပိုင်းက ကိုဗစ်အတည်ပြုလူနာ တွေ့ရှိခြင်း မရှိခဲ့သော်လည်း ယခုနှစ်အတွင်း ဖေဖော်ဝါရီလမှ စတင်ကာ ကိုဗစ်လူနာများ ပြန်လည်တွေ့ရှိခဲ့ရပြီး ယမန်နေ့အထိ ကိုဗစ်ကူးစက်သူ ၁၀ ဦးကျော်နှင့် သေဆုံးသူ တစ်ဦး ရှိခဲ့ကြောင်း သိရသည်။
ထို့အပြင် ဒေသခံများ ကိုဗစ်စည်းကမ်း လိုက်နာမှု အားနည်းလာသည့်အပြင် မြို့တွင်းတွင် ကိုဗစ်လက္ခဏာ ဖြစ်နေသည့် ကျန်းမာရေးမကောင်းသူများလည်း ရှိနေကြောင်း ဒေသခံများက ပြောသည်။
“ကိုဗစ် လက္ခဏာနဲ့ နေမကောင်းဖြစ်နေတာလည်း တွေ့နေရတယ်၊ မစစ်ကြည့်လို့ ကိုဗစ် ရှိ မရှိ မသိတာပါ၊ တချို့ကလည်း အိုမီခရွန် ရောဂါ လက္ခဏာလိုလို ဖြစ်တယ်လို့လည်း ပြောသေးတယ်၊ ဒါပေမယ့် အတည်ပြုတာတော့ မရှိသေးဘူး၊ အပြင်သွားလာတဲ့သူတွေထဲ Mask မတပ်တဲ့သူတွေလည်း များတယ်၊ ရောဂါကူးတဲ့သူ ပိုများလာမှာကိုတော့ စိုးရိမ်တယ်” ဟု ရပ်ကွက် ၂ အတွင်း နေထိုင်သည့် ဒေသခံ အမျိုးသမီးက ပြောသည်။
စစ်ရှောင်စခန်းများတွင် ပြီးခဲ့သည့်နှစ် ကိုဗစ် တတိယလှိုင်းအတွင်း စစ်ဘေးရှောင် ရာကျော် ကိုဗစ်ကူးစက်ခံရမှုလည်း ဖြစ်ပွားခဲ့ကြောင်း သိရသည်။
