သျှမ်းပြည် မြောက်ပိုင်း ကျောက်မဲမြို့နယ်တွင် ဖေဖော်ဝါရီ ၁၅ ရက် မနက်ပိုင်းက အသက် (၁၅)ဝန်းကျင် ရှိ လူငယ်တစ်ဦး မိုင်းနင်းမိပြီး ပြင်းထန်ဒဏ်ရာ ရရှိခဲ့ကြောင်း သတင်းသိရသည်။
ပြီးခဲ့သည့် ဖေဖော်ဝါရီ ၁၅ ရက် မနက် ၉ နာရီဝန်းကျင်က မန်ခေါက်ကျေးရွာမှ ကျောက်မဲမြို့တွင်းသို့ လာစဉ် နမ့်မန်းကျေးရွာအရောက်တွင် အသက် (၁၅)နှစ်အရွယ်ရှိ အမျိုးသား လူငယ်တစ်ဦး မိုင်းနင်းမိပြီး ပြင်းထန်ဒဏ်ရာ ရရှိခဲ့ကြောင်း သိရသည်။
“သူတို့ မန်ခေါက်ရွာကနေ ဆင်းလာတာလို့ ပြောတယ်၊ နမ့်မန်းရွာ တံတားနားရောက်တော့ သူတို့ထဲက တစ်ယောက်က လမ်းဘေးမှာ အပေါ့သွားတာတဲ့၊ အဲ့ချိန်မှာ မိုင်းနင်းမိတာပဲ၊ ဒဏ်ရာတော့ တော်တော်ပြင်းတယ်လို့ ကြားတယ်၊ လားရှိုးကို ပို့ထားရတယ်” ဟု ကျောက်မဲဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
မိုင်းပေါက်ကွဲမှုကြောင့် ထိုလူငယ်အမျိုးသားသည် ခြေထောက်၊ လက်၊ ရင်ဘက်နှင့် မျက်စိတို့တွင် ဒဏ်ရာ ရရှိခဲ့ပြီး လားရှိုးဆေးရုံသို့ ပို့ဆောင် ကုသနေကြောင်း သိရသည်။
ထို နမ့်မန်းကျေးရွာအနီးပတ်ဝန်းကျင်တွင် မိုင်းနင်းမိမှု မကြာခဏ ဖြစ်ပွားသည့်အတွက် သွားလာမှုမပြုကြရန် ဒေသခံများမှ တားမြစ်ထားကြောင်းသိရသည်။
“နမ့်မန်းအနီးနားကို ဘယ်သူမှ မသွားကြဖို့ ပြောထားဖူးတယ်။ အဲ့နားက ခဏခဏ မိုင်းကွဲတာဖြစ်နေတော့ စိတ်မချရဘူး။ လုံခြုံမှု မရှိတော့ဘူး။ အရင်နှစ်က ငှက်ပျောဖူး ဆင်းခူးတာ မိုင်းနင်းမိပြီး သေဆုံးတာရှိခဲ့လို့ အဲ့ဖက်ကို မှိုရှာ၊ မျှစ်ချိုးတာတွေလည်း မလုပ်ဖို့ တားမြစ်ထားတယ်” ဟု ဒေသခံ အမျိုးသားတစ်ဦးက ပြောသည်။
ပြီးခဲ့သည့် ဖေဖော်ဝါရီ ၇ ရက်တွင်လည်း ဟူးကွက်ဒေသခံ အမျိုးသား ၃ ဦး မိုင်းနင်းမိကာ လူငယ် ၂ ဦး ပွဲချင်းပြီး သေဆုံးခဲ့ပြီး၊ တစ်ဦး ဒဏ်ရာရရှိခဲ့ကြောင်း သိရသည်။
ထို မိုင်းကွဲမှု ဖြစ်ပွားသည့် နေရာသည် ယခင်နှစ်တွေတုန်းက တိုင်းရင်းသာလက်နက်ကိုင်များဖြစ်သည့် မြောက်ပိုင်းမဟာမိတ်တပ်ပေါင်းစု နှင့် RCSS တို့ တိုက်ပွဲဖြစ်ပွားခဲ့ဖူးသည့်နေရာများ ဖြစ်ကြောင်း သိရသည်။
Leave a Comments