သျှမ်းပြည်တောင်ပိုင်း ဟဲဟိုးမြို့ လျှပ်စစ်ရုံး ဗုံးခွဲ တိုက်ခိုက်ခံရမှုနှင့် ပတ်သက်ပြီး စစ်ကောင်စီတပ်သားများက အနီးပတ်ဝန်းကျင် CCTV များမှတစ်ဆင့် ပြုလုပ်သူကို ပိုက်စိပ်တိုက် ရှာဖွေမှုများ ပြုလုပ်နေကြောင်း စုံစမ်းသိရသည်။
ယမန်နေ့ (ဖေဖော်ဝါရီ ၁၄)ရက်တွင် ဟဲဟိုးမြို့မှ ဘော်ဆိုင်းသို့သွားသည့် လမ်းဆုံ၏ အရှေ့ဘက်တွင်ရှိသော လျှပ်စစ်မီတာရုံး ဗုံးခွဲတိုက်ခိုက်ခံရပြီးနောက် စစ်ကောင်စီတပ်သည် အနီးပတ်ဝန်းကျင် CCTV မှတဆင့် ခြေရာခံနေကြောင်း ဒေသခံများက ပြောသည်။
“ဖြစ်ပွားတဲ့ အချိန်ကတော့ နေ့လည် ၁၂ နာရီဝန်းကျင်မှာပေါ့၊ CCTV ကနေ ကြည့်ပြီး ပြုလုပ်သူ လူငယ်တွေကို ခြေရာခံနေတယ် လို့ ကြားရပါတယ်၊ အဲ့လမ်းဆုံမှာ CCTV ရှိတယ်၊ ပြီးတော့ ပတ်ဝန်းကျင်အိမ်တွေမှာလည်း CCTV ရှိတယ်” ဟု ဟဲဟိုးမြို့ခံ တစ်ဦးက သျှမ်းသံတော်ဆင့်ကို ပြောသည်။
ဟဲဟိုး EPC ရုံးကို ဗုံးဖောက်ခွဲတိုက်ခိုက်မှု ပြုလုပ်သည့် အဖွဲ့သည် မည်သည့် အဖွဲ့အစည်းဖြစ်ကြောင်း မသိရသော်လည်း CCTV မှ မှတ်တမ်းတင်ထားသော ပုံရိပ်များအရ စစ်ကောင်စီတို့က လိုက်လံရှာဖွေနေသည့်အတွက် ဆက်စပ်ပတ်သက်သူများ ရှောင်တိမ်းသင့်ကြောင်း ဒေသခံများက ပြောသည်။
“ CCTV တွေရှိနေတော့ ရဲတွေ စစ်သားတွေလည်း ပြုလုပ်တဲ့သူကို သိသွားတာ၊ ဒါကြောင့် လုပ်တဲ့သူတွေ ရှောင်သင့်ပါတယ်၊ ပြီးတော့ မစ်ရှင်တစ်ခု မစခင် လုံခြုံရေးတွေ ဘယ်လို ရှိမလဲဆိုတာ ထည့်စဥ်းစားဖို့ လိုတာပေါ့နော်၊ အခုလိုဆို CCTV တွေ အရင်ဖျက်သင့်တယ်” ဟု ဟဲဟိုးမြို့မှ CDM အမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်တပ်မှ နိုင်ငံတော် အာဏာသိမ်းပြီးနောက်ပိုင်းတွင် စစ်အာဏာရှင် ဆန့်ကျင်တော်လှန်ရေး လှုပ်ရှားသူများအဖွဲ့သည် အစိုးရ ဌာနဆိုင်ရာများနှင့် စစ်ကောင်စီလက်အောက်ခံ ဆက်စပ်ပတ်သက်သည့် နေရာများကိုလည်း တိုက်ခိုက်မှုများ ပြုလုပ်လာကြကြောင်း သိရသည်။
