သျှမ်းပြည်မြောက်ပိုင်း မိုးမိတ်မြို့ မှ စစ်ကောင်စီ တပ်သားများသည် ဆိုင်ကယ်မောင်းနှင်လာသည့် လူငယ်နှစ်ဦးကို သေနတ်ဖြင့် ပစ်လိုက်သည့်အတွက် လူငယ်တစ်ဦး ပွဲချင်းပြီးသေဆုံးသွားကာ ကျန်တစ်ဦးက ဒဏ်ရာရရှိသွားကြောင်း သတင်းသိရသည်။
ပြီးခဲ့သည့် ဖေဖော်ဝါရီလ ၁ ရက်နေ့ ည ၉ နာရီဝန်းကျင်တွင် မိုးမိတ်မြို့ ဟော်နန်းရပ်ကွက်ရှိ စစ်ကောင်စီ ၏ စစ်ဆေးရေးဂိတ်ကို လူငယ် (၂)ဦးက ဆိုင်ကယ်ဖြတ်မောင်းသဖြင့် သေနတ် ၄ ချက် ပစ်လိုက်ကြောင်း ဒေသခံများက သျှမ်းသံတော်ဆင့်ကို ပြောသည်။
“သေနတ်သံ လေးချက်ကြားလိုက်ရတယ်၊ တစ်ယောက်က ပွဲချင်းပြီး သေသွားတယ်၊ နောက်တစ်ယောက်က ပြင်းထန်စွာ ဒဏ်ရာရသွားလို့ ဆေးရုံကို စစ်ကောင်စီတပ်သားတွေကပဲ ပို့ပေးလိုက်တာ၊ သေတဲ့သူကိုလည်း စစ်တပ်က ယူသွားတာ” ဟု အမည်မဖော်လိုသည့် မိုးမိတ်မြို့ ဒေသခံတစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ ပစ်ခတ်မှုများဖြစ်ပွားပြီးနောက် အဆိုပါ လူငယ်နှစ်ဦးထံတွင် မူးယစ်ဆေးဝါးတွေ့ရှိသည့်အတွက် သေနတ်ဖြင့် ပစ်ခတ်လိုက်ရသည်ဟု သတင်းဖြန့်ဝေခဲ့ကြောင်း ဒေသခံများက ပြောသည်။
လက်ရှိတွင် အဆိုပါ ဒဏ်ရာရသွားသော လူငယ်ကို တပ်ဆွယ်ဆေးခန်းတွင် ကုသမှုပေးရာမှတဆင့် မိုးမိတ်မြို့နယ်ရှိ ကြာအင်းဆေးရုံသို့ ပြောင်းရွှေ့ ကုသထားကြောင်း ဒေသခံများက ပြောသည်။
“ဆေးရုံက တစ်ယောက်က မိသားစုဝင်တွေနဲ့ တွေ့ခွင့်မရှိသေးဘူးလို့သိရတယ်၊ စစ်ကောင်စီတွေက သူတို့နှစ်ဦးကို မူးယစ်ဆေးဝါးတွေ့လို့ ပစ်လိုက်တာဆိုတာနဲ့ သတင်းဖုံးချင်နေတာ၊ တကယ်တော့ ဒီလူငယ်နှစ်ဦးက အဲ့လိုလူတွေ မဟုတ်ဘူး” ဟု ဒေသခံတစ်ဦးကလည်း ပြောပြထားသည်။
စစ်ကောင်စီတို့၏ သေနတ်ဖြင့် ပစ်ခတ်ခြင်းကို ခံရသည့် လူငယ်နှစ်ဦးသည် ကချင်လူမျိုးများဖြစ်ကြပြီး မူးယစ်ဆေးဝါးနှင့် ကင်းစင်ကြောင်း ဒေသခံများက ပြောသည်။
ပြီးခဲ့သည့် ဇန်နဝါရီလ ၂၆ ရက်နေ့မှာလည်း မိုးမိတ်မြို့တွင်းရှိ KBZ ဘဏ်ရှေ့တွင် စောင့်နေသည့် စစ်ကောင်စီ တပ်သားတို့က ဆိုင်ကယ်မောင်းနှင်လာသော အမျိုးသမီးနှင့် ကလေးငယ်တစ်ဦးကို ဒဏ်ရာရသည်အထိ သေနတ်ဖြင့် ပစ်ခတ်ခဲ့ကြောင်းလည်း သတင်းသိရသည်။
Leave a Comments