အသက်မပြည့်သေးသည့် မုဒိမ်းမှု လျော်ကြေး ၁၀ သိန်း နှင့် TNLA တပ်သား ထောင် ၃ နှစ် ချခံရ

သျှမ်းပြည်မြောက်ပိုင်း နမ္မတူမြို့နယ် ပန်လုံကျေးရွာတွင် TNLA တပ်သားမှ အသက်မပြည့်သေးသည့် မိန်းကလေးကို အဓမ္မပြုကျင့်ခဲ့ပြီး ကျူးလွန်ခံရသူကို လျော်ကြေး ၁၀ သိန်း နှင့် TNLA တပ်သားကို ထောင်ဒဏ် ၃ နှစ် ချလိုက်ကြောင်း စုံစမ်းသိရသည်။

ပြီးခဲ့သည့် ဇန်နဝါရီလ ၂၃ ရက်နေ့တွင် အိုက်ထွေးအမည်ရှိ TNLA တပ်သားမှ နမ္မတူမြို့နယ် ပန်လုံကျေးရွာတွင် နေထိုင်သည့် အသက် ၁၅ နှစ် အရွယ် မိန်းကလေးကို အဓမ္မပြုကျင့်ခဲ့ပြီး ကျူးလွန်ခံရသူကို TNLA ဘက်မှ လျော်ကြေးငွေ ၁၀ သိန်း ပေးကာ ကျူးလွန်သူ TNLA တပ်သားကို ထောင် ၃ နှစ် ချလိုက်ကြောင်း ဒေသခံများပြောပြချက်အရ သိရသည်။

အဓမ္မပြုကျင့်မှု စတင်ဖြစ်ပွားစဉ်တွင် TNLA ဘက်မှ လျော်ကြေးငွေ ၃ သိန်းသာ ကျေအေးခိုင်းကြောင်း၊ သို့သော် ရွာလူကြီးနှင့် ကာယကံရှင်မှ လက်မခံသဖြင့် နမ္မတူမြို့ အတွင်းမှ သျှမ်းပြည်တိုးတက်ရေးပါတီ၊ သျှမ်းပြည်တပ်မတော် SSPP/SSA ကို တိုင်တန်းပြောဆိုပြီး လျော်ကြေးငွေ ၁၀ သိန်းနှင့် အဆိုပါ စစ်သားကို ထောင်ဒဏ်သုံးနှစ် ချမှတ်အပြစ်ပေးခံမည်ဟု TNLA က အကြောင်း ပြန်ခဲ့ကြောင်း ဒေသခံများက ပြောသည်။

ယင်းကိစ္စရပ်များနှင့် ပတ်သက်ပြီး SSPP/SSA ပြောရေးဆိုခွင့်ရှိသူ ဗိုလ်မှူး စိုင်းသန်းအောင်က “ကျနော်တို့လူက သူတို့ အမှု ဆုံးဖြတ်တဲ့နေ့မှာ တက်ရောက်ခဲ့ပါတယ်၊ ကျူးလွန်သူကို ဒဏ်ငွေ ၁၀ သိန်းနဲ့ ထောင်ဒဏ် ၃ နှစ်ချမှတ်ပြီး ကာယကံရှင်ဘက်ကလည်း ကျေအေးသွားပါပြီ” ဟု သျှမ်းသံတော်ဆင့်ကို ပြောသည်။

အဆိုပါ အဓမ္မပြုကျင့်သည့် TNLA တပ်သားကို တပ်တွင်းအကျဥ်းထောင်တွင် ထားရှိပြီး နှစ်ဦးနှစ်ဘက်ကလည်း ကျေအေးမှုများရှိပြီးဖြစ်သည့်အတွက် စိတ်ပူစရာများမရှိကြောင်း ဗိုလ်မှူး စိုင်းသန်းအောင်က ပြောသည်။

သျှမ်းပြည်အတွင်း လက်နက်ကိုင်အဖွဲ့အစည်း များပြားနေပြီး စစ်ပဋိပက္ခနှင့် တိုက်ပွဲများလည်း ဖြစ်ပွားနေသည့်အတွက် အမျိုးသမီးများ၏ လိင်ပိုင်းဆိုင်ရာ အကြမ်းဖက်ခံရမှုများနှင့် လုံခြုံရေးအတွက် စိုးရိမ်ရကြောင်း သျှမ်းအမျိုးသမီး လှုပ်ရှားသူ တစ်ဦးက သျှမ်းသံတော်ဆင့် ပြောသည်။

“သျှမ်းပြည်မြောက်ပိုင်းနဲ့ တောင်ပိုင်းမှာ အမျိုးသမီးတွေရဲ့ လုံခြုံရေးအတွက် အင်မတန် စိုးရိမ်ရတယ်။ ဘာလို့ လဲဆိုတော့ လက်နက်ကိုင်အဖွဲ့အစည်းတွေ တပ်သားတွေလည်း တိုးများလာတယ်။ ဒီစစ်ပဋိပက္ခတွေ တိုက်ပွဲတွေဖြစ်နေသေးသရွေ့တော့ ဒီလူ့အခွင့်အရေးချိုးဖောက်မှုတွေက ပိုပြီး ဆိုးရွားလာတယ်။ လိင်ပိုင်းဆိုင်ရာ အကြမ်းဖက်မှုတွေ ပိုမိုများပြားလာမှာကို စိုးရိမ်ရတယ်” ဟု အထက်ပါ အမျိုးသမီးက ပြောသည်။

စစ်ပဋိပက္ခများနှင့် တိုက်ပွဲများဖြစ်ပွားသည့်နေရာများတွင် ဖြစ်ပွားသည့် လက်နက်ကိုင်တပ်ဖွဲ့တို့၏ အတင်း အဓမ္မ ပြုကျင့်ခြင်းနှင့် လူ့အခွင့်အရေး ချိုးဖောက်ခံရသည့် ဖြစ်စဥ်များသည် တရားမျှတမှုရရှိဖို့ထက် ကျူးလွန်ခံရသူ လုံခြုံရေးကို ပြန်လည်စိုးရိမ်နေရကြောင်းလည်း ၎င်းကထပ်လောင်း ပြောသည်။

“လက်ရှိအခြေအနေမျိုးမှာ တရာမျှတမှုရဖို့ မပြောနဲ့ ကိုယ်က ကျူးလွန်ခံရတယ် ဆိုတာတောင်မှ လုံခြုံရေးအရ စိုးရိမ်ရတယ်။ လက်နက်ကိုင်အဖွဲ့အစည်းထဲက အမျိုးသမီးအပေါ် လိင်ပိုင်းဆိုင်ရာ အကြမ်းဖက်မှုတွေ မုဒိမ်းမှုတွေကို ကာကွယ်တားဆီးနိုင်ဖို့အတွက်ဆိုရင် လက်နက်ကိုင်အဖွဲ့အစည်းက Code of Conduct တွေ လိုက်ကို လိုက်နာရမယ်လို့ ကျမအနေနဲ့ ပြောချင်ပါတယ်” ဟု ၎င်းကပြောသည်။

လက်ရှိစီရင်ဆုံးဖြတ်သွားသည့် နမ္မတူ ပန်လုံကျေးရွာ ဖြစ်စဥ်များနှင့် ပတ်သက်ပြီး TNLA ပြောရေးဆိုခွင့်ရှိသူနှင့် တာဝန်ရှိသူများကို အကြိမ်ကြိမ် ကြိုးစားဆက်သွယ်ခဲ့သော်လည်း ဆက်သွယ်နိုင်ခြင်းမရှိပါ။

အဓမ္မပြုကျင့်မှုနှင့် ပတ်သက်ပြီး ပြစ်ဒဏ်ချမှတ်သည့်နေရာမှာ ထောင်ဒဏ် ဘယ်နှစ်နှစ် စသည်တို့ မရှိကြောင်း၊ အဓမ္မမှု ကျူးလွန်သည့်သူကို ထိုက်သင့်သည့် ပြစ်ဒဏ်ပေးသင့်ကြောင်း တအာင်း အမျိုးသမီး အဖွဲ့အစည်း (TWO ) မှ ပြောရေးဆိုခွင့်ရှိသူ တစ်ဦးက သျှမ်းသံတော်ဆင့်ကို ပြောသည်။

လက်ရှိ ပဋိပက္ခတွေကြားတွင် ပြည်သူလူထုများ အဘက်ဘက်ကနေ လူ့အခွင့်အရေး ချိုးဖောက်မှုများစွာ ကျူးလွန်ခံနေရပြီး လူ့အခွင့်အရေးချိုးဖောက်မှုများ လျော့နည်းသွားစေရန် အတတ်နိုင်ဆုံး သတင်းများ ကောက်ယူခြင်းနှင့် တခြားမဟာမိတ်အဖွဲ့နှင့် ပူးပေါင်းဆောင်ရွက်နေကြောင်းလည်း TWO အဖွဲ့က ပြောဆိုလိုက်သည်။

ဆက်လက်ပြီး TWO မှ တာဝန်ရှိသူတစ်ဦးက “ကျမတို့အနေနဲ့ ပြောချင်တာက မည်သည့် လက်နက်ကိုင်မဆို မည်သည့်အဖွဲ့အစည်းမဆို လူ့အခွင့်အရေး ချိုးဖောက်မှု အပါအဝင် အမျိုးသမီးတွေအပေါ် ကျူးလွန်မှုတွေကို ရပ်တန့်ပေးပါ၊ မည်သည့်အဖွဲ့အစည်းမဆို အမျိုးသမီးအပေါ် ကျူးလွန်တာကို ကျမတို့အနေနဲ့ လက်မခံဘူး” ဟု တောင်းဆိုလိုက်သည်။