သျှမ်းပြည်တောင်ပိုင်း ကျိုင်းတောင်းမြို့တွင် သင်္ကန်းခြုံ ဘုန်းကြီးဟန်ဆောင်ပြီး ပြည်သူများကို လိုက်သတ်မည်ဟု လိုက်လံခြိမ်းခြောက်နေသည် ဟု သတင်းရရှိသည်။
အဆိုပါ သင်္ကန်းခြုံ ဘုန်းကြီးဟန်ဆောင်ထားသူထံတွင် ဓား၊ ဂွ၊ ကျောက်ခဲများ တွေ့ရှိရကြောင်း၊ ဒေသခံပြည်သူများ၏ နေအိမ်ကို ညအချိန်တွင် ကျောက်ခဲနဲ့လိုက်လံပစ်ခတ်နေလျက်ရှိကြောင်း ကျိုင်းတောင်းမြို့နေထိုင်သူများထံ သိရသည်။
“ ဘုန်းကြီးက ဘုန်းကြီးအတုဖြစ်တယ်။ အရင်ညတွေက ညညဆိုရင် နေအိမ်ကို ကျောက်ခဲနဲ့လိုက်ပစ်နေတာ။ အဲတုန်းကတော့ ဘယ်သူပစ်တာလဲ မသိဘူး။ အခုမှ သိရတာ အဲဘုန်းကြီးက လိုက်ပစ်နေတာ။ သူမှာ ဓား၊ ကျောက်ခဲ၊ လေးဂွကော ရှိထားတယ်။ ပြီးတော့ အကုန်လုံးလိုက်သစ်ပစ်မယ်လို့လည်း ခြိမ်းခြောက်နေတာ” ဟု ကျောက်တောင်းမြို့ ဒေသခံ အမျိုးသားတစ်ဦးက ပြောသည်။
ထိုဘုန်းကြီးအတုသည် ပြည်သူများ၏ လုံခြုံရေးကို ထိခိုက်လာသောကြောင့် ဒေသခံများက ဝိုင်းဝန်ပြီး ဖမ်းဆီးခဲ့ သော်လည်း ကျိုင်းတောင်းရဲစခန်း က သင်္ကန်းဝတ်ထားသည့်သူဖြစ်သဖြင့် ပြန်လည်လွှတ်ပေးလိုက်ကြောင်း လည်း ကျိုင်းတောင်းဒေသခံ များကပြောသည်။
“ ၅ရက်နေ့က သူ့ကို ရပ်ကွက်ထဲက ပြည်သူတွေနဲ့ ရဲတွေပေါင်းပြီး ဖမ်းမိတယ်။ ဒါပေမယ့် ရဲတွေ က သင်္ကန်းဝတ်တယ်ဆိုပြီး ပြန်လွှတ်ပေးလိုက်တာ။ နောက်ကျိုင်းတောင်း ဘက်ကို ပြန်မလာနဲ့လို့ ပြောပြီးလွှတ်လိုက်တယ်” ဟု ကျိုင်းတောင်းဒေသခံ အသက် ၃၀ ကျော် လူငယ် တစ်ဦးက ပြောသည်။
သင်္ကန်းခြုံထားသည့် ဘုန်းကြီး အတုကို ကျိုင်းတောင်းမြို့ မှ ပြန်လွှတ်ပေးလိုက်သော်လည်း တခြားနယ်မြေအတွင်းသို့ သွားရောက်က ပြည်သူများကို ဒုက္ခပေးမည်ကို စိုးရိမ်ကြောင်းလည်း လူငယ်က ထပ်လောင်းပြောသည်။
စစ်အာဏာသိမ်းပြီးနောက်ပိုင်း မြန်မာနိုင်ငံ နည်းတူ သျှမ်းပြည်နယ်တွင်လည်း သင်္ကန်းခြုံထားသည့် ဘုန်းကြီး အတု များပြားလာကြောင်း၊ ထိုကိစ္စကို သက်ဆိုင်ရာမြို့နယ် သံဃာ နာယက အဖွဲ့မှ တာဝန်ယူ မဖြေရှင်းပါက နောင်တချိန်တွင် သာသနာ ညိုးနွမ်းသွားနိုင်ကြောင်းလည်း သျှမ်းတောင် ပင်လုံမြို့ မှ မွေတော်ကျောင်းဆရာတော် တပါးက မိန့်ကြားသည်။
“ ဒါတော့ သက်ဆိုင်ရာ မြို့နယ်တာဝန်ရှိသူတွေကဖြေရှင်းပေးသင့်တယ်။ ဒီလိုမျိုး ဘုန်းကြီးအတု ရှိလာတာက ဿာသနာတွေကို ညှိုနွမ်းသွားစေနိုင်တယ်။ တွေ့မိ၊ ဖမ်းမိတယ်ဆိုရင် လူလည်ဝတ်ပေးပြီးတော့ ရဲတွေလက်ထဲအပ်ပေးသင့်တယ်” ဟု ပင်လုံမြို့ မွေတော်ကျောင်းဆရားတစ်ပါးက မိန့်ကြားသည်။
သင်္ကန်းခြုံ ပြီး ဘုန်းကြီး ဟန်ဆောင်ထားသည့် သူသည် ယခင်ကလည်း ခိုလမ်မြို့ နှင့် နမ့်စန်မြို့တွင်ရှိ ပြည်သူများကို အသက် အန္တရာယ်အထိ ခြိမ်းခြောက်ခဲ့ဖူးကြောင်း သိရသည်။
