သျှမ်းပြည်မြောက်ပိုင်း နမ့်ခမ်း ဈေးအတွင်းသို့ ယနေ့ (ဇန်နဝါရီ ၅)ရက် မနက် ၈ နာရီ ဝန်းကျင်တွင် စစ်ကောင်စီတပ်သား ထပ်မံရောက်လာသဖြင့် ပြည်သူများက စိုးရိမ်ထိတ်လန့်နေကြကြောင်း သတင်းသိရသည်။
ယမန်နေ့ (ဇန်နဝါရီလ ၄)ရက် မနက်ပိုင်းတွင်လည်း တအာင်း(ပလောင်)အမျိုးသားလွတ်မြောက်ရေးတပ်မတော် (TNLA) တပ်သား အများအပြားရောက်လာခဲ့ပြီး ယနေ့ မနက်ပိုင်းတွင် စစ်ကောင်စီတပ်သားများ ယူနီဖောင်းနှင့် လက်နက် အပြည့်အစုံ ကိုင်ဆောင်ပြီး နမ့်ခမ်းမြို့မဈေးထဲသို့ ထပ်မံ ရောက်ရှိလာသည်။
နှစ်ရက် ဆက်တိုက် လက်နက်ကိုင်တပ်ဖွဲ့များ နမ့်ခမ်းမြို့မစျေးသို့ အင်အားအများအပြားဖြင့် ရောက်လာသည့်အတွက် စျေးသည်များ စိုးရိမ်ထိတ်လန့်နေရကြောင်း သိရသည်။
“သူတို့(စကစ)က ဘာလို့ရောက်လာမှန်းမသိပေမဲ့ မနေ့ကလည်း TNLA တွေ လာသွားတော့ ပြည်သူတွေက စစ်သားတွေ စစ်ယူနီဖောင်းတွေ မြင်တာနဲ့ လန့်နေကြပြီ၊ ဒီနေ့ စစ်ကောင်စီတပ်သားတွေလည်း ထပ်မြင်တော့ ဈေးထဲကသူတွေ ဆိုင်သိမ်းကြပြန်ပြီ” ဟု နမ့်ခမ်းမြို့မှ ဒေသခံတစ်ဦးက သျှမ်းသံတော်ဆင့်ကို ပြောသည်။
ယမန်နေ့တွင် လက်နက်များကိုင်ဆောင်ထားသည့် TNLA အဖွဲ့တို့က အင်အား အလုံးအရင်းဖြင့် နမ့်ခမ်းမြို့မဈေးရှိ ဈေးဆိုင်များထံ ၃ ရက်အတွင်း ဆက်ကြေးပေးသွင်းဖို့ လိပ်စာကဒ်များ လာရောက်ပေးဝေခဲ့သည်။
“မနေ့က TNLA စစ်သားတွေ နမ့်ခမ်းဈေးပတ်လည်ဝိုင်းထားပြီး ဈေးထဲမှာရှိတဲ့ ဈေးဆိုင်တွေကို ဆက်ကြေး ပေးဖို့ဆိုပြီး လိပ်စာကဒ်တွေ ဝေသွားတယ်။ လိပ်စာကဒ်ပေးထားတဲ့ ဆိုင်တွေ (၃)ရက်အတွင်း ငွေသွင်းရမယ်လို့ ပြောသွားတယ်။ ဒီနေ့လည်း ဗမာစစ်သားတွေ ထပ်တွေ့လို့ ပြည်သူတွေ ဆိုင်သိမ်းရပြန်ပြီ” ဟု အမည်မဖော်လိုသူ နမ့်ခမ်းဒေသခံ တစ်ဦးမှ ထပ်လောင်းပြောပြသည်။
ယနေ့ ဖေဖော်ဝါရီလ (၅)ရက်နေ့တွင် စစ်ကောင်စီတပ်သားများအား မြင်တွေ့ရခြင်းနှင့် TNLA အဖွဲ့များ ထပ်မံရောက်လာမည်ကို စိုးရိမ်ခြင်းတို့ကြောင့် ဈေးသည်များ ထိတ်လန့်ပြီး ရောင်းကုန်များကို သိမ်းနေကြကြောင်း သိရှိရပါသည်။
ယမန်နေ့ TNLA လက်နက်ကိုင်တပ်ဖွဲ့များ စျေးအတွင်းသို့ ရောက်လာပြီး အခွန်ကတ် လာရောက်ဝေ နေချိန် စစ်ကောင်စီ တပ်ဖွဲ့ဝင်များနှင့် သက်ဆိုင်ရာ အဖွဲ့အစည်းများ နမ့်ခမ်းမြို့ထဲသို့ ရောက်မလာခြင်းကလည်း နမ့်ခမ်းဒေသခံများ စဉ်းစားစရာဖြစ်နေကြောင်း ပြောဆိုလာသည်။
” မနေ့က TNLA လာတော့ စကစ တပ်တွေ ရောက်မလာဘူး။ လုံခြုံရေး လို့ပြောတဲ့ရဲကလည်း ရောက်မလာဘူး။ ဒီနေ့ကျမှ စကစ လူတွေ ရောက်လာတာ ထူးဆန်းတယ်။ မနေ့က လာရင် ထိတွေ့မှုဖြစ်မှာဆိုးလို့လားမသိဘူး” ဟု နမ့်ခမ်း ဒေသခံ အမျိုးသား တစ်ဦးက ပြောသည်။
လက်ရှိ နမ့်ခမ်းပြည်သူတို့သည် စစ်သားနှင့် ယူနီဖောင်း မြင်တိုင်း ကြောက်ရွံ့တုန်လှုပ်သည့် စိတ်ဒဏ်ရာများဖြင့် နေ့ရက်တိုင်းကို လုံခြုံမှုကင်းမဲ့စွာ ဖြတ်သန်းနေရကြောင်းလည်း ဒေသခံများက ပြောသည်။
Leave a Comments