မုဒိမ်းကျင့်မှုခံရသည့် သျှမ်းပြည်မြောက်ပိုင်း နမ္မတူမြို့နယ် ပန်လုံကျေးရွာက အသက် ၁၅ နှစ် အရွယ် အမျိုးသမီးငယ်သည် ပိုးသတ်ဆေးသောက်ပြီး သေကြောင်းကြံရန် ကြိုးစားခဲ့ကြောင်း စုံစမ်းသိရသည်။
ပြီးခဲ့သည့် ဇန်နဝါရီ ၂၃ ရက်တွင် နမ္မတူမြို့နယ် ပန်လုံကျေးရွာနေ အသက် (၁၅)နှစ် အရွယ်ရှိ အမျိုးသမီးငယ် နှင့် TNLA တပ်သား တစ်ဦးသည် လူငယ်ချင်း ချစ်ကြိုက်ခဲ့ဖူးကြပြီး၊ အမျိုးသမီးငယ်၏ မိသားစုဝင်များ နေအိမ်တွင် မရှိစဉ် လာရောက်လည်ပတ်ခဲ့ကာ မုဒိမ်းကျင့်လိုက်ကြောင်း ၎င်းအမျိုးသမီးနှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။
“အရင်ကလည်း ဒီစစ်သား (TNLA တပ်သား)က ဒီအိမ်ကို ဝင်ထွက်သွားလာမှုရှိပါတယ်၊ လူငယ်ချင်းလည်း ရင်းနှီးနေတယ်ပေါ့၊ အဲ့နေ့ (ဇန်နဝါရီလ ၂၃ ) မနက် ၉ ခွဲဝန်းကျင် အဲ့တပ်သားက အိမ်လာလည်တယ်၊ အိမ်မှာ လူကြီးတွေလည်းမရှိတော့ ကောင်မလေးကို မုဒိမ်းကျင့်သွားခဲ့တယ်” ဟု နီးစပ်သူ တစ်ဦးက ဆိုသည်။
အမျိုးသမီးငယ်နှင့် TNLA စစ်သားတို့သည် ချစ်သူဖြစ်ခဲ့ဖူးသော်လည်း အလိုမတူသဖြင့် လာရောက်အဓမ္မပြုကျင့် သည့် TNLA စစ်သားအား ကန်ကျောက်ငြင်းဆိုခဲ့ပြီး အိမ်နီးချင်းများလာရောက်ကူညီကာ TNLA တပ်သားကို ဖမ်းဆီးနိုင်ခဲ့သည်။
“ကလေးမက အလိုမပါလို့ အော်တာလေ။ အိမ်နီးချင်းတွေက အော်သံကြားလို့ လာကြည့်ကြတာ။ အဲ့ခါကျမှ မုဒိမ်းကျင့်ခံရမှန်းသိတာ။ အိမ်နီးချင်းတွေက စစ်သားကို ဝိုင်းဖမ်းလိုက်ကြတယ်” ဟု အိမ်နီးချင်း တစ်ဦးက သျှမ်းသံတော်ဆင့်ကို ပြောသည်။
အမျိုးသမီးငယ်ကို မုဒိမ်းကျင့်သည့် TNLA စစ်သားကို ရွာသားများ ဝိုင်းဝန်းဖမ်းဆီးနိုင်ခဲ့ပြီး နမ္မတူမြို့နယ်အတွင်းရှိ TNLA စခန်းကို သတင်းပို့အကြောင်းကြားခဲ့ပြီး TNLA တပ်ဖွဲ့မှ ၎င်း၏ စစ်သားကို လာရောက်ခေါ်ဆောင် သွားကြောင်း၊ နောက်ဆက်တွဲများ နောက်မှရှင်းကြမယ်ဟုသာ ပြောဆိုသွားကြောင်း ဒေသခံများ ပြောပြချက်အရ သိရသည်။
ထို့အပြင် ပန်လုံရွာလူကြီးကို ခေါ်ဆောင်စကားပြောပြီး ဒီဖြစ်စဥ်များနှင့် ပတ်သက်ပြီး မီဒီယာနှင့် အပြင်သို့ ပေါက်ကြားမှု မရှိအောင် ထိန်းသိမ်းနေကြပါရန် TNLA များက အမိန့်ပေးသွားကြောင်း သိရသည်။
ယင်းဖြစ်စဥ်ဖြစ်ပွားပြီးနောက် ဇန်နဝါရီလ ၂၅ ရက်နေ့တွင် အဆိုပါ မုဒိမ်းကျင့်ခံရသည့် အမျိုးသမီးငယ်သည် ရှက်ရွံ့တုန်လှုပ်သည့် စိတ်ဖြင့် ပိုးသတ်ဆေးသောက်ကာ မိမိကိုယ်ကိုယ် သေကြောင်းကြံခဲ့ကြောင်း ဒေသခံများက ပြောသည်။
“ကောင်မလေးက ရှက်လို့ ပိုးသတ်ဆေးသောက်ပြီး သေကြောင်းကြံဖို့ ကြိုးစားတယ်၊ ဒါပေမဲ့ သူ့အဒေါ်က အချိန်မှီ မြင်သွားလို့ သူ့အသက်ကယ်နိုင်ခဲ့တယ်၊ အခုဆို သူ့ကို တစ်ယောက်ထဲ မထားရဲဘူး၊ အဲ့လိုမျိုး ထပ်လုပ်မှာစိုးလို့” ဟု ၎င်းအမျိုးသမီးငယ်နှင့် နီးစပ်သူ တစ်ဦးက ဆိုပြန်သည်။
ယင်းကဲ့သို့ ပန်လုံရွာမှ အမျိုးသမီးငယ် အဓမ္မပြုကျင့်ခံရခြင်းနှင့် ပတ်သက်ပြီး တအာန်း(ပလောင်) အမျိုးသား တပ်မတော် (TNLA) ၏ သတင်းပြန်ကြားရေး ပြောရေးဆိုခွင့်ရှိသူ ဗိုလ်မှူး တားအိုက်ကျော်က ဖြစ်စဥ်အသေးစိတ် မသိရှိရသေးကြောင်းနှင့် တကယ်ပြစ်မှုမြောက်ပါက ပြင်းထန်စွာ အရေးယူဆောင်ရွက်မည်ဟု သျှမ်းသံတော်ဆင့်ကို ပြောသည်။
“ဒီဖြစ်စဥ်က ကျနော်မသိရသေးဘူး၊ ဘာဖြစ်လို့လဲဆိုရင် အဲ့ဒီဘက်(နမ္မတူ၊ ပန်လုံ)မှာ အဆက်အသွယ်လည်း ခက်ခဲနေတာ ရှိလို့ပါ၊ ကျနော်မြေပြင်ကို ဆက်လက်စုံစမ်းစစ်ဆေးပေးပါ့မယ်၊ တကယ်ပြစ်မှုမြောက်ရင်တော့ ကျနော်တို့ကနေ ပြင်းထန်စွာ ထိရောက်အရေးယူမှုရှိမှာပါ” ဟု ဗိုလ်မှူး တားအိုက်ကျော်က ပြောသည်။
ပန်လုံကျေးရွာအတွင်း TNLA စစ်သားများသည် ကျေးရွာတွင်း စားသောက်ဆိုင်များသို့ ဝင်ရောက်စားသောက် သည့်အခါ ပိုက်ဆံရှင်းပေးခြင်းမရှိပဲ ရွာလူကြီးများက လိုက်လံရှင်းပေးရခြင်း၊ ပြည်သူပိုင် ယာဥ်များကို အခကြေးငွေမပေးဘဲ ယူသုံးခြင်းနှင့် တခြားသော လူ့အခွင့်အရေးဆိုင်ရာ ချိုးဖောက်မှုများလည်း ရှိနေကြောင်း ဒေသခံများက ပြောသည်။
“အခု ပန်လုံရွာမှာ TNLA တွေ စိုးမိုးချုပ်ကိုင်နေတာ၊ ပန်လုံရွာသားတွေ လူ့အခွင့်အရေး ချိုးဖောက်ခံနေရပါတယ်၊ ပြီးတော့ ရွာသားတွေမှာလည်း ကြောက်စိတ်ရှိနေပြီ၊ ဘယ်လို လူ့အခွင့်အရေးချိုးဖောက်မှုကို မပြောရဲ မတိုင်ရဲ ဖြစ်နေလောက်အောင် အဲ့ဒေသက TNLA တွေက ရွာသားတွေကို ခြိမ်းခြောက်ထားတယ်၊ ကြောက်စိတ် သွင်းပေးတယ်” ဟု ဒေသခံများက ပြောသည်။
အဆိုပါ ဖြစ်စဉ်နှင့်ပတ်သက်ပြီး TNLA ပြောရေးဆိုခွင့်ရှိသူ တားအိုက်ကျော်က ၎င်းတို့ တပ်ဖွဲ့မှ လူ့အခွင့်အရေး ဆိုင်ရာ ချိုးဖောက်မှုများ ရှိလာပါက ၎င်းတို့၏ တရားရေးဆိုင်ရာနှင့် လူထုဆက်ဆံရေးစင်တာကို လူကိုယ်တိုင် သော်လည်းကောင်း ဖုန်းဖြင့်သော်လည်းကောင်း တိုင်ကြားနိုင်ကြောင်း ပြောသည်။
