သျှမ်းပြည် မြို့တော် တောင်ကြီးမြို့တွင် ၃ တန်ထက် ပိုသည့် အလေးချိန်ရှိသော ယာဥ်များ မြို့ထဲဝင်ခွင့် ရပ်နားခွင့် မရှိသည့် အတွက် ကားကြီးမောင်းသူများ အဆင်မပြေနိုင်ကြောင်း သတင်းသိရသည်။

“ကားငယ်တွေပဲ မြို့ထဲသွားလာရမယ် ဆိုတဲ့ သဘောပေါ့၊ သူတို့ပဲ ကုန်တင်ကုန်ချနဲ့ ခရီးသည်တွေဆီက ပိုက်ဆံရမယ်၊ ဒါပေမဲ့ မြို့ဝင်ကြေးတွေ၊ ဘီးလိမ့်ခွန်တွေ ပေးရတဲ့အခါမှာ ကျနော်တို့ ကားကြီးသမားတွေက ပိုပေးရတယ်၊ ဒီလိုကျတော့ အဆင်မပြေဘူးလေ” ဟု တောင်ကြီးမြို့မှ ကားကြီးမောင်းသူ တစ်ဦးက သျှမ်းသံတော်ဆင့်ကို ပြောသည်။

တောင်ကြီးမြို့အတွင်းတွင် ၃ တန်နှင့်အထက် ကုန်တင်ယာဉ်များ မြို့‌ပေါ်တွင် ကုန်တင်/ချ ပြုလုပ်ခြင်း၊ ရပ်တန့်ခြင်း မပြုလုပ်ရန်၊ အ‌ရှေ့မြို့ပတ်လမ်းနှင့် အနောက်မြို့ပတ်လမ်း တစ်လျှောက်တွင် မည်သည့် အကြောင်းနှင့်မျှ ယာဥ်များ မရပ်ရန် ကန့်သတ်တားမြစ်မှုများကို စစ်ကောင်စီတို့က ပြုလုပ်နေကြောင်း သတင်းသိရသည်။

ယင်းကဲ့သို့ စီမံဆောင်ရွက်မည့် အခြေအနေများနှင့် ပတ်သက်ပြီး တောင်ကြီးမြို့မှ ကုန်တင်ယာဉ်မောင်းတစ်ဦးက ကားမောင်းပြီး ဝမ်းစာ ရှာဖွေစားသောက်နေရသော ပြည်သူများအတွက် အဆင်မပြေကြောင်း သျှမ်းသံတော်ဆင့်ကို ပြောသည်။

“ဆီဈေးကလည်း နေ့တိုင်းတက်နေချိန် အခုလို လာလုပ်တော့ ကျနော်တို့က အလုပ်နားထားရမလိုပဲ၊ တခြားအလုပ်ပြောင်းရအောင်လည်း ဒီခေတ်ထဲ အလုပ်က ရှားတယ်လေ၊ မြို့ဝင်ဂိတ်တိုင်း စစ်ကောင်စီတွေက ကျနော်တို့ ကားသမားတွေကို ရစ်မယ်၊ တောင်းမယ်ဆိုတာချည်းပဲ” ဟု ကုန်တင်ယာဥ်မောင်းက ပြောသည်။

ထုတ်ပြန်ထားသည့် ကန့်သတ်တားမြစ်မှုကို ဖေဖော်ဝါရီ ၄ ရက်မှာ စတင်မည်ဖြစ်ကြောင်းနှင့် လိုက်နာမှု မရှိပါက ထိရောက်စွာ အရေးယူမည်ဟုလည်း စစ်ကောင်စီ လက်အောက်ရှိ သျှမ်းပြည်မှ ယာဉ်စည်းကမ်း၊ လမ်းစည်းကမ်း ထိန်းသိမ်းရေး ကြီးကြပ်မှုကော်မတီက ထုတ်ပြန်ထားသည်။