နိုင်ငံသားအားလုံး စစ်မှုထမ်းရမည့် အမျိုးသားစစ်မှုထမ်းဥပဒေကို မဖြစ်မနေလုပ်ဆောင်သွားမည် ဟု အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောကြားလိုက်ပါသည်။
“ကျနော်တို့ဆီမှာ အမျိုးသားစစ်မှုထမ်း ဥပဒေ မကျင့်သုံးရသေးဘူး။ နိုင်ငံသားတိုင်းဟာ စစ်မှုထမ်းဖို့ တာဝန်ရှိတယ်။ အမျိုးသားစစ်မှုထမ်းဥပဒေကို ကျွန်တော်တို့ မကျင့်သုံးရတာဟာ ဘာဖြစ်လို့လဲဆိုတော့ ပြည်တွင်းလက်နက်ကိုင်ပဋိပက္ခတွေရှိနေလို့ ကျွန်တော်တို့ လုပ်လို့မရဘူး။ စီးပွားရေးအားမကောင်းရင်လည်း ပိုက်ဆံမရှိလို့ မျက်နှာငယ်ရတယ်။ နိုင်ငံရေး အားမကောင်းတဲ့အခါကျတော့ သူများတွေ ကျွန်တော်တို့ကို ပြဿနာမျိုးစုံရှာမှာ။ စစ်ရေးအရ ကာကွယ်ရေးစွမ်းအားမကောင်းတော့ ဖင်ပုတ်၊ ခေါင်းပုတ်လာလုပ်လိမ့်မယ်” ဟု အာဏာသိမ်းစစ်ခေါင်းဆောင်က ယမန်နေ့ (ဖေဖော်ဝါရီ ၂ရက်) နေပြည်တော်မှာပြုလုပ်တဲ့ အစည်းအဝေးမှာ ပြောဆိုခဲ့တာ ဖြစ်ပါသည်။
နိုင်ငံသားတိုင်းသည် စစ်မှုထမ်းရန် တာဝန်ရှိကာ အမျိုးသား စစ်မှုထမ်းဥပဒေအရ နိုင်ငံသားတိုင်း ၂ နှစ်တန်၊ ၃ နှစ်တန် အခြေအနေပေါ်မူတည်ပြီး စစ်မှုထမ်းရမည် ဟု စစ်ကောင်စီ ဥက္ကဌ က ပြောပါသည်။
စစ်အာဏာသိမ်းခေါင်းဆောင်အနေဖြင့် ၂၀၂၂ ခုနှစ် လုပ်ရမည့် ရည်မှန်းချက်များမှာ စီးပွားရေး အားကောင်းအောင် လုပ်ဆောင်သွားမည်ဖြစ်ပြီး နိုင်ငံရေးရှေ့လုပ်ငန်းစဉ် ဖော်ပြထားသည့် ပါတီစုံဒီမိုကရေစီစနစ်ဖော်ဆောင်ရေး ကာကွယ်ရေးစနစ်ကို မဖြစ်မနေ လုပ်ဆောင်သွားမည်ဖြစ်ကြောင်းနှင့် နိုင်ငံသားအားလုံး စစ်မှုထမ်းရမည့် အမျိုးသား စစ်မှုထမ်းဥပဒေကိုလည်း မဖြစ်မနေ လုပ်ဆောင်သွားမည် ဟု စစ်အာဏာသိမ်းခေါင်းဆောင်က ပြောဆိုလိုက်ပါသည်။
