သျှမ်းပြည်မြောက်ပိုင်း သိန္နီမြို့တွင် ကိုဗစ် ၁၉ ကူးစက်မှုများရှိနေသည့် ကြားက ပြည်ထောင်စုနေ့ အထိမ်းအမှတ်အနေဖြင့် အားကစားပွဲကို အကြီးအကျယ် ပြုလုပ်နေကြောင်း စုံစမ်းသိရှိရသည်။
သီန္နီမြို့တွင် ဖေဖော်ဝါရီ ၁ ရက်နေ့မှ စတင်ပြီး ပြည်ထောင်စုနေ့ဖြစ်တဲ့ ၁၂ ရက်နေ့အထိ အားကစားပွဲ အခမ်းအနားကို ကျင်းပသွားမည်ဖြစ်ကြောင်း သိရသည်။
“စလုပ်နေတာတော့ ၁ ရက်နေ့ ကတည်းကထင်တယ်။ ၁၂ ရက်နေ့ထိ လုပ်မယ်လို့တော့ ကြားတယ်။ ၁၂ ရက်နေ့ကျရင် သူတို့က ဆုပေးသွားမယ်လို့ပြောတယ်။ လူတော့ များတယ်။ တပ်ထဲက ဗိုလ်တွေလည်း ပါတယ်။ သူတို့လည်း အခမ်းအနားလာဖွင့်ပေးတာ။ ကိုဗစ်လည်း မပျောက်သေးဘူး” ဟု သိန္နီမြို့ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
သိန္နီမြို့တွင် ယနေ့ထိတိုင် ကိုဗစ် -၁၉ ပိုးတွေ့လူနာများရှိနေပြီး တချို့ပြည်သူများသည် နေအိမ်တွင် ကိုယ်တိုင် ကုသနေလျက်ရှိကြောင်း သိရသည်။
အဆိုပါ ပိုးတွေ့လူနာများအတွက်လည်း အောက်ဆီဂျင် သုံးစွဲနေရသေးကြောင်း သိန္နီမြို့ ပရဟိတ အဖွဲ့ဝင်တစ်ဦးက ပြောသည်။
“ကိုဗစ် ပိုးတွေ့လူနာတော့ ရှိနေသေးတယ်။ ဘယ်လောက်ရှိလည်းတော့ ကျနော်တို့လည်း အတိအကျ မသိရတော့ဘူး။ တချို့က နေအိမ်မှာပဲ ကိုယ်တိုင်ကုကြတယ်။ အောက်ဆီဂျင်လာယူပြီး သုံးနေတဲ့သူတော့ ရှိနေသေးတယ်” ဟု သိန္နီမြို့ ပရဟိတ အဖွဲ့ဝင် အမျိုးသားတစ်ဦးက ပြောသည်။
ထိုသို့ အားကစားပြုလုပ်နေသည့် အပေါ်တွင် ဒေသခံများတချို့က ကိုဗစ် – ၁၉ ပိုပြီး ပြန့်ပွားလာမှာကို စိုးရိမ်နေကြပြီး အိုးမီခရွမ်ရောဂါလည်း ပြန့်လာမှာကို စိုးရိမ်နေလျက်ရှိကြောင်း သိရသည်။
“အခုက ရောဂါအသစ်လည်း ပေါ်လာနေပြီ။ သူတို့ ဒီလိုပွဲကျင်းပတော့ ရောဂါ ပိုပြီး ပြန့်လာမှာကို ကြောက်တာပေါ့။ ကျမတို့ ရပ်ကွက်ထဲဘဲ ကိုဗစ်လူနာ ၃ အိမ်လောက်ရှိနေပြီ။ သူတို့တွေ ပွဲကျင်းပတော့ ဘာမှ မဖြစ်ဘူး။ ပြည်သူတွေ လူစုဝေးရင်တော့ ဥပဒေအမျိုးမျိုးနဲ့ ဖမ်းနေကြတယ်” ဟု သိန္နီမြို့ ဒေသခံ အမျိုးသမီးတစ်ဦးက ပြောသည်။
သိန္နီမြို့တွင် ကိုဗစ် ၁၉ ပိုးတွေ့လူနာကို နေ့စဉ် ၁ ဦးမှ ၂ ဦး အထိတွေ့ရှိနေလျက်ရှိကြောင်း သိရသည်။
