သျှမ်းမြောက် ကျောက်မဲမြို့တွင် ပြီးခဲ့သည့် ဇန်နဝါရီလ (၂၉)ရက်နေ့ ညပိုင်းက ဓားထောက်ပြီး ဖုန်းလုယူမှုဖြစ်ပွားခဲ့ကြောင်း သတင်းသိရသည်။
ပြီးခဲ့သည့် ဇန်နဝါရီ ၂၉ ရက် ည (၆)နာရီ ဝန်းကျင် ကျောက်မဲမြို့ သီဟိုရ်တောင်ခြေအနီးတွင် လူငယ်နှစ်ဦးထံမှ ဓားထောက်ဖုန်းလုယူမှုဖြစ်ပွားခဲ့ကြောင်း ဒေသခံထံမှ သိရသည်။
“သူတို့ကို တားပြီး ဖုန်း စစ်မယ်လို့ ပြောတယ်၊ အရပ်ဝတ်နဲ့ပဲ၊ ဒီမြို့မှာက ညပိုင်းဆို အဲ့လို ဖုန်းတွေစစ် နေတာရှိတယ်ဆိုတော့ သူတို့လည်း ကြောက်လို့ ဖုန်းထုတ်ပေးလိုက်တာ၊ ပြန်တောင်းတော့ မပေးဘူး၊ ဓားနဲ့ ထောက်ပြီး ပြောတယ်၊ လာလုရင်ထိုးခံရမယ်ဆိုပြီး ပြောတာ” ဟု ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ဓားထောက် ဖုန်းလုခံရသည့် လူငယ်နှစ်ဦးသည် ကျောက်မဲ ဒေသခံများဖြစ်ပြီး ဓားထောက် ဖုန်းလုသွားသူသည် မည်သူမည်ဝါမှန်း မသိရှိရကြောင်း အထက်ပါ အမျိုးသားက ပြောသည်။
ယခုနောက်ပိုင်း ကျောက်မဲမြို့နယ်တွင် တိုင်းရင်းသားအချင်းချင်း တိုက်ပွဲဖြစ်ပွားမှု ဆက်လက်ဖြစ်ပွားနေပြီး မြို့တွင်း နေရာတချို့တွင် စစ်ကောင်စီတို့မှ လမ်းသွားပြည်သူများအား စစ်ဆေးမှု ပိုမိုပြုလုပ်လာကြောင်း သိရသည်။
“ဒီနောက်ပိုင်း တိုင်းရင်းသားလက်နက်ကိုင်တွေကလည်း တိုက်ပွဲဖြစ်တယ်၊ နောက်ပြီး မြို့ထဲမှာလည်း လမ်းသွားလမ်းလာတွေကို စကစတွေ စစ်ဆေးတာ ခဏခဏလုပ်နေတယ်၊ သွားလာတာ မလွတ်လပ်တော့ဘူး၊ နည်းနည်းမှောင်တာနဲ့ အပြင်သွားရမှာကို ကြောက်နေပြီ၊ ကျနော်ဆို စစ်ခံရတာ နှစ်ခါ ရှိပြီ” ဟု လူငယ် အမျိုးသားတစ်ဦးက ပြောသည်။
ယခုလအတွင်း ကျောက်မဲမြို့နယ် ခိုက်တုန်ဟုန်းကျေးရွာအနီး မန္တလေး – လားရှိုး ပြည်ထောင်စု လမ်းမကြီးပေါ် တွင် ညအချိန် သွားလာသည့် ကားကြီးများကို လက်နက်ပြပြီး ငွေကြေးတောင်းယူမှုများလည်း ရှိနေကြောင်း ဒေသခံတချို့က ပြောသည်။
Leave a Comments