မောင်မောင် (အမည်လွဲ ) ဟာ အသက် ၂၀ ခန့်ရှိ လူငယ်တစ်ဦးဖြစ်ပြီးတော့ တောင်ကြီးဒေသခံ လည်းဖြစ် ပါတယ်။ မောင်မောင် မှာ မောင်နှမ ရင်းခြာ အမတစ်ဦးရှိပြီး လက်ဘက်ရည်ဆိုင် လုပ်ငန်းလုပ်ကိုင် လျက်ရှိ ပါတယ်။
နေ့စဉ် မောင်မောင်တစ်ယောက် သူနေထိုင်ရာ ဘုရားဖြူရပ်ကွက်ကနေ အမရဲ့ လက်ဘက်ရည်ဆိုင်ရှိရာ မြို့ထဲကို ကိုယ်ပိုင် လိုက်ထရပ်ကားနဲ့ သွားလေ့ရှိပါတယ်။
လက်ဘက်ရည်ဆိုင်မှာ အမကို ကူညီလုပ်ကိုင်ပေးရင်း ညနေပိုင်းမှာတော့ နေအ်ိမ်ရှိရာ ဘုရားဖြူရပ်ကွက်ကို ကားနဲ့ ပြန်လေ့ရှိပါတယ်။
တစ်ရက်မှာတော့ ထုံးစံအတိုင်း အမဆိုင်ကူပေးရင်း မြို့ထဲကနေ နေအိမ်ဘုရားဖြူကို မောင်မောင် ပြန်လာခဲ့ပါတယ်။
အမှတ်(၅) ကျောင်း လမ်းဆုံထောင့်အနီး အရောက်မှာတော့ မောင်မောင် ကားကို လက်နှိပ်ဓာတ်မီးထိုးပြီး ဘေးရပ်ခိုင်းတာကို ရင်ဆိုင်ကြုံတွေ့ခဲ့ရပါတယ်။
လုံခြုံရေးအရ ရှာဖွေ စစ်ဆေးနေတယ်လို့ပဲ မှတ်ယူပြီးတော့ မောင်မောင် က သူ့ရဲ့ ကားကို အမှတ် (၅) ကျောင်း ဘေးအနီး ရပ်တန့်ပေးလိုက်ပါတယ်။
“ဟေ့ကောင် ကားပေါ်ကဆင်း၊ ဘာတွေ ပါလဲ ၊ လက်မြောက်ထား၊ ရုပ်ရုပ်မလုပ်နဲ့ အချုပ်ထဲ တစ်ည ထည့်ထားလိုက်မယ်” – ဆိုပြီးတော့ အရပ်ဝတ်နဲ့ လုံခြုံရေး ရဲ (သို့) စစ်သား လို့ယူဆရ သူ တစ်ဦးနဲ့ အပေါင်းအပါတွေက အော်ဟစ်ကြိမ်းမောင်းတာကို မောင်မောင်ခံလိုက်ရပါတယ်။
ကားပေါ်ကနေ မောင်မောင် ဆင်းပြီးတော့ စစ်ကောင်စီ တပ်ဖွဲ့ဝင်တွေရဲ့ စစ်ဆေးမှုကို ခံခဲ့ရပြီး ကားအတွင်းမှာ ဘာမှ မတွေ့ပေမယ့်လည်း အရစ်ခံရတယ်လို့ မောင်မောင် ကပြောပြပါတယ်။
“ အမ ဆိုင်ကနေ ကူပြီး ပြန်လာတာပြောပြတယ်၊ မရဘူး ရစ်နေတာ၊ ဟိုမှာ တစ်ည သိပ်လိုက်မယ် တို့ဘာတို့ ပြောတယ်၊ နောက်မရတဲ့အဆုံး တစ်သောင်းကျပ် ပေးခဲ့လိုက်ရတယ်” လို့ မောင်မောင် က ထိုစဉ်က သူကြုံတွေ့ခဲ့တဲ့ အခြေအနေတွေကို ပြန်ပြောပြပါတယ်။
အဲဒီအချိန်က မိုးလည်းမချုပ်သေးသလို ည ၈း၀၀နာရီ ဝန်းကျင်ခန့်သာရှိသေးတယ်လို့လည်း မောင်မောင် က ပြောပြပါတယ်။
မောင်မောင် လို စစ်ကောင်စီ တပ်ဖွဲ့ဝင်တွေရဲ့ စစ်ဆေး ရှာဖွေ ခံခဲ့ရသူတွေ ဒုနဲ့ဒေးရှိနေပြီးတော့ ထိုနည်းအတိုင်းပဲ ရင်ဆိုင်ကြုံတွေ့ခဲ့ရတယ်လို့လည်း တောင်ကြီးဒေသခံ အမည်မဖော်လိုသူ အချို့ ကပြောပါတယ်။
စစ်ကောင်စီ လက်အောက်ခံ တပ်ဖွဲ့ဝင်တွေဟာ ညပိုင်းအချိန်တွေမှာ ကင်းပုံးဝပ်တာ၊ မှောင်ရိပ်မှာ အရပ်ဝတ်တွေနဲ့ ကားဆိုင်ကယ်တွေကို ရပ်တန့် ရှာဖွေ စစ်ဆေးတာတွေကို လုပ်ဆောင်တတ်တယ်လို့ တောင်ကြီးမြို့ဒေသခံ အချို့က ပြောပြပါတယ်။
လုံခြုံရေးဆိုတာထက် ဂွင်ရှာပြီး ငွေညစ်တာတွေမျိုးလည်း မကြာခဏ ကြုံရတတ်တယ်လို့ အစစ်ဆေးခံရပြီး ငွေတောင်းခံခဲ့ရတဲ့ အမည်မဖော်လိုသူ တစ်ဦး ကပြောပါတယ်။
“ လုံခြုံရေး အကြောင်းပြပြီးတော့ ပြည်သူတွေကို ဓါးပြတိုက်နေတာ” လို့ အစစ်ဆေးခံရပြီး ငွေတောင်းခံခဲ့ရတဲ့ အမည်မဖော်လိုသူ တစ်ဦး ကပြောပါတယ်။
တောင်ကြီးမြို့ တွင်းရှိ အမှတ်(၅) ဈေးလမ်းဆုံထောင့်၊ မြင်းရုပ်နဲ့မိန်းလမ်းအနီး၊ နဂါးပွတ်ကျောင်းအနီး၊ မြကန်သာ ပန်းခြံအနီး၊ အထက (၄) ကျောင်းအနီး ၊ အထက (၁) ကျောင်းအနီး၊ ဧရာဝတီ ကဖေးလမ်းဆုံ ၊ ကံကြီး ရထားသံလမ်း အစရှိတဲ့နေရာတွေမှာ ညစဉ်ညတိုင်း လည့်လည်ကာ စစ်ကောင်စီတပ်ဖွဲ့ဝင်တွေက စစ်ဆေးရှာဖွေတာတွေ လုပ်ဆောင်လေ့ရှိတယ်လို့ဒေသခံ အချို့က ဆိုပါတယ်။
ညစဉ်ညတိုင်း လူစည်ကားရာ လမ်းဆုံ လမ်းထောင့်နေရာတွေမှာ စစ်ကောင်စီ တပ်ဖွဲ့ဝင်တွေက ပြည်သူတွေကို ရဲ့ ကားတွေ၊ ဆိုင်ကယ်တွေကို ရပ်တန့်ရှာဖွေ စစ်ဆေးတာတွေကို လုံခြုံရေးအကြောင်းပြပြီး ပေါ်ပေါ်တင်တင် လုပ်ဆောင်နေကြဆဲပဲဖြစ်တယ်လို့ ဒေသခံ လူငယ်တစ်ဦး ကပြောပါတယ်။
“ အရင်က စစ်ဆေးရေးဆို ဘယ်သူမှ မလိုက်ချင်ကြဘူး၊ ညနက်တာ၊ လုံခြုံရေးအခြေအနေတွေအရကော၊ အခုက ပျော်ပျော်ကြီးကို လုပ်နေကြတာ “ လို့ အမည်မဖော်လိုသူ ရဲအရာရှိ(ဖရဲသီး) တစ်ဦး ကပြောပါတယ်။
လုံခြုံရေးအကြောင်းပြပြီးတော့ ကား၊ဆိုင်ကယ်တွေ ရပ်တန့်စစ်ဆေးမှုတွေကြောင့် မလုံခြုံသလို ခံစားနေရတယ်လို့လည်း ဒေသခံ အချို့ ကပြောပါတယ်။
“ဖြစ်နိုင်ရင် ညပိုင်းအပြင်မထွက်တာ အကောင်းဆုံးပဲ ၊ မဟုတ်ရင် တစ်မျိုးမဟုတ် တစ်မျိုး အရစ်ခံရတာ၊ ဖမ်းဆီးခံရတာတွေ ဖြစ်ပေါ်နိုင်တယ်” လို့ တောင်ကြီးဒေသခံ အသက် ၄၀အရွယ် လူလတ်ပိုင်း အမျိုးသားကြီးတစ်ဦး က သူ့အမြင်ကိုပြောပြပါတယ်။
အခုလို ညစဉ်ညတိုင်း ကင်းလည့်ကာ စစ်ဆေးရှာဖွေ မှုတွေ လုပ်ဆောင်တာဟာ စစ်ကောင်စီ ခေါင်းဆောင်ကို ဆန့်ကျင်သူတွေ နဲ့စပ်ဆက်သူတွေကိုသာ အဓိကထားပြီး လုပ်ဆောင်နေတာဖြစ်ပြီးတော့ သူခိုး လူဆိုးများကို တော့ လွတ်ကင်းစွာနဲ့ သောင်းကျန်းနေတယ်လို့လည်း ဒေသခံ အချို့က မှတ်ချက်ပြုပါတယ်။
“ ဆိုင်ကယ်တွေ ပျောက်တာ နေ့စဉ်နေ့တိုင်းပဲ ၊ဖေ့ဘွတ်ခ် (လိုင်း) ပေါ်ကြည့်ကြည့်ဗျ၊ တစ်စီးမှ ပြန်ရတာ၊ ဖမ်းမိတယ် မကြားဖူးသေးဘူး “ လို့ တောင်ကြီးဒေသခံ ဆိုင်ကယ်ပျောက်ဆုံးခဲ့သူတစ်ဦး ကပြောပါတယ်။
မြန်မာနိုင်ငံတစ်ဝန်းမှာ စစ်ကောင်စီ ခေါင်းဆောင် ဗိုလ်ချုပ်မှူးကြီး မင်းအောင်လှိုင် အာဏာသိမ်းယူခဲ့ပြီးတဲ့ တစ်နှစ်ဝန်းကျင်ကာလအတွင်း ပြည်သူများစွာ ပူဆွေးသောကတွေ ရောက်နေကြရသလို မလုံခြုံမှုဒဏ်တွေကိုလည်း ခံစားနေကြရပါတယ်။
ကိုဗစ်-၁၉ ကပ်ဘေးရောဂါ အပြင် စစ်ဘေး၊အာဏာသိမ်းဘေးတွေနဲ့ စီးပွားရေးအဆင်မပြေမှုတွေ မလုံခြုံမှု ဒဏ်တွေကို မြို့နေလူတန်းစားအပြင် တောနေလူတန်းစားတွေပါ ခံစားနေကြရပါတယ်။
