သျှမ်းပြည်အရှေ့ပိုင်း မိုင်းဆတ်မြို့တွင် ယခုလဆန်းပိုင်းက အသက် (၁၈)နှစ် မပြည့်သေးသည့် လူငယ် (၂)ဦး အချုပ်ခန်းမှ ထွက်ပြေးခဲ့ကြောင်း စုံစမ်းသိရှိရသည်။
ထိုလူငယ် (၂)ဦးသည် ၂၀၂၁ ခုနှစ် ဇွန်လ (၅)ရက်နေ့တွင် လူငယ်အချင်းချင်းရန်ဖြစ်ရာမှ တစ်ဦး သတ်ခံလိုက်ရသဖြင့် ဖမ်းဆီးခံထားရသည့် သူများဖြစ်ပြီး ဇန်နဝါရီ (၄)ရက်တွင် အချုပ်ခန်းမှ ထွက်ပြေးလွှတ်မြောက်သွားကြောင်း သိရသည်။
“သူတို့က လူငယ်အချင်းချင်း ရန်ဖြစ်ပြီး သျှမ်းလူငယ်တစ်ဦးကို သတ်လိုက်တာ။ အသက်တော့ မပြည့်သေးဘူး။ ထောင်ထဲတော့ မထားရဘူး။ ရဲတွေက ဒီတိုင်း အချုပ်ထဲမှာ သိမ်းထားတာ။ ပြီးခဲ့တဲ့ (၄) ရက်နေ့ကတော့ အချုပ်ခန်းထဲကနေ ထွက်ပြေးသွားခဲ့တယ်လို့ သိရတယ်။ အခုချိန်ထိ ပြန်မဖမ်းမိသေးဘူးထင်တယ်” ဟု မိုင်းဆတ်မြို့ ဒေသခံ အမျိုးသားတစ်ဦးက ပြောသည်။
လူငယ်အချင်းချင်း ရန်ဖြစ်ရာတွင် (၆)ဦး ရှိခဲ့ရာ မိုင်းဆတ်ရဲစခန်းမှ ရဲများသည် အသက်မပြည့်သေးသည့် လူငယ် (၂)ဦးကိုသာ ဖမ်းမိခဲ့ပြီး ကျန် လူငယ် (၄)ဦးမှာ ယခုချိန်ထိ ဖမ်းဆီးနိုင်ခြင်းမရှိသေးကြောင်း သိရသည်။
“သူတို့က အရင်ကတည်းက (၆)ယောက်လုံးကို မဖမ်းနိုင်ဘူး။ (၂)ယောက်ဘဲ ဖမ်းမိတာ။ အခုတောင် အဲဒီ (၂)ယောက် ပြန်လွှတ်သွားပြီ။ ရဲတွေလည်း အလုပ်သိပ်မလုပ်ကြဘူး။ ကျနော်တို့လူငယ် သေသွားတာ အခုချိန်ထိ မျှတမှုက မရသေးဘူး” ဟု အထက်ပါ အမျိုးသားက ပြောသည်။
ထိုကိစ္စဖြင့် သေဆုံးသွားသည့် လူငယ်အတွက် တရားမျှတမှု မရရှိသေးသည့်အတွက်ကြောင့် မနက်ဖြန် ဇန်နဝါရီ (၂၅)ရက်နေ့တွင် နှစ်ဖက် မိဘ လူကြီးများနှင့် တွေ့ဆုံသွားရန်ရှိနေကြောင်း သိရသည်။
“မနက်ဖြန် ဒီကိစ္စနဲ့ပတ်သက်ပြီးတော့ ၂ ဖက် မိဘတွေ လူကြီးတွေ ဆွေးနွေးညှိနှိုင်းဖို့ရှိတယ်။ အခုချိန်ထိတော့ တရားမျှတမှု မရသေးဘူး။ သေဆုံးသွားတဲ့ မိဘ ဘက်ကလည်း လျော်ကြေး မလိုချင်ဘူးလို့ပြောတယ်။ ဒါကြောင့် တရားမျှတမှုရအောင် လုပ်ဆောင်သွားမယ်” ဟု သျှမ်းစာပေနှင့်ယဉ်ကျေးမှု အဖွဲ့ဝင်တစ်ဦးက ပြောသည်။
မိုင်းဆတ်မြို့တွင် လူငယ်အချင်းချင်း မကြာခဏ ရန်ဖြစ်ပွားမှု ဖြစ်လေ့ရှိပြီး ပြီးခဲ့သည့် ဒီဇင်ဘာ ၃၁ ရက်ည (Happy New Year ည) တွင်လည်း လားဟူ လူငယ်နှင့် သျှမ်းလူငယ်တို့ ရန်ပွဲ ထပ်မံဖြစ်ပွားခဲ့ကြောင်း သိရသည်။
Leave a Comments