သျှမ်းပြည်မြောက်ပိုင်း တန့်ယန်းမြို့နယ်အတွင်းတွင် တအာင်းအမျိုးသားတပ်မတော် TNLA နှင့် စစ်ကောင်စီ လက်အောက်ခံ ပြည်သူ့စစ်တို့က တပ်သားသစ်များ စုဆောင်းနေကြောင်း ဒေသခံများပြောပြချက်အရ သိရသည်။
တန့်ယန်းမြို့နယ်အတွင်းရှိ လွယ်လိန်းတောင်တက်လမ်းတစ်လျှောက်တွင် သွားလာလှုပ်ရှားတတ်သည့် TNLA တပ်ဖွဲ့သည် အနီးပတ်ဝန်းကျင်ရှိ ကျေးရွာမှ ဒေသခံများကို စစ်ပညာ လာရောက် သင်ယူရန် စေခိုင်းမှုများ ရှိနေကြောင်း ဒေသံများက သျှမ်းသံတော်ဆင့်ကို ပြောသည်။
“တစ်ရွာကို ရွာသား ဘယ်လောက်က စစ်ပညာသင်ဖို့ စာရင်းလာပေးပါ၊ စာရင်းမရှိတဲ့ရွာဆိုရင် မြေဧက ဘယ်လောက်က သူတို့ (TNLA) သိမ်းယူမယ်ပေါ့၊ ဆိုလိုတာက လူမရှိရင် မြေသိမ်းမယ်ဆိုတဲ့ သဘော” ဟု ပန်လုံကျေးရွာမှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် TNLA တို့သည် တန့်ယန်းမြို့နယ်မှ လွယ်လိန်းတောင်တက်လမ်းနှင့် အနီးပတ်ဝန်းကျင်ရှိ သျှမ်းရွာနှင့် ပလောင်ကျေးရွာများအပါအဝင် စားနပ်ရိက္ခာများ တောင်းဆိုခြင်း၊ လူအင်အားတောင်းဆိုခြင်းများ ရှိနေကြောင်း သိရသည်။
ယင်းကဲ့သို့ ရိက္ခာတောင်းယူမှု / လူသစ်တောင်းယူမှုများနှင့် ပတ်သက်ပြီး TNLA ၏ ပြောရေးဆိုခွင့်ရှိသူ ဗိုလ်မှူး တာဘုန်းကျော်ကို အကြိမ်ကြိမ်ကြိုးစားဆက်သွယ်ခဲ့သော်လည်း အဆက်အသွယ်မရရှိခဲ့ပါ။
ထို့အပြင် အာဏာသိမ်းစစ်ကောင်စီလက်အောင်ခံ တန့်ယန်းမြို့မှ ပြည်သူ့စစ်တပ်ဖွဲ့ကလည်း တန့်ယန်းမြို့နယ်ရှိ ကျေးရွာများနှင့် မြို့ပေါ်ရပ်ကွက်များအထိ လူသစ်ကောက်ခံခြင်းများ ရှိနေကြောင်း ဒေသခံများထံမှ သိရသည်။
“မန်ပန်ပြည်သူ့စစ်တပ်ဖွဲ့ကကောက်နေပါတယ်၊ ကျေးရွာ၊ အုပ်စုတစ်ခုမှာ လူနှစ်ယောက်ပေးရတယ်၊ လူမပေးနိုင်ရင် ပိုက်ဆံပေးရမယ်၊ ဒီကိစ္စတွေနဲ့ ပတ်သက်ပြီး ရွာသားတွေဘက်က လက်မခံနိုင်လို့ သက်ဆိုင်ရာ လူကြီးတွေက ဆွေးနွေးညှိနှိုင်းပေးနေပါတယ်” ဟု တန့်ယန်းမြို့မှ ဒေသခံတစ်ဦးက သျှမ်းသံတော်ဆင့်ကို ပြောသည်။
မန့်ပန်ပြည်သူ့စစ်တပ်ဖွဲ့သည် ယခင်က တန့်ယန်းမြို့နယ်အတွင်း ကျေးရွာများတွင်သာ လူသစ်စုဆောင်းလေ့ရှိသော်လည်း အာဏာသိမ်းပြီးနောက် မြို့ပေါ်ရပ်ကွက်များအထိ လှုပ်ရှားလာကြောင်း သိရသည်။
တန့်ယန်းမြို့နယ်တွင် မန်ပန်ပြည်သူ့စစ်အပြင် မိုင်းဟပြည်သူ့စစ်လည်းလှုပ်ရှားလျက်ရှိပြီး SSPP, TNLA တိုင်းရင်းသားလက်နက်ကိုင်များလည်း လှုပ်ရှားလျက်ရှိသည်။
