သျှမ်းပြည်အရှေ့ပိုင်း တာချီလိတ်မြို့တွင် (၃)ရက်ဆက်တိုက် ဗုံးပေါက်ကွဲမှု ဖြစ်ပွားခဲ့ပြီးနောက်ပိုင်း မြို့ပေါ်တွင် ယခင်ထက် စစ်ဆေးမှု ပိုမို တင်းကြပ်လာကြောင်း စုံစမ်းသိရှိရသည်။
တာချီလိတ်မြို့တွင် (၃)ရက်ဆက်တိုက် ဗုံးပေါက်ကွဲမှုဖြစ်ပွားခဲ့ပြီး ယခင်ထက် စစ်ကောင်စီတပ်ဖွဲ့များက အင်းအားတိုးချဲ့လာပြီး စစ်ဆေးမှုကို ပိုမိုတင်းကြပ်လာလျက်ရှိကြောင်း သိရသည်။
“စစ်ဆေးတာကတော့ ပိုပြီး စစ်ဆေးလာတယ်။ တစ်နေရာမှာ တားပြီး စစ်တာလည်းရှိတယ်။ တချို့နေရာမှာဆို စခန်းချပြီးတော့ စစ်ဆေးနေတာ။ သူတို့ အထင်တော့ PDF ရှိမယ်အထင်နဲ့ လိုက်ပြီးစစ်ဆေးနေတာထင်တယ်။ အဓိကတော့ ထောင်ကထွက်လာတဲ့သူတွေကို ပိုပြီး စစ်ဆေးနေတာ” ဟု တာချီလိတ်မြို့ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ထို စစ်ကောင်စီများသည် လမ်းသွားလမ်းလာ ပြည်သူများ၏ ဖုန်းကိုလည်း စစ်ဆေးမှုများ ပြုလုပ်ကြောင်း သိရသည်။
“လမ်းမှာ စစ်နေတာတော့ ရှိတယ်။ လမ်းသွားလမ်းလာနေရာမှာ ဖုန်းစစ်နေတယ်တဲ့။ ကျမ သူငယ်ချင်းက အပြင်သွားလာတာ သူ့ ဖုန်း စစ်ခံလိုက်ရတာ။ ဘာမှတော့ မဖြစ်ဘူး။ သူတို့ ဖုန်းထဲမှာ ဘာရှိလဲ ဆိုတာကို စစ်ဆေးတာ” ဟု တာချီလိတ်မြို့ ဒေသခံ အမျိုးသမီးတစ်ဦးက ပြောသည်။
ပြီးခဲ့သည့် ဇန်နဝါရီ (၁၀)ရက်နေ့က တာချီလိတ်မြို့တွင် ပြည်သူ့ကာကွယ်ရေးတပ်ဖွဲ့က ပြည်သူများအနေဖြင့် လမ်းသွားလမ်းလာရာတွင် သတိထား သွားလာကြရန်အတွက် ထုတ်ပြန်ကြေညာခဲ့သည်။
Leave a Comments