သျှမ်းမြောက် ကျောက်မဲမြို့တွင် ကိုဗစ် -၁၉ ကူးစက်ခံရသည့် လူနာသစ် မတွေ့ရှိတော့ကြောင်း သတင်းသိရသည်။
ထို့အပြင် ကျောက်မဲ ခရိုင်ဆေးရုံတွင် တက်ရောက်ကုသနေသည့် ကိုဗစ် – ၁၉ အတည်ပြုလူနာအားလုံး ဆေးရုံဆင်းခွင့်ရရှိပြီးဖြစ်ကြောင်း သိရသည်။
“မြို့မှာ ပိုးတွေ့လူနာသစ်ကို မနေ့ကလည်း မတွေ့ဘူး၊ ဒီနေ့လည်း မတွေ့ဘူး၊ ဒီရက်ပိုင်း လူနာသစ် မတွေ့တာ နည်းနည်းကြာပြီ၊ ဆေးရုံမှာလည်း ကိုဗစ်အတည်ပြုလူနာ မရှိတော့ဘူး၊ အားလုံး ဆင်းသွားပြီ” ဟု ကျောက်မဲ ဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
ကိုဗစ်လူနာသစ် ထပ်မံမတွေ့ရှိရသော်လည်း ပြည်သူများ အနေဖြင့် ကိုဗစ်စည်းကမ်းလိုက်နာမှု၊ Mask စနစ်တကျ တပ်ဆင်မှု အားနည်းနေသေးကြောင်း သိရသည်။
တချို့ ရပ်ကွက်များတွင် ကျန်းမာရေးမကောင်းသည့် ကိုဗစ် သံသယလူနာများ ရှိနေသေးကြောင်း ဒေသခံများက ပြောသည်။
“ဆေးရုံစာရင်းတွေ အရတော့ ကိုဗစ် လူနာသစ်တွေ မရှိတော့ဘူး၊ ဒါပေမယ့်လည်း ရပ်ကွက်တွေထဲမှာ ကိုဗစ်လက္ခဏာနဲ့ ကျန်းမာရေးမကောင်းတဲ့သူတွေကိုတော့ တွေ့နေရသေးတယ်၊ သူတို့တွေက ဆေးရုံကို မသွားကြတော့ဘူး၊ နေအိမ်မှာပဲ ဆေးကုနေကြတာ” ဟု ဒေသခံ အမျိုးသားတစ်ဦးက ပြောသည်။
မြို့တွင်း တချို့နေရာများတွင် ရံဖန်ရံခါ Mask မတပ်သူများအား ဖမ်းဆီးကာ ကိုဗစ်စစ်ဆေးမှုများ ပြုလုပ်ကြောင်းလည်း သိရသည်။
ထို့အပြင် ပထမအကြိမ်နှင့် ဒုတိယအကြိမ် ကိုဗစ် ကာကွယ်ဆေးထိုးထားသည့် ရက်ချိန်းပြည့်သူများကို တနင်္ဂနွေနေ့မှလွဲပြီး မြို့တော်ခန်းမတွင် မနက် ၉ နာရီကျော်မှ နေ့လည် ၁၂ နာရီအထိ ထိုးနှံပေးနေကြောင်း သိရသည်။
ကျောက်မဲမြို့နယ် မိုင်းလုံ၊ မိုင်းငေါ့မြို့တို့အပါအဝင် ပြီးခဲ့သည့် ဇန်နဝါရီ ၁၁ ရက်နေ့အထိ ကိုဗစ် အတည်ပြုလူနာ (၁၉၀၀)ဝန်းကျင် ရှိခဲ့ပြီး သေဆုံးသူ (၁၀၇)ဦး ရှိခဲ့ကြောင်း သိရသည်။
