သျှမ်းပြည်တောင်ပိုင်း မိုးဗြဲမြို့နယ် ဟိုက်ကွီကျေးရွာတွင် စစ်ကောင်စီမှ လက်နက်ကြီးဖြင့် ရမ်းသမ်းပစ်ခတ်မှုကြောင့် ဒေသခံ အမျိုးသမီးတစ်ဦး လက်နက်ကြီးထိမှန်ကာ ဒဏ်ရာပြင်းထန်ရရှိခဲ့ကြောင်း စုံစမ်းသိရှိရသည်။
ဖြစ်စဉ်မှာ ယမန်နေ့ ဇန်နဝါရီ ၃ ရက် မနက် ၆ နာရီဝန်းကျင်က စစ်ကောင်စီ၏ ရမ်းသမ်းပစ်ခတ်မှုကြောင့် နေအိမ်တွင် နေထိုင်နေသည့် အမျိုးသမီးတစ်ဦး လက်နက်ကြီးထိမှန်းခဲ့ပြီး ဒဏ်ရာပြင်းထန်ရရှိခဲ့ကြောင်း သိရသည်။
“ခါးနောက်ကျောဘက်မှာတော့ ဒဏ်ရာရသွားတယ်။ အရမ်းကြီးတော့ မစိုးရိမ်ရဘူး။ ဖြစ်ဖြစ်ခြင်း ကျနော်တို့ သွားကူညီပေးခဲ့ပြီး ဆေးရုံပို့ပေးလိုက်တာ။ ဒဏ်ရာတော့ ပြင်းထန်တယ်။ စစ်ကောင်စီက ရမ်းသမ်းပစ်ပြီး နေအိမ်ထိသွားတာ” ဟု ထိုအမျိုးသမီးကို ကူညီပေးသူတစ်ဦးက ပြောသည်။
လက်ရှိတွင် လက်နက်ကြီးထိမှန်ခဲ့သည့် အမျိုးသမီးကို ဆေးရုံသို့ ပို့ဆောင်ထားကြောင်း သိရသည်။
လက်နက်ကြီး ကျရောက်မှုကြောင့် ဟိုက်ကွီကျေးရွာ ဒေသခံများက လွတ်မြောက်ရာနေရာသို့ ထွက်ပြေးတိမ်းရှောင် နေရကြောင်း သိရသည်။
ယနေ့ချိန်ထိ လွိုင်ကော်မြို့နယ်၊ ဒီးမော့ဆိုမြို့နယ်နှင့် ဖရူဆိုမြို့နယ်အတွင်း စစ်ကောင်စီနှင့် ကရင်နီအမျိုးသားများ ကာကွယ်ရေးတပ် (KNDF)တို့ စစ်ရေးအရှိန်မြင့်နေကြောင်း သိရသည်။
Leave a Comments