သျှမ်းပြည် အရှေ့ပိုင်း တာချီလိတ်မြို့တွင် Stay at home ပယ်ဖျက်ပြီးနောက် ကိုဗစ် ၁၉ ကြောင့် သေဆုံးသူများ ရှိနေကြောင်း စုံစမ်းသိရှိရသည်။
တာချီလိတ်မြို့တွင် Stay at home ပယ်ဖျက်ပြီးနောက် သေဆုံးသူ (၃) ဦးအထက် ရှိနေပြီးဖြစ်ကြောင်း သိရသည်။
“သေဆုံးနေတာတော့ ရှိတယ်။ တစ်ရက်ခြားပြီး သေနေကြတယ်။ ဆေးရုံမှာ သေဆုံးနေတဲ့သူတွေလည်းရှိတယ်။ ခန့်မှန်ခြေအရတော့ (၃)ဦးအထက်ရှိနေပြီ။ အတိကျတော့ မသိရသေးဘူး။ ညအချိန်တွေ သွားသယ်ပြီး သင်္ဂြိုလ်ရတာလည်းရှိတယ်” ဟု တာချီလိတ်မြို့ ပရဟိတ အဖွဲ့ဝင်တစ်ဦးက ပြောသည်။
အဆိုပါ သေဆုံးသူများသည် ကိုယ်ခံအားနည်းသူများနှင့် ရောဂါအခံရှိသူများဖြစ်ကြောင်း သိရသည်။
ထိုသို့ Stay at home ပယ်ဖျက်ပြီးနောက်ပိုင်း ကိုဗစ် – ၁၉ ပိုးကူးစက်ခံရသူများ တိုးလာသည့်အပြင် သေဆုံးသူများလည်း ရှိနေသောကြောင့် ဒေသခံများက စိုးရိမ်နေလျက်ရှိကြောင်း သိရသည်။
“တချို့ပိုးကူးနေလည်း တုတ်ကွေးနဲ့ မှားပြီး အိမ်မှာကုနေတာရှိတယ်။ အခုလို သေတာမျိုးတွေရှိနေတော့လည်း စိုးရိမ်ရတာပေါ့။ တချို့က အိမ်မှာကုနေတာလည်းရှိတယ်လေ။ ကိုဗစ်က ပျောက်သွားတာ မကြာသေးတော့ ထပ်ပြီး ပြန်ပွားလာမှာကို ကြောက်တယ်” ဟု တာချီလိတ် ဒေသခံ အမျိုးသမီးတစ်ဦးက ပြောသည်။
တာချီလိတ်မြို့တွင် ဒီဇင်ဘာ ၁၂ ရက်နေ့ကစပြီး stay at home ပယ်ဖျက်ပေးလိုက်ပြီးနောက် ၁၃ ရက်နေ့တွင် မြို့ဝင်မြို့ထွက် လော့ဒေါင်းကို ပြန်ဖွင့်ပေးခဲ့ကြောင်း သိရသည်။
Leave a Comments