သျှမ်းပြည်တောင်ပိုင်း ပင်းတယမြို့နယ်မှ မြို့နယ်အထွေထွေအုပ်ချုပ်ရေးမှူး ဦးကျော်မိုးလွင်သည် ရုံးအသုံးစရိတ် များကို အလွှဲသုံးစား အသုံးပြုနေသည့်အပြင် ဝန်ထမ်းများကိုလည်း ဖိနှိပ်ချုပ်ခြယ်ခြင်းများ ပြုလုပ်နေကြောင်း သတင်းသိရသည်။

ဦးကျော်မိုးလွင်သည် စစ်ကိုင်းတိုင်း ဘုတလင်မြို့နယ်မှ ပင်းတယမြို့သို့ ပြောင်းရွှေ့လာသူဖြစ်ပြီး ၎င်းရောက် ကတည်းက CDM ဝန်ထမ်းများ အတိုးမဲ့ချေးယူထားသည့်ငွေများကို ခြိမ်းခြောက်တောင်းဆိုမှုများ ပြုလုပ်ခဲ့ကြောင်း အမည်မဖော်လိုသည့် ပင်းတယထွေအုပ်ရုံးမှ ဝန်ထမ်းတစ်ဦးက သျှမ်းသံတော်ဆင့်ကို ပြောသည်။

“CDM ဝန်ထမ်းတွေဆီက အတိုးမဲ့ချေးပေးထားတဲ့ငွေတွေကို လိုက်တောင်းခိုင်းပြီး ရလာတဲ့ ငွေတွေကို ရုံးအတွက် အသုံးစရိတ်ဆိုပြီးတော့ သိမ်းထားတယ်၊ အစိုးရဘတ်ဂျက်နဲ့ ချပေးသမျှ ကိုဗစ်ထောက်ပံ့ကြေးအားလုံး သူ့အတွက်ယူထားတာ၊ ဝန်ထမ်းတွေအတွက် Mask တို့ Hand Gel တို့တောင် ဝယ်မပေးဘူး” ဟု ပင်းတယ ထွေအုပ်ရုံးမှ ဝန်ထမ်းတစ်ဦးက သျှမ်းသံတော်ဆင့်ကို ပြောသည်။

လက်ရှိ ပင်းတယ မြို့နယ်အထွေထွေ အုပ်ချုပ်ရေးမှူးရုံးမှ ဝန်ထမ်းများသည် ရုံးပိုင်းဆိုင်ရာလုပ်ငန်းများအပြင် ကျေးရွာများသို့ ကွင်းဆင်းပြီး ပြည်သူများ ကိုဗစ် – ၁၉ ကာကွယ်ဆေးထိုးနှံရန်အတွက် လိုက်လံဟောပြော စည်းရုံးရကြောင်းလည်း အထက်ပါ ပုဂ္ဂိုလ်က ပြောသည်။

“ရွာဆင်းပြီးတော့ ကျေးရွာလူကြီးနဲ့အတူ ရွာသူ/သားတွေ ကိုဗစ်ဆေး ထိုးဖို့ လိုက်စည်းရုံးရတယ်၊ ပြီးတော့ တစ်နေ့မှာ ဆေးထိုးသူ ဘယ်လောက်ရှိလဲ ဆိုတာ ပြန်ပြီး အကြောင်းကြားရတယ်၊ မလိုအပ်တဲ့ အစည်းအဝေးတွေ ခနခနခေါ်တယ်” ဟု၎င်းက ပြောသည်။

မြို့နယ် အထွေထွေအုပ်ချုပ်ရေးမှူး ဦးကျော်မိုးလွင်၏ အစည်းအဝေးခေါ်ဆိုမှုကြောင့် မြို့ပေါ်သို့ အစည်းအဝေး တက်ရောက်ရန်လာသည့် ကျုံးကျေးရွာမှ ကျေးရွာအုပ်ချုပ်ရေးမှူးသည် ဆိုင်ကယ်မှောက်ပြီး သေဆုံးသွားရကြောင်း သတင်းသိရသည်။

“ဒီဇင်ဘာလ ၁၄ ရက်မှာ ထွေအုပ်ရုံးက အစည်းအဝေးခေါ်လို့ လာရတဲ့ ရပ်ကျေးအုပ်ချုပ်ရေးမှူးက လမ်းမှာ ဆိုင်ကယ်မှောက်ပြီး သေဆုံးသွားရတယ်၊ အစည်းအဝေးခေါ်တဲ့ အကြောင်းရင်းက ရွာမှာ ကိုဗစ်ကာကွယ်ဆေး ထိုးတဲ့သူ နည်းတာ ဘာကြောင့်လဲဆိုတာ တင်ပြဖို့တဲ့” ဟု ပင်းတယဒေသခံ အမျိုးသားတစ်ဦးက သျှမ်းသံတော်ဆင့် ကို ပြောသည်။

ထို့ကြောင့် ဦးကျော်မိုးလွင်ကို သက်ဆိုင်ရာမှ ဖြေရှင်းပေးရန် ဒေသခံများက ပြောဆိုလိုက်သည်။