သျှမ်းပြည်အရှေ့ပိုင်း မိုင်းဆတ်မြို့တွင် ကိုဗစ် – ၁၉ ပိုးကူးစက်သူများ စစ်ကောင်စီလက်အောက်ခံ ပြည်သူ့ဆေးရုံတွင် ဆေးသွားကုသရာ တစ်ဦးကို သိန်း (၂၀)ကျပ် ပေးဆောင်ရကြောင်း စုံစမ်းသိရှိရသည်။
အဆိုပါ မိုင်းဆတ်ပြည်သူ့ဆေးရုံတွင် သာမန် ကိုဗစ် – ၁၉ ကုသနည်းဖြင့်ကုသပေးရာတွင်လည်း တစ်ဦးကို သိန်း (၂၀) အထက် ပေးဆောင်ကြရကြောင်း မိုင်းဆက်ဒေသခံများထံမှ သိရသည်။
“သူတို့လည်း ဒီလိုဘဲ ဆေးကုပေးတာ။ ကိုဗစ် ဖြစ်တာ သွေးလည်းစစ်တယ်။ ဓာတ်မှန်လည်း ရိုက်တယ်။ သွေးစစ်ခတွေလည်း အရမ်းဈေးကြီးတယ်။ ဆေးရုံကနေဆင်းလာတော့ သိန်း (၂၀)ကျော်လောက် ကျနော်တို့ ဆေးဖိုးပေးလိုက်ရတယ်” ဟု မိုင်းဆတ်မြို့ ကိုဗစ် ၁၉ ဖြစ်ပြီး ဆေးရုံမှဆင်းလာသူတစ်ဦးက ပြောသည်။
အဆိုပါ လူနာများက ဆေးရုံဆင်းရသည့် အချိန်တွင် ငွေကြေးကို တခါထဲ ပေးဆောင်ရပြီး ဆေးဖိုး ငွေဖြတ်ပိုင်း လက်မှတ်တောင်းရာတွင်လည်း မရရှိကြောင်း သိရသည်။
ထို့အပြင် ဒေသခံတချို့က ကိုဗစ် – ၁၉ ကြောင့် သေဆုံးသွားပြီး ဆေးရုံ၌ ဆေးကုသစရိတ်အတွက် အကြွေးတင်ကျန်နေသူများလည်း ရှိကြောင်း သိရသည်။
“ဆေးရုံဆင်းပြီး ပြန်လာတဲ့သူတွေကို မေးကြည့်တော့ ဆေးရုံဆင်းရတဲ့နေ့မှာ ဆေးလာပေးပြီး ပိုက်ဆံ တခါထဲကောက်သွားတယ်တဲ့။ ငွေဖြတ်ပိုင်းလက်မှတ်လည်းမရဘူး။ ဆေးဖိုးယူပြီးသွားလိုက်တာ။ သူတို့က ကိုဗစ် ဆေးအကောင်းစား သုံးပြီး ကုပေးတာလို့ပြောတယ်။ တချို့ ကိုဗစ်ကြောင့်သေတဲ့သူဆို ဆေးရုံမှာ အကြွေးတင်နေကြသေးတယ်” ဟု ဒေသခံ အမျိုးသားတစ်ဦးက ပြောသည်။
အဆိုပါ ငွေကြေး အဆမတန်တောင်းခံမှုကြောင့် ကိုဗစ် – ၁၉ ကူးစက်ခံရသည့် ဒေသခံ တချို့က ဆေးရုံတွင် ဆေးသွားမကုဘဲ နေအိမ်တွင် ကြိတ်ကုနေလျက်ရှိကြောင်း သိရသည်။
မိုင်းဆတ်မြို့တွင် လက်ရှိ အချိန်ထိ ကိုဗစ် – ၁၉ ပိုးတွေ့လူနာ ကျဆင်းလာခြင်းမရှိသေးကြောင်း သိရသည်။
“မနေ့ကဘဲ စစ်တာ ၉ ယောက်လောက်တွေ့တယ်။ ကျနော်တို့မြို့မှာက ဆေးရုံသွားတက်ရင် ပိုက်ဆံအများကြီးပေးရတော့ တချို့ ပြည်သူတွေက ကိုဗစ် ဖြစ်ရင် နေအိမ်မှာဘဲ ကြိတ်ကုလာတာမျိုးရှိတယ်။ ဆေးရုံမှာ မသွားကုကြတော့ဘူး။ အိမ်မှာ ဖြစ်သလိုကုကြတယ်” ဟု အထက်ပါဒေသခံ အမျိုးသားတစ်ဦးက ပြောသည်။
မြန်မာနိုင်ငံတွင် ကိုဗစ် ၁၉ ကုသရာတွင် လက်ရှိ အာဏာသိမ်း အိမ်စောင့်အစိုးရမှ အခမဲ့ ထောက်ပံ့ ကုသပေးနေလျက်ရှိကြောင်း သိရသည်။
မိုင်းဆတ်မြို့တွင် ဒီဇင်ဘာ ၁၅ ရက်နေ့ထိ ကိုဗစ် ၁၉ ပိုးတွေ့လူနာ (၁၆၀)ကျော် ကျန်ရှိနေသေးကြောင်း သိရသည်။