သျှမ်းပြည်အရှေ့ပိုင်း ကျိုင်းတုံမြို့ ယန်းခကျေးရွာအနီးတွင် စစ်ကောင်စီ အုပ်စုမှ သွားလာနေသည့်ကားများကို တားကာ ငွေကောက်ခံမှုပြုလုပ်နေကြောင်း စုံစမ်းသိရသည်။
“အဲ့လမ်းပေါ်မှာ အမြဲတမ်းစောင့်ပြီး စစ်နေတာတော့ မဟုတ်ဘူးဗျ၊ ရှောင်တခင် စစ်တာပါတဲ့၊ ဒါပေမဲ့ သူတို့မှာ အဖွဲ့လည်း မစုံဘူး၊ စစ်သား ၁၀ ယောက်ဝန်းကျင် ရှိမယ်၊ စကားပြောတာလည်း အရမ်းရိုင်းတယ်” ဟု ကိုယ်တိုင်ကြုံတွေ့ရသည့် မိုင်းဖြတ်မှ ကားသမားတစ်ဦးက ပြောသည်။
အဆိုပါ လာစောင့်သည့် စစ်ကောင်စီတပ်သားတို့သည် ယူနီဖောင်း ဝတ်စုံနှင့် သေနတ်ပါရှိပြီး ကားနှစ်စီးဖြင့် လာစောင့်လေ့ရှိကြောင်း ၎င်းက သျှမ်းသံတော်ဆင့်ကို ပြောသည်။
ပြီးခဲ့သည့် ဒီဇင်ဘာလ ၁၂ ရက်နေ့တွင် ကျိုင်းတုံ တာချီလိတ်ကားမောင်းသည့် ကားသမား တစ်ဦးကလည်း နမ့်ယန်းကျေးရွာအနီးတွင် စစ်ကောင်စီတပ်သားတို့၏ တားမြစ်စစ်ဆေးခြင်းကို ခံရပြီး ပိုက်ဆံတောင်းသည့်အတွက် ငွေ ၃၀၀၀၀ ကျပ် ပေးလိုက်ရကြောင်း သတင်းသိရသည်။
“သူတို့က ညအချိန်ပဲ စောင့်တယ်ထင်တယ်ဗျ၊ ဘာဖြစ်လို့လဲဆို ကျနော် ကျိုင်းတုံကိုဝင်တဲ့ နေ့ခင်းပိုင်းတုန်းက မတွေ့ ဘူး၊ ညအချိန် ကားပြန်ထွက်မှ ယန်းခရွာအနီးမှာ သူတို့ စောင့်နေတာတွေ့တယ်၊ ပိုက်ဆံတောင်းလို့ ၃၀၀၀၀ ပေးလိုက် ရတယ်” ဟု အဆိုပါ ကားသမားက သျှမ်းသံတော်ဆင့်ကို ပြောသည်။
ယန်းခကျေးရွာသည် ကျိုင်းတုံနှင့် တာချီလိတ်ကြား မိုင်းဖြတ်မရောက်ခင်တွင် ရှိသည့် တိုင်းရင်းသားကျေးရွာ ဖြစ်သည်။
အာဏာသိမ်းပြီးနောက်ပိုင်း အဆိုပါ ကျေးရွာအနီး လမ်းမပေါ် ဖြတ်သန်းသွားလာသည့် ကားသမားများကို စစ်ကောင်စီတပ်သားများမှ တားမြစ်စစ်ဆေးပိုက်ဆံတောင်းသည့်အတွက် ဒေသခံ ပြည်သူများနှင့် ကားသမားများ သွားလာရေးခက်ခဲနေကြောင်း သိရသည်။
Leave a Comments