သျှမ်းမြောက် ကျောက်မဲမြို့ မြို့နယ်ပညာရေးမှူးရုံးအနီးတွင် ယနေ့ (ဒီဇင်ဘာ ၁၁)ရက် မနက် ၁၁ နာရီ ဝန်းကျင်က ဗုံးပေါက်ကွဲမှု ဖြစ်ပွားခဲ့ကြောင်း သတင်းသိရသည်။
ထို မြို့နယ် ပညာရေးမှူးရုံးသည် ရပ်ကွက် ၇ မြောက်ကုန်းတွင် တည်ရှိပြီး ပေါက်ကွဲမှုဖြစ်ပြီးနောက် လမ်းသွားလမ်းလာများအား စစ်ဆေးမှုများလည်း ပြုလုပ်ခဲ့ကြောင်း သိရသည်။
“လက်လုပ်ဗုံးကွဲတာလို့ ပြောတယ်။ မြို့နယ် ပညာရေးမှူးရုံးနားမှာ ပေါက်ကွဲတာ။ ရုံးထဲပေါက်တာတော့ မဟုတ်ဘူး။ လူထိခိုက်တာလည်း မရှိဘူး” ဟု ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ထို ဗုံးပေါက်ကွဲပြီးနောက် ရပ်ကွက် ၆ သံလမ်းနှင့် နမ့်စောင်းငေါင်းချောင်းအနီးတွင် ပစ်ခတ်မှု ဖြစ်ပွားခဲ့ကြောင်းလည်း ဒေသခံများထံမှ သိရသည်။
“သံလမ်းနားမှာ ပစ်ခတ်မှု ဖြစ်တယ်လို့တော့ ကြားမိတယ်။ ဗုံးပေါက်ပြီး နာရီဝက်ကျော်ကျော်လောက်မှာ ပစ်ခတ်မှုဖြစ်တာ။ ဘယ်သူတွေလည်းတော့ သေချာမသိဘူး” ဟု ဒေသခံ အမျိုးသားတစ်ဦးက ပြောသည်။
ပြီးခဲ့သည့် ဇူလိုင်လကုန်ပိုင်းတွင်လည်း ရပ်ကွက် ၈ ရှိ အထက ၁ ကျောင်းဝန်းအတွင်း ဗုံးပေါက်ကွဲမှု ဖြစ်ပွားခဲ့ဖူးကြောင်း သိရသည်။
ကျောက်မဲမြို့နယ်တွင် ကိုဗစ်ကူးစက်မှုများရှိနေသော်လည်း စစ်ကောင်စီက စာသင်ကျောင်းများကို ဖွင့်လှစ်ထားကြောင်း သိရသည်။
Leave a Comments