သျှမ်းပြည် မြောက်ပိုင်း မူဆယ်မြို့အတွင်း ယနေ့ အသံတိတ် သပိတ်နေ့တွင် စျေးဆိုင်ပိတ်သည့် သူများကို လိုက်လံခြိမ်းခြောက်ခဲ့သည့် မူဆယ် စည်ပင်သာယာရေးဌာန ဗုံးခွဲ တိုက်ခိုက်ခံရကြောင်း သတင်းသိရသည်။
နိုင်ငံတကာ လူ့အခွင့်အရေးနေ့ဖြစ်သည့် ယနေ့ (ဒီဇင်ဘာ ၁၀ ရက်)တွင် နိုင်ငံတ၀ှမ်းလုံးအနေဖြင့် ငြိမ်သက် ခြင်းသပိတ် Silent Strike ဆင်နွှဲကြရာ မူဆယ်မြို့တွင်းမှ ဆိုင်ခန်းပိုင်ရှင်များလည်း ပါဝင်လှုပ်ဆောင်ခဲ့ပြီး စည်ပင်သာယာရေးဌာနမှ ဆိုင်ခန်းများကို ဖွင့်လှစ်ကြရန် ဖိအားပေး ခြိမ်းခြောက်မှု ဆော်သြခဲ့သည်။
“ဒီနေ့မနက်မှာ ဆိုင်တွေအကုန်လုံးပိတ်ကြတော့ စည်ပင်တွေက လော်နဲ့ ဆိုင်တွေပြန်ဖွင့်ရမယ်၊ မဖွင့်ရင် တစ်လတိတိ ဆိုင်ပိတ်ခံရမယ်ဆိုပြီးတော့ ခြိမ်းခြောက်သွားတာ၊ ဒါပေမယ့် ဒီ နေ့လည်ပိုင်းတော့ သူတို့ဌာနက ဗုံးခွဲခံလိုက်ရတယ်” ဟု မူဆယ်မြို့နေ အမျိုးသားတစ်ဦးက ပြောသည်။
ယနေ့ ဒီဇင်ဘာလ ၁၀ ရက်နေ့ နေ့လည် ၁ နာရီကျော်အချိန် မူဆယ်မြို့ ဈေးရပ်ကွက်ရှိ စည်ပင်သာယာရေးဌာနရုံးတွင် ဗုံးတစ်လုံးပေါက်ကွဲပြီး စည်ပင်ဌာနမှ ဝန်ထမ်းနှစ်ဦး ထိခိုက်ဒဏ်ရာရသွားကြောင်း မူဆယ်မြို့နေ အသက် ၄၀ နှစ်ဝန်းကျင်ရှိ အမျိုးသားတစ်ဦးက သျှမ်းသံတောဆင့်ကို ပြောသည်။
“ဗုံးက တစ်လုံးတည်းပါ၊ လူနှစ်ယောက်ထိထားတယ်လို့ ပြောတယ်၊ လက်ရှိမှာလည်း လူနာတင်ကားနဲ့ ပရဟိတကားတွေ သုံးစီးလောက် ဝင်သွားတာလည်းတွေ့တယ်၊ ထိတဲ့သူက ဘယ်သူလဲတော့ မသိရသေးဘူး” ဟု ၎င်းက ပြောသည်။
အဆိုပါ ဗုံးပေါက်ကွဲမှုကြောင့် ထိခိုက်ဒဏ်ရာရသူ နှစ်ဦးရှိနေသည်ဟု သိရပြီး လက်ရှိမှာတော့ စစ်ကောင်စီ တပ်ဖွဲ့ဝင်များ၊ လူနာတင်ကားများ၊ ပရဟိတကားများ ရောက်ရှိနေကြောင်းလည်း သိရသည်။
Leave a Comments