သျှမ်းပြည်တောင်ပိုင်း တောင်ကြီးမြို့ အခြေစိုက် ကမ္ဘောဇတိုင်း သတင်းထောက်များ ထောင်ဒဏ် ၃ နှစ်စီ ချမှတ်ခံရကြောင်း စုံစမ်းသိရသည်။
ညောင်ရွှေ အကျဉ်းထောင် (တောင်လေးလုံးထောင်)တွင် (၈)လကျော် ဖမ်းဆီးထိန်းသိမ်းခံထားရသည့် သတင်းထောက် (၃)ဦး အပါအဝင် သတင်းသမားဟု စွပ်စွဲခံရသူ မိသားစုဝင် တစ်ဦး စုစုပေါင်း (၄)ဦးကို ယနေ့ ဒီဇင်ဘာ (၁၀)ရက်မှာ ထောင်တွင်း တရားရုံးက ထောင်ဒဏ် (၃)နှစ်စီ ချမှတ်ခဲ့ကြောင်း သတင်းရရှိသည်။
“အခုလို အမြင့်ဆုံး ချမှတ်လိုက်တဲ့ အပေါ်မှာတော့ ထူးပြီး ပြောစရာ မရှိပါဘူး။ တစ်နိုင်ငံလုံးမှာ မတရားမှုတွေ စိုးမိုးနေတာကြောင့်ပါ။ ဒါပေမယ့် သတင်းသမား မဟုတ်တဲ့ မိသားစုဝင်ကို ဓါးစာခံမျိုး ဖမ်းပြီး ထောင်ချလိုက်တာတော့ အဓိပ္ပါယ်မရှိဘူး။ နောက်တစ်ချက်က မြန်မာနိုင်ငံနဲ့ သျှမ်းပြည်နယ်ရဲ့ သတင်းမီဒီယာ လွတ်လပ်ခွင့်ကို ရိုက်ချိုးခံလိုက်ရတာလို့ မြင်ပါတယ်” ဟု ကမ္ဘောဇတိုင်း အယ်ဒီတာ စိုင်းဇေတိုင်းက ပြောသည်။
ထောင်တွင်း တရားရုံးမှာ ဧပြီ (၈)ရက်မှ ယနေ့ ဒီဇင်ဘာ (၁၀)ရက်ထိ ရုံးချိန်း (၁၉)ကြိမ်အတွင်း စစ်ဆေးခြင်း၊ ကြားနာခြင်း စွဲချက် လျှောက်လဲချက်များ တင်ပြီးနောက် ယနေ့မှာ ထောင်ဒဏ် (၃)နှစ်စီ ချမှတ်လိုက်ကြောင်း သိရသည်။
“သီးသန့်တွေ့တာမျိုးတော့ မရဘူး။ တရားခံပြ သက်သေအနေနဲ့ ထွက်ဆိုတဲ့ မိသားစုဝင်တွေကတော့ စကားပြောခွင့်ရတယ်လို့သိရတယ်။ ထောင်ဝင်စာ ပစ္စည်းကတော့ (၂)ပတ် တစ်ကြိမ် ပို့ခွင့်ရတယ်” လို့ စိုင်းဇေတိုင်း က ပြောသည်။
ထိုထောင်ဒဏ်ချမှတ်ခံရသူ (၄)ဦးသည် မတ်လ (၂၄)ရက် ညပိုင်းက ဟိုပုံးမြို့ရှိ နေအိမ်မှာ ဖမ်းဆီးခံရပြီး ရာဇသတ်ကြီး ပုဒ်မ ၅၀၅ – က ဖြင့် တောင်လေးလုံးထောင်တွင် (၈)လကျော်ကြာ ချုပ်နှောင်ခံထားရခြင်း ဖြစ်သည်။
သျှမ်းပြည်တွင်းရှိ သတင်းသမား (၁၀)ဦး ဖမ်းဆီးခံခဲ့ရသည့်အနက် (၄)ဦး ပြန်လည်လွတ်မြောက်လာကာ (၆)ဦး ကျန်ရှိကြောင်း သိရှိရသည်။
ဖေဖော်ဝါရီ (၁) ရက်က စစ်တပ်အာဏာသိမ်းပြီးနောက် ယနေ့ထိ ဖမ်းဆီးထိန်းသိမ်းခံရသည့် သတင်းသမား (၁၁၀) ဦး အနက် (၄၀) ဦးမှာ ယနေ့ထိ ချုပ်နှောင်ခံထားရဆဲဖြစ်ကြောင်း သိရသည်။
Leave a Comments