သျှမ်းပြည်တောင်ပိုင်း ဖယ်ခုံမြို့နယ် ခေါင်းအိကျေးရွာအုပ်စု ကောင်ဝှပ်ကျေးရွာ ဒေသခံတစ်ဦး ဖြစ်သည့် ကိုလှဝင်း ၏ ပုတ်ပွနေသည့် ရုပ်အလောင်းကို ယမန်နေ့ (ဒီဇင်ဘာ ၉)ရက်တွင် ပြန်တွေ့ရှိခဲ့ကြောင်း စုံစမ်းသိရသည်။
ကိုလှဝင်း ကို စစ်ကောင်စီက နိုဝင်ဘာ ၁၂ ရက်တွင် ၎င်း၏ နေအိမ်မှာ လာရောက်ဖမ်းဆီးသွားခဲ့ပြီး၊ တလနီးပါးအကြာ ယမန်နေ့ (ဒီဇင်ဘာ ၉)ရက်၌ ပုတ်ပွနေသည့် ရုပ်အလောင်းကို တွေ့ရှိခဲ့တာဖြစ်ကြောင်း၊ ခန္ဓာကိုယ်ပေါ်တွင်လည်း သေနတ်ဒဏ်ရာနှင့် ရိုက်ခံထားရသည့် ဒဏ်ရာများ တွေ့ရှိရကြောင်း သိရသည်။
“မနေ့ကမှပဲ သူ့ရဲ့ ရုပ်အလောင်းကို ပြန်တွေ့တာ။ ရုပ်အလောင်းကလည်း ပုတ်ပွနေတာပဲ။ ပြီးတော့ အနံ့လည်း ထွက်နေပြီး။ ခေါင်းအနောက်ဖက်မှာ ရိုက်ခံထားရတာ။ ခြေထောက်မှာကောဘဲ။ သေနတ်ဒဏ်ရာတွေလည်းပါတယ်” ဟု အမည်မဖော်လိုသည့် ဖယ်ခုံမြို့နယ် ဒေသခံ အမျိုးသားတစ်ဦးက ပြောသည်။
ကိုလှဝင်းသည် သာမန်အရပ်သားတစ်ဦးဖြစ်ပြီး ပရဟိတအလုပ် လုပ်ကိုင်သူတစ်ဦးလည်းဖြစ်ကြောင်း၊ ၎င်းကို စစ်ကောင်စီတပ်ဖွဲ့ တပ်မ (၆၆)က လာရောက်ဖမ်းဆီးစဉ်တွင် PDF တပ်ဖွဲ့ဝင်ဟု စွတ်စွဲကာ PDF တပ်ဖွဲ့ဝတ်စုံ ပြောင်းလှဲဝတ်ခိုင်းပြီး ဖမ်းဆီးသွားကြောင်း မျက်မြင်တွေ့ရှိသူများက ပြေသည်။
“သူ့ဖုန်းကို စစ်တော့ လက်နက်ကိုင်ပုံတွေရှိတယ်ဆိုပြီးတော့ ဖမ်းသွားတာ။ ပြီးတော့ PDF ဝတ်စုံလှဲခိုင်းပြီးတော့ ခေါ်သွားတယ်။ သူက ပရဟိတအလုပ်တွေပဲလုပ်တာ။ စစ်ဘေးရှောင် ကူညီပေးတယ်။ လက်နက်ကိုင်တာမျိုးတော့ မရှိဘူး” ဟု အထက်ပါ ဒေသခံ တစ်ဦးက ပြောသည်။
လက်ရှိ ကိုလှဝင်း သေဆုံးပြီး ပုတ်ပွနေသည့် ရုပ်အလောင်းကို တွေ့ရှိပြီးနောက် ၎င်း၏ မိသားစုဝင်များက စိတ်ဒဏ်ရာများဖြင့် ကြောက်ရွံ့နေကြရကြောင်း ၎င်း၏ မိသားစုနှင့် နီးစပ်သူများက ပြောသည်။
“ကိုလှဝင်း သေသွားတော့ သူရဲ့ မိသားစုဝင်တွေ စိတ်မကောင်းဖြစ်နေကြတယ်။ ကြောက်နေကြတယ်။ ဘာမှ မပြောရဲဘူး။ သူ့မှာ မိခင်နဲ့ ညီမလေးပဲကျန်တယ်။ သူတို့စားဝတ်နေရေးအတွက်လည်း ခက်ခဲလာတယ်။ ဘာမှ မလုပ်ရဲဘူးဖြစ်နေတာ။ သူတို့မှာ ကိုလှဝင်းကို အဓိက အားကိုးရတယ်လေ” ဟု ၎င်းတို့မိသားစုနှင့် နီးစပ်သူ အမျိုးသားတစ်ဦးက ပြောသည်။
သျှမ်းသံတော်ဆင့်မှ ရရှိထားသည့် စာရင်းအရ ဖယ်ခုံမြို့နယ်အတွင်း စစ်ကောင်စီမှ ဖမ်းဆီးထားသူ စုစုပေါင်း (၁၆)ဦး ရှိပြီး ပရဟိတလုပ်သူ ကိုလှဝင်း အပါအဝင် (၂)ဦး သေဆုံးသွားပြီးဖြစ်ကြောင်း သိရသည်။
Leave a Comments