သျှမ်းပြည်မြောက်ပိုင်း နောင်ချိုမြို့နယ် ဒိုးပင်ကျေးရွာတွင် မြေ ငှားရမ်းစိုက်ပျိုးသူ တချို့ မြေယာသိမ်းရန် ကြိုးစားနေကြောင်း စုံစမ်းသိရသည်။
နောင်ချိုမြို့နယ် ဒိုးပင်ကျေးရွာပိုင်မြေကို ဒေသခံနှင့် သံဃာတော်များက မြေယာ အငှားချပေးခဲ့ရာ ထိုမြေငှားမှ မြေယာပိုင်ဆိုင်ရန် ကြိုးစားနေကြောင်း ဒိုးပင်ကျေးရွာ ဒေသခံနှင့် ဆရာတော်က ပြောဆိုသည်။
“အစက မြေယာမှာ သီးနှံ စိုက်ပျိုးခွင့် (၁၀)နှစ် ငှားပေးတယ်။ ဒါပေမယ့် ကျနော်တို့က နှစ်ရှည်ပင်တွေ စိုက်ခွင့်မပေးထားဘူး။ နောက် အခု သူက မြေယာပိုင်ဆိုင်ဖို့ လုပ်နေတယ်။ ဒါကို ကျနော်တို့ စိတ်ပူနေရတယ်” ဟု ဒိုးပင်ကျေးရွာမှ ဦးဇင်းတစ်ပါးက သျှမ်းသံတော်ဆင့်ကို မိန့်ကြားသည်။
လက်ရှိ ဒိုးပင်ကျေးရွာပိုင်မြေယာ အငှားလုပ်ကိုင်နေသည့် သူ နှင့် ဒိုးပင်ကျေးရွာ အုပ်ချုပ်ရေးမှူးတို့ ပူးပေါင်းပြီး မြေယာပုံစံ (၇) ပြုလုပ်နေကာ ဒေသခံများကို လာရောက်လက်မှတ်ရေးထိုးခိုင်းနေကြောင်းလည်း ဒိုးပင်ကျေးရွာ မှ ဒေသခံ အမျိုးသား တစ်ဦးက ပြောသည်။
