သျှမ်းပြည်တောင်ပိုင်း တောင်ကြီးမြို့အဝင်၊ အထွက်တွင် စစ်ကောင်စီတပ်မှ လုံခြုံရေးတင်းကြပ်စွာ ဆောင်ရွက်နေကြောင်း စုံစမ်းသိရှိရသည်။
စစ်ကောင်စီမှ လုံခြုံရေး တင်းကြပ်မှုသည် တောင်ကြီးမြို့သို့ ဝင်ရန်အတွက် ဟိုပုံးတိုးဂိတ်မှာ တစ်နေရာ၊ တောင်ကြီး (၄)မိုင်မှာ တစ်နေရာနှင့် ရှမ်းကွင်းသို့ သွားမည့် သူများလည်း ရှမ်းကွင်းအဝင်မှာ တစ်နေရာ စစ်ဆေးခြင်းများ ပြုလုပ်နေသည်။
“တောင်ကြီးမြို့ပေါ် ရောက်ဖို့ မိနစ် (၃၀)လောက် စောင့်ရတယ်။ တောင်ကြီးမှာ လုံခြုံရေး စစ်တာကတော့ ကြမ်းတယ်။ ဘယ်သွားလာလဲ၊ ဘယ်ကနေ လာလဲ ဆိုတာ မေးတယ်။ မိန်းကလေးဆို မစစ်ဘူး။ မှတ်ပုံတင်တော့ တောင်းကြည့်တယ်။ ယောကျာ်းလေး ကားဆို တအားစစ်တယ်” ဟု တောင်ကြီးမြို့သို့ ခရီးသွား တစ်ဦး က သျှမ်းသံတော်ဆင့်ကို ပြောသည်။
လုံခြုံရေး တင်းကြပ်မှုကြောင့် တောင်ကြီးမြို့ပေါ်ရှိ ဒေသခံများလည်း (Public)နေရာ လူအများသွားလာသည့် နေရာမှာ သွားရောက်အပန်းဖြေခြင်း မတွေ့ရတော့ကြောင်း တောင်ကြီးဒေသခံ တစ်ဦးကပြောသည်။
“အဝေရာ မီးပုံးပျံကွင်းလို နေရာမျိုးမှာလဲ လူငယ်တွေ မရှိတော့ဘူး။ ညမှောင်တာတဲ့ အိမ်အပြင်တွေ မထွက်ရဲကြတော့ဘူး” ဟု တောင်ကြီးဒေသခံ အမျိုးသမီး တစ်ဦးက ပြောသည်။
အေးသာယာမြို့မှ တောင်ကြီးသို့လာလျှင် အေးသာယာအထွက်မှာ စစ်ဆေးရေးဂိတ် တစ်နေရာနှင့် တောင်ကြီး အတက်မှာ စစ်ဆေးရေးဂိတ် တစ်နေရာ ရှိကြောင်း သိရှိရသည်။
ဖေဖော်ဝါရီ (၁)ရက်နေ့ စစ်ကောင်စီက နိုင်ငံတော်အာဏာကို သိမ်းယူပြီးနောက် ဖေဖော်ဝါရီ ဒုတိယပတ်မှ စတင်ပြီး တောင်ကြီးမြို့ ဒေသခံလူငယ်များလည်း စစ်အာဏာသိမ်းမှုကို ဆန့်ကျင်ဆန္ဒပြခဲ့ကြောင်း သိရသည်။
Leave a Comments