သျှမ်းပြည်မြောက်ပိုင်း ကွတ်ခိုင်မြို့နယ် ပန်လောကျေးရွာ မြေယာကိစ္စကြောင့် ကချင်လွတ်မြောက်ရေးတပ်မတော် KIA က သိမ်းယူထားသည့် ဒေသခံဆိုင်ကယ် ၁၅ စီး ယနေ့ချိန်ထိ ပြန်မရသေးကြောင်း စုံစမ်းသိရသည်။
ထိုဒေသခံ ဆိုင်ကယ် ၁၅ စီးကို KIA တပ်ဖွဲ့က ငွေ ၁၅ သိန်းနှင့် နွားတစ်ကောင်ကို လာပေးဆောင်ပြီး ထုတ်ယူနိုင်ကြောင်း ပြောခဲ့သော်လည်း လက်ရှိတွင် ဒေသခံများက ငွေကြေးအဆင်မပြေသောကြောင့် သွားရောက်မပေးဆောင်နိုင်ကြောင်း သိရသည်။
“ပိုက်ဆံလည်း မပြည့်သေးဘူး။ တချို့ကတော့လည်း သွားပေးလို့ပြောတယ်။ တချို့လည်းမပေးသေးနဲ့ စောင့်ကြည့်အုံးလို့ ပြောတာဖြစ်တဲ့အတွက်ကြောင့် ကျနော်တို့လည်း သွားမပေးသေးဘူး။ ပိုက်ဆံလည်း စုနေတာ မပြည့်သေးတာလည်း ပါတယ်” ဟု ပန်လောကျေးရွာခံ အမျိုးသားတစ်ဦးက ပြောသည်။
ထိုဆိုင်ကယ် (၁၅)စီးကို ဒေသခံ တချို့က စားဝတ်နေရေးအတွက် ခက်ခဲမှုများရှိလာသောကြောင့် ပြန်လည်ပေးဆောင်ရန်အတွက် ဒေသခံတချို့က တောင်းဆိုထားသည်။
“တချို့ပြည်သူတွေကတော့ ဆိုင်ကယ်တွေနဲ့ ဈေးသွားလာတာရှိတယ်လေ။ ခြံတွေသွားတာရှိတာပေါ့။ အခု ဆိုင်ကယ်မရှိတော့ သွားလာဖို့ခက်ခဲတယ်။ နောက်တော့ စားဝတ်နေရေးအတွက် ခက်ခဲလာတာတော့ရှိတာပေါ့။ ဆိုင်ကယ်ကိုတော့ ပြန်လိုချင်တာပေါ့” ဟု ပန်လောကျေးရွာ ဒေသခံတစ်ဦးက ဆိုသည်။
ထိုကိစ္စနှင့် ပတ်သက်ပြီး ကချင်လွတ်မြောက်ရေးတပ်မတော် KIA က ငွေကြေးအဆင်မပြေသည့် အကြောင်းပြချက်သည် ဆင်ခြေ ဖြစ်ကြောင်း KIA ပြောခွင့်ရှိသူ ဦးဘရန်ဂေါင်က ပြောသည်။
“တရွာလုံးနဲ့ပေါင်းပေးခိုင်းတာ ၁၅ သိန်းလောက်မရှိဘူးဆိုတာ မဖြစ်နိုင်ဘူး။ ရုပ်တိမရှိတာ။ သူတို့ကနေလည်း ကျနော်တို့ကို တိုက်ရိုက်ဆက်သွယ်လာတာမရှိဘူး။ တခြားအဖွဲ့အစည်းတွေနား အကူညီတောင်းပြီးတော့ လုပ်နေတာ” ဟု ဦးဘရန်ဂေါင်က သျှမ်းသံတော်ဆင့်ကို ပြောသည်။
ပန်လောကျေးရွာဒေသခံများက KIA ပိုင် နယ်မြေထဲ သစ်၊ ဝါးများကို ခုတ်ခဲ့သောကြောင့် သိန်း ၅၀ လျော်ကြေးတောင်းခဲ့သော်လည်း ဒေသခံများက ငွေ ၁၅ သိန်းနှင့် နွားတကောင် လာပေးဆောင်မည်ဟု ညှိနှိုင်းခဲ့ကြောင်း သိရသည်။
လွန်ခဲ့သည့် အောက်တိုဘာ ၂၄ ရက်နေ့တွင် နယ်မြေကျူးကျော် သစ်ပင်ခုတ်ယူမှုကြောင့် KIA တပ်ဖွဲ့မှ ပန်လောဒေသခံ (၆) ဦးကို ရိုက်နှက်ခဲ့ပြီး ဆိုင်ကယ် ၁၅ စီးကို သိမ်းယူထားကြောင်း သိရသည်။
