သျှမ်းမြောက် ကျောက်မဲမြို့ သျှမ်းစာပေနှင့်ယဥ်ကျေးမှုမြေနေရာတွင် ရောက်ရှိနေသည့် စစ်ဘေးရှောင် အမျိုးသမီးတစ်ဦးထံမှ ကိုဗစ်ပိုး စစ်ဆေးတွေ့ရှိခဲ့ကြောင်း သတင်းသိရသည်။
ယမန်နေ့ (နိုဝင်ဘာ ၂၈) တွင် စစ်ဘေးရှောင်များထဲမှ ကျန်းမာရေးမကောင်းသည့် အသက် (၈၀)အရွယ် အမျိုးသမီးတစ်ဦးကို စစ်ဆေးလိုက်ရာ ကိုဗစ်ပိုး တွေ့ရှိခဲ့ကြောင်း၊ လက်ရှိစစ်ရှောင်စခန်းမှာ ကျန်းမာရေးမကောင်းသည့် သူများလည်း ရှိနေကြောင်း သျှမ်းစာပေ နှင့် ယဉ်ကျေးမှု အသင်း ဥက္ကဌ လုင်းလျန်းဟန် က သျှမ်းသံတော်ဆင့် ကို ပြောသည်။
“နေမကောင်းဖြစ်နေလို့ စစ်လိုက်တာ၊ ပိုးတွေ့တာပဲ၊ သက်ကြီး အမျိုးသမီးတစ်ဦးပါ၊ အဲ့မှာက လူများတယ် ဆိုတော့ သူနေတဲ့ အဆောင်မှာ ရှိတဲ့သူတွေကို အားလုံး အယောက် ၈၀ ကို စစ်တာ နောက်ထပ်ပိုးတွေ့တဲ့သူတော့ မရှိဘူး” ဟု သျှမ်းစာပေနှင့်ယဥ်ကျေးမှုအသင်း ဥက္ကဌ လုင်းလျန်းဟန် က သျှမ်းသံတော်ဆင့်ကို ပြောသည်။
ပိုးတွေ့လူနာသည် တွန်ဟိန့်ကျေးရွာမှ ကျောက်မဲမြို့ပေါ်သို့ စစ်ရှောင်လာခဲ့တာဖြစ်ကြောင်း၊ လွန်ခဲ့သည့် (၅)ရက်ခန့်ကမှ သျှမ်းစာပေနှင့်ယဥ်ကျေးမှုအသင်း စစ်ရှောင်စခန်းသို့ ပြောင်းရွှေ့လာခဲ့သူ ဖြစ်ကြောင်း သိရသည်။
ထို့အပြင် အမှတ် (၈)ရပ်ကွက် သန္တိသုခ ဓမ္မာရုံရှိ စစ်ရှောင်စခန်းမှ စစ်ဘေးရှောင် သက်ကြီး သီလရှင်တစ်ပါးလည်း ကျန်းမာရေးမကောင်းသည့်အတွက် ကျောက်မဲပြည်သူ့ဆေးရုံသို့ ပို့ဆောင်ထားရကြောင်း သိရသည်။
“သက်ကြီး သီလရှင်တစ်ပါးပဲ၊ ကိုဗစ်လက္ခဏာလိုတော့ဖြစ်တယ်၊ အောက်ဆီဂျင်လည်း ကျနေတယ်၊ ဒါပေမယ့် Tast Kit နဲ့ စစ်ကြည့်တာတော့ ကိုဗစ်မတွေ့သေးဘူး၊ အဲ့စခန်းမှာရှိတဲ့ စစ်ရှောင်တွေကို စစ်ကြည့်ရဦးမှာပါ၊ ကျန်းမာရေးမကောင်းတဲ့သူတွေလည်း များနေတယ်” ဟု လုင်းလျန်းဟန် က ပြောသည်။
ကျောက်မဲမြို့နယ်တွင် နေရပ်မပြန်ရဲသေးသည့် စစ်ဘေးရှောင်ပြည်သူ (၂၀၀၀)ဝန်ကျင်ထိ ရှိနေသေးကြောင်း စစ်ရှောင်ကူညီသူများထံမှ သိရသည်။
Leave a Comments