ရပ်စောက်မြို့နယ် အာဏာာရှင်ဆန့်ကျင်မှုကြောင့် ဖမ်းဆီးခံရသူများ ထောင်ဒဏ် ၂ နှစ်ချမှတ်

0

သျှမ်းပြည်တောင်ပိုင်း ရပ်စောက်မြို့နယ်အတွင်း စစ်တပ်မှ အာဏာသိမ်းမှုကို ဆန့်ကျင်ဆန္ဒပြမှုကြောင့် ဖမ်းဆီးထိန်းသိမ်းခြင်းခံရသူများကို စစ်ကောင်စီက ထောင်ဒဏ် ၂ နှစ် ချမှတ်လိုက်ကြောင်း စုံစမ်းသိရသည်။

ပြီးခဲ့သည့် နိုဝင်ဘာလ ၂၂ ရက်နေ့တွင် ညောင်ရွှေအကျဥ်းထောင် (တောင်လေးလုံးထောင်)၌ ဖမ်းဆီးထိန်းသိမ်း ခံရသော ရပ်စောက်မြို့နယ်မှ ပြည်သူ ၆ ဦးကို ထောင်တွင်းတရားရုံးမှ ထောင်ဒဏ် ၂ နှစ်စီ ပြစ်ဒဏ် ချမှတ်လိုက်ကြောင်း သိရသည်။

“တချို့က သပိတ်ကြောင်းမှာ ပါလို့ အဖမ်းခံရတဲ့သူတွေဖြစ်တယ်၊ ဒါပေမဲ့ တချို့က မတရားစွပ်စွဲချက်တွေနဲ့ အဖမ်းခံရတာ၊ ထောင်ထဲမှာပဲ တရားရင်ဆိုင်ရင်းနဲ့ ပြီးခဲ့တဲ့ ၂၂ ရက်နေ့မှာ ထောင်တွင်းတရားရုံးကနေ သူတို့ ၆ ယောက်ကို ထောင်ဒဏ် ၂ နှစ်စီ ချလိုက်တယ်” ဟု ဖမ်းဆီးခံရသူနှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။

စစ်တပ်မှ အာဏာသိမ်းယူမှုကို ဆန့်ကျင်ဆန္ဒပြသူများနှင့် ဆန္ဒပြသူများကို စားသောက်ဖွယ်ရာများ ဝေငှပေး သူများဖြစ်ကြသည့် ဦးမောင်မောင်တင့် (ခ) ကိုတူး၊ ကိုကာစင်၊ ကိုဇော်ဝင်းထွန်း၊ ကိုဇော်ထူးနှင့် အမည်မသိရ သေးသည့် ရပ်စောက်မြို့နယ်မှ ပြစ်ဒဏ်ချခံရသူ ၂ ဦးတို့ကို သဘာဝဘေးအန္တရာယ် ပုဒ်မဖြင့် စွဲဆိုထားရာမှ ထောင် ဒဏ် ၂ နှစ်ချမှတ်လိုက်ကြောင်းလည်း ၎င်းက ပြောသည်။

“စစ်တပ်ကနေ အာဏာသိမ်းလိုက်တဲ့ ၉ လကျော် ၁၀ လ အတွင်းမှာ စစ်ကောင်စီက ဥပဒေကို အလွဲသုံးစားလုပ်ပြီး မူမမှန်တဲ့ လုပ်ဆောင်ချက်တွေရှိနေတယ်၊ အာဏာကလည်း သူတို့လက်ထဲမှာပဲရှိနေတော့ တရားခံဘက်ကလည်း အယူခံခွင့်မရှိဘူး၊ တရားမျှတမှုဆိုတာလည်း မရှိပါဘူး” ဟု ရပ်စောက်မြို့နယ်အတွင်းမှ ရှေ့နေတစ်ဦးကလည်း ပြောသည်။

ထို့အပြင် သျှမ်းပြည် အရှေ့ပိုင်းရှိ တာချီလိတ်မြို့တွင်လည်း အာဏာသိမ်းစစ်တပ်အားဆန့်ကျင်မှုဖြင့် ဖမ်းဆီးခံ ထားရသည့် အသက် (၁၈)နှစ်မှ (၂၄)နှစ်အရွယ် လူငယ် (၅)ဦးကို အာဏာသိမ်းစစ်ကောင်စီ တရားရုံးက ထောင်ဒဏ် (၁၀)နှစ်မှ (၁၃)နှစ်အထိ အမြင့်ဆုံးပြစ်ဒဏ်များ ချမှတ်လိုက်ကြောင်းသိရသည်။

Leave a Comments