သျှမ်းပြည်တောင်ပိုင်း ပင်လောင်းမြို့နယ်တွင် ကိုဗစ် ၁၉ ကူးစက်ပြန့်ပွားမှုကို ဆက်လက်ထိန်းချုပ်ရန်အတွက် Lockdown ဆက်လက် ချသွားမည်ဖြစ်ကြောင်း စုံစမ်းသိရှိရသည်။
ပင်လောင်းမြို့နယ် လော့ဒေါင်းကို နိုဝင်ဘာ ၂၁ ရက်ထိ ဆက်လက် ချထားမည်ဖြစ်ကြောင်း ပင်လောင်းမြို့ ကိုဗစ် ၁၉ ပရဟိတ အဖွဲ့က ပြောသည်။
“ဟုတ်ပါတယ်။ လော့ဒေါင်းကို ဆက်တိုးထားမှာပါ။ အဓိကတော့ ကိုဗစ် ထပ်မပြန့်ပွားနိုင်အောင် ထိန်းချုပ်ထားချင်လို့ ထပ်တိုးထားတာဖြစ်ပါတယ်။ ကိုဗစ် ကူးစက်မှုတော့ ကျဆင်းလာပါတယ်။ အရမ်းကြီးတော့ မများလာတော့ဘူး” ဟု ပင်လောင်းမြို့ ကိုဗစ် ၁၉ ပရဟိတ အဖွဲ့ဝင်တစ်ဦးက ပြောသည်။
အလားတူ လာမည့် နိုဝင်ဘာ ၁၈ ရက် တန်ဆောင်မုန်းလပြည့်နေတွင်လည်း ပင်လောင်းမြို့တွင် ဈေးဖွင့်ခြင်းနှင့် လူစုလူဝေး ပေးမပြုလုပ်ကြောင်း သိရသည်။
ပင်လောင်းမြို့တွင် လော့ဒေါင်းကို ၁ လနီးပါးချထားသောကြောင့် ဒေသခံတစ်ချို့က စားဝတ်နေရေးအခက်ခဲ ရှိလာနိုင်ကြောင်း သိရသည်။
“အခက်ခဲတော့ ရှိပါတယ်။ ဒါပေမဲ့ အနည်းအကျဉ်းလောက်ပါဘဲ။ အလုပ်သမားတွေတော့ အလုပ်သွားခွင့်ပေးတယ်။ စားဝတ်နေရေးအတွက်တော့ ခက်ခဲတယ်။ ကျမတို့လို အိမ်နေသမားတွေကတော့ အလုပ်မရှိဘူးလေ။ လော့ဒေါင်းဆက်ချထားတော့ ဆိုင်ဖွင့်လည်း လာဝယ်သူသိပ်မရှိဘူး” ဟု ပင်လောင်းမြို့ ဒေသခံတစ်ဦးက ပြောသည်။
ပင်လောင်းမြို့နယ်တွင် နိုဝင်ဘာ ၁ ရက်နေ့မှစပြီး ကိုဗစ် ၁၉ ပြန့်ပွားမှု ကျဆင်းလာစေရန်အတွက် လော့ဒေါင်းချခဲ့ကြောင်း သိရသည်။
