စစ်ကောင်စီ လက်အောက်ခံ ပညာရေးဝန်ကြီးဌာနက တက္ကသိုလ်ကျောင်းကို ပြန်ဖွင့်ရန်အတွက် ယမန်နေ့ (နိုဝင်ဘာ ၁ ရက်) ကျောင်းအပ်လက်ခံသော်လည်း သျှမ်ပြည်အတွင်းရှိ တက္ကသိုလ်ကျောင်းများတွင် ကျောင်းသွားအပ်သူမရှိကြောင်း စုံစမ်းသိရသည်။
ကိုဗစ်-၁၉ ကူးစက်မှုနှုန်းမြင့်တက်လာမှုကြောင့် ပိတ်ထားသည့် တက္ကသိုလ်ကျောင်းများကို စစ်ကောင်စီ လက်အောက်ခံ ပညာရေးဝန်ကြီးဌာနက ပြန်ဖွင့်ရန် ကြိုးစားနေကြောင်း သိရသည်။
ယနေ့ နိုဝင်ဘာ ၁ ရက်နေ့မှ ၉ ရက်နေ့ထိ ကျောင်းအပ်ရန် ကျန်ရှိနေသည့် အဝေးသင် တက္ကသိုလ်ကျောင်းအပ်များကို လက်ခံသွားမည်ဖြစ်သော်လည်း ပင်လုံမြို့ တက္ကသိုလ်တွင် ယနေ့ထိ ကျောင်းလာအပ်သူမရှိသေးကြောင်း သိရသည်။
“အရင်က အဝေးသင်ကျောင်းအပ်စဆိုရင် ပထမ စလက်ခံတဲ့နေ့မှာ ကျောင်းသားတွေ အများကြီးလာကြတယ်။ အခုတော့ တက္ကသိုလ်ဂိတ်တော့ဖွင့်ထားပြီး ဘယ်သူမှ ဝင်ထွက်တာမရှိဘူး။ ကျောင်းလာအပ်တာလည်း မရှိဘူး။ အပ်ပြီးသားသူတောင်မှ တက်ကြမှာမဟုတ်ဘူး” ဟု ပင်လုံမြို့ ဒေသခံတဦးက ပြောသည်။
ထို့အပြင် ကျောင်းအပ်များကို လက်ခံပြီး ကျောင်းပြန်ဖွင့်သော်လည်း ကျောင်းတက်မည် မဟုတ်ကြောင်း လားရှိုးမြို့ အဝေးသင်တက္ကသိုလ် ပထမနှစ် စတက်မည့်သူက ပြောသည်။
“ဖွင့်လည်းမတက်တော့ပါဘူး။ စစ်ကောင်စီအောက်တော့ ဘာကျောင်းမှမတက်ဘူး။ တက်လည်းဘာမှ မထူးဘူးလေ။ သူတို့နိုင်ငံရေးလှည့်ကွက်ကြောင့် ကျောင်းဖွင့်ပြနေတာ။ အသက်ကြီးသွားလည်း စစ်ကောင်စီလက်အောက်ခံတော့ ကျောင်းလုံးဝမတက်နိုင်ဘူး။” ဟု လားရှိုးမြို့ ကျောင်းသားတဦးက ပြောသည်။
ထို့အပြင် စစ်ကောင်စီ၏ လုပ်ရက်များကို ဂရုမစိုက်ကြောင်း၊ ကျောင်းအပ်လက်ခံသော်လည်း ကျောင်းအပ်သူများမရှိကြောင်း တောင်ကြီးတက္ကသိုလ် ကျောင်းသားတစ်ဦးက ပြောသည်။
“သူတို့ကျောင်းအပ်လက်ခံတာ ကျနော်တို့တောင် မသိရဘူး။ တောင်ကြီးမှာလည်း ကျောင်းသွားအပ်တဲ့သူမရှိပါဘူး။ ကျန်နေတဲ့သူလည်း မအပ်ကြဘူး။ ကျနော်လည်း အပ်ဖို့ကျန်နေတာ မအပ်တော့ဘူး။ တက်လည်း မတက်တော့ဘူး။” ဟု တောင်ကြီးမြို့ ကျောင်းသားတစ်ဦးက ပြောသည်။
မြန်မာနိုင်ငံတွင် ကိုဗစ် -၁၉ ပြန့်ပွားမှုနှုန်းမကျဆင်းသော်လည်း စစ်ကောင်စီက ၎င်းတို့၏ လိုအင်ဆန္ဒအတိုင်း ကျောင်းများကို ဖွင့်လှစ်နေလျက်ရှိကြောင်း သိရသည်။
သျှမ်းပြည်နယ်အတွင်းတွင် အဝေးသင်တက္ကသိုလ်ကျောင်းသားများကို ပင်လုံတက္ကသိုလ်၊ တောင်ကြီးတက္ကသိုလ်၊ လားရှိုးတက္ကသိုလ်နှင့် ကျိုင်းတုံတက္ကသိုလ်တို့တွင် အဝေးသင် ဝိဇ္ဇာဘွဲ့ နှင့် သိပ္ပံဘွဲ့ အတွက် နိုဝင်ဘာ ၁ ရက်မှ ၉ ရက်နေ့ထိ ကျောင်းအပ် စတင်လက်ခံနေပြီဖြစ်ကြောင်း သိရသည်။
Leave a Comments